УсакIом игъогу заф
Адыгэ усакIоу, АР-м культурэмкIэ изаслуженнэ IофышIэу, Адыгэ Республикэм и Къэралыгъо шIухьафтын илауреатэу Къуикъо Шыхьамбый къызыхъугъэр мы мазэм илъэс 60 зэрэхъугъэм фэгъэхьыгъэ тхылъ къэгъэлъэгъонэу «Лунный свет Шхамбия Куева» зыфиIорэр Лъэпкъ тхылъеджапIэм краеведческэ ыкIи лъэпкъ литературэмкIэ иотдел къыщагъэхьазырыгъ.
МэфэкI къэгъэлъэгъоныр зэхэзыщагъэр библиотекарэу Айтэчыкъо Рузан. Ащ къызэриIуагъэмкIэ, непэ тиадыгэ литературэ игузэгупIэ ит усакIу еджэркъуаеу, икъоджэгъоу Къуикъо Шыхьамбый. Дахэу, пасэу усэныр къызхэщыгъэ усакIом зиштагъ, игупшысэ шъхьэлъагъэ. Адыгэ литературэм, адыгэ гупшысэм зиакъыл ыкIи зиамал кIуачIэ игуапэу хэзылъхьэрэ усакIу Шыхьамбый.
Ар мэлылъфэгъум и 3-м, 1963-рэ илъэсым Кощхьэблэ районымкIэ къуаджэу Еджэркъуае къыщыхъугъ. 1980-рэ илъэсым къоджэ гурыт еджапIэр къыухи, Адыгэ къэралыгъо кIэлэегъэджэ институтым филологиемкIэ ифакультет чIэхьагъ ыкIи илъэси 3-рэ щеджагъ. 1989-рэ илъэсым кIалэм Москва дэт Литературнэ институтэу М. Горькэм ыцIэкIэ щытыр къыухыгъ. ЫгукIи ышъхьэкIи зиштагъ. Къуикъо Шыхьамбый усэныр пасэу къыздиштагъэу хэлъыгъ ыкIи джа Тхьэм къыхилъхьагъэм фэшъыпкъэу ежьыри иусэн гъогу пхырещы. Зэрэригъэжьэгъагъэр сабыигъо къэбзагъэм ыгу къыщыущыгъэ усэхэр ары, ахэр район гъэзетэу «Путь Ильича», «Социалистическэ Адыгеим» ыкIи журналэу «Зэкъошныгъэм» къащыхиутыхэу зэрэщытыгъэр къэгъэлъэгъоным къыреIотыкIы.
Иапэрэ усэ сборникэу «Мазэм инэф» зыфиIорэр 1987-рэ илъэсым къыдэкIыгъ, ащ къыкIэлъыкIуагъэх «ГъашIэр псыкъефэх», «Гугъэм илъагъу», урысыбзэкIэ «Звезда кочующего неба» (2004- рэ илъэс) зыфиIохэрэр 2008-м усэхэр зыдэт зы том хъурэ тхылъэу «Избранное» зыфиIоу 2009-рэ илъэсым Шыхьамбый
АР-м и Къэралыгъо премие къызфыратыгъэр къыхиутыгъ.
Адыгэхэм «Зибэ пшIэрэм урыIаз» аIо. Шыхьамбый чэщи мафи икIэсэ поэзием идунай хэт, матхэ, игупшыси дахэу зиштагъ.
Лъэпкъ тхылъеджапIэм къыщызэIуахыгъэ тхылъ къэгъэлъэгъоныр мэкIай зэпэIутищым зэратеф: ахэм усакIом ипроизведениехэр, ахэмкIэ гъэзетхэм, журналхэм ыкIи литературоведческэ тхылъхэм цIыф гъэсагъэхэу литературэр зышIэу, ар сыдигъуи зинэплъэгъу итхэм усакIом ищыIэныгъэ ыкIи итворчествэ къараIуалIэхэрэр къадэхьагъэх. «ШIу зышIэрэм шIу фыщылъ» аIо. Къуикъо Шыхьамбый хьалэлэу илъэпкъ фэлэжьэрэ усакIу, иамали илъэкIи къэнэфагъ, ухэтми игупшысэ узылъещэ ыкIи акъыл хэохы. ТапэкIи игущыIэ кIуачIэ иIэу, шIоигъом ыгукIэ лъыкIахьэу адыгэ литературэм илъэгъо зэщиз дахэу пхырищынэу фэтэIо. МэфэкI къэгъэлъэгъоныр хэткIи гупшысэ къэкIуапIэ хъунэу тэгугъэ.
Мамырыкъо Нуриет.