Я XXIV-рэ студенческэ фестивалэу «АКъУ-м игъатх-2023-рэ» зыфиIорэр мы мазэм и 10-м къызэIуахыгъ ыкIи ар мэлылъфэгъум и 20-м нэс рагъэкIокIыщт. Респуб­ликэм истудент 500-м ехъу фестивалым мыгъэ хэлажьэ.

Урысые фестивалэу «Урысые студенческэ гъатхэр» зыфиIорэм ишъо­лъыр едзыгъоу мы Iоф­тхьабзэр зэхащагъ, ар студентхэм ятворчествэ хэхъоныгъэ егъэшIыгъэным фэгъэхьыгъэ Программэм къыдыхэлъытагъэу Урысыем и НыбжьыкIэхэм я Союз зэхещэ, президентскэ платформэу «Урысыер — амалыбэ зиIэ хэгъэгу» зыфиIорэм хэхьэ. Фестивалыр зыщыIэм къыщыублагъэу ныбжьыкIэхэр зыщызэдэгущыIэхэу, къызщыгущы­Iэхэу ыкIи ятворческэ гъэ­хъагъэхэр къызщагъэлъэгъорэ гупчэу ар хъугъэ.

Я XXIV-рэ студенческэ фестивалэу «АКъУ-м игъатх-2023-рэ» зыфиIорэр АКъУ-м культурэмкIэ Гупчэу иIэмрэ къалэу Мыекъуапэ иадминистрациерэ зэхащагъ.

Адыгэ Республикэм ыкIи нэмыкI шъолъырхэм ащызэлъашIэ хъугъэхэу сэнаущыгъэ зыхэлъыбэмэ мы фестивалыр егъэжьэпIэшIу афэхъугъагъ. Ахэм ащыщых университетым къычIитIупщыгъэхэу, АР-м изаслуженнэ артистхэу ЛIыбзыу Аслъан, Нэчэс Анжеликэ, Еутых Вяче­слав ыкIи Зопунян Самирэ. «Студентхэм ягъатхэ» ныбжьыкIэ проектыбэ къыщаугупшысы, студенче­скэ музыкальнэ театрэу «Арт-Ритон» зыфиIорэми мыщ щыригъэжьэгъагъ.

Адыгэ къэралыгъо университетым ифестиваль текIоныгъэ къыщыдэзыхыгъэхэр гъогогъу пчъагъэрэ «Урысые студенческэ гъатхэм» ифинал ихьагъэх, чIыпIэ зэфэшъхьафхэм апшъэрэ чIыпIэхэр къащы­дахыгъэх. АКъУ-м ­илъэпкъ къэшъокIо ансамблэу «Нар­тым» мызэу, мытIоу текIоныгъэр къызэрэди­хыгъэм фэшI щытхъуцIэу «Студенческэ гъатхэм итхыд» (итамыгъ) зыфи­Iорэр къыфагъэшъошагъ ыкIи фестивалым ия 25-рэ илъэс зыщыхагъэунэфыкIырэ уахътэм Кремлым зыкъыщишIынэу фитыныгъэ иIэ хъугъэ.

Адыгэ къэралыгъо университетым (ащ хэхьэ Мыекъопэ къэралыгъо гуманитарнэ-техническэ колледжыр, АКъУ-м икъу­тамэу Шытхьалэ щыIэр), Мыекъопэ къэралыгъо технологическэ университетым иполитехническэ колледж, Адыгэ кIэлэегъэ­джэ колледжэу Андыр­хъое Хъусен ыцIэ зыхьырэм, искусствэхэмкIэ Адыгэ республикэ колле­джэу Тхьабысымэ Умар ыцIэ зыхьырэм ыкIи Мые­къопэ политехническэ тех­никумэу станицэу Ханскэм дэтым ащеджэрэ студентхэр фестивалым хэлажьэх.

Зизакъоу зыкъэзышIырэмэ афэдэу студенческэ творческэ купхэри фестивалым щызэнэкъокъунхэ алъэкIыщт. Номинациихэу агъэнэфагъэхэмкIэ текIоныгъэ къыдэзыхыщтхэр осэшIхэм къыхахыщтых: вокальнэ искусствэр, теат­ральнэ искусствэр, хореографическэ искусствэр, инструментальнэ ыкIи во­кальнэ-инструментальнэ искусствэр, зыми фэмыдэ жанрэр.

ТекIоныгъэ къыдэзыхы­хэрэм дипломхэмрэ шIу­хьафтынхэмрэ аратыщтых, Урысые фестивалэу «Урысые студенческэ гъатхэр» зыфиIорэм ифиналэу къа­лэу Перьм мы илъэсым ижъоныгъокIэ мазэ щыкIощтым ифинал хэлэжьэнхэ амал яIэщт.

Мэлылъфэгъум и 20-м сыхьатыр 16-м Адыгэ къэралыгъо универси­тетым иконцертнэ зал мэ­фэкI шIыкIэм тетэу фестивалыр щызэфа­шIыжьыщт, гала-концерт къыщатыщт. АкъУ-м ипресс-къулыкъу