Ныдэлъфыбзэр языгъашIэхэрэм язэнэкъокъу
Урысые зэнэкъокъоу «НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэм иреспубликэ чэзыу Адыгеим непэ щырагъэжьагъ.
Ныдэлъфыбзэм икъызетегъэнэжьынкIэ мэхьанэшхо зиIэ Iофтхьабзэу мыр щыт. КIэлэцIыкIум иныдэлъфыбзэ зэригъэшIэнымкIэ, икультурэ ышIэнымкIэ анахь чIыпIэ ин щызыубытырэр кIэлэегъаджэр ары.
Iофтхьабзэм хэлэжьагъэх АР-м и Къэралыгъо Совет —Хасэм гъэсэныгъэмкIэ икомитет итхьаматэу Шэуджэн Тембот, АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель, АР-м культурэмкIэ иминистрэ игуадзэу Кушъу Светлан, АР-м иобщественнэ движениеу «Адыгэ Хасэ — Черкесский парламент» зыфиIорэм ипащэу ЛIымыщэкъо Рэмэзан, Урысые Федерацием лъэпкъ гъэсэныгъэмкIэ ыкIи шIэныгъэмкIэ иIофышIэхэм я Адыгэ республикэ профсоюз организацие итхьаматэу Сергей Кошкиныр.
Ныдэлъфыбзэр языгъэшIэрэ кIэлэегъаджэхэм ыкIи кIэлэпIухэм яIофшIэн уасэ фэпшIын зэрэфаер къэгущыIагъэхэм къыхагъэщыгъ.
Урысые зэнэкъокъоу «НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэм ишъолъыр чэзыу мэзаем и 27-м Урысыем просвещениемкIэ иминистрэу Сергей Кравцовымрэ Адыгеим и ЛIышъхьэу КъумпIыл Муратрэ къызэIуахыгъагъ.
Ащ дэжьым къыхагъэщыгъагъ УФ-м и Президентэу Владимир Путиным 2023-рэ илъэсыр егъэджэкIо-гъэсакIом и Илъэсэу зэригъэнэфагъэр ыкIи ащ къыхэкIэу зэнэкъо-къум мэхьанэшхо зэриIэр.
«Егъэджэн программэхэр ныдэлъфыбзэкIэ зыгъэцэкIэрэ кIэлэпIу анахь дэгъу» зыфиIорэ номинациер мы илъэсым апэрэу зэнэкъокъум хагъэхьагъ. Ащ къыхэкIэу кIэлэпIухэри джы хэлажьэх.
Сэнаущыгъэ ин зыхэлъ кIэлэегъаджэхэр ыкIи кIэлэпIухэр гъэунэфыгъэнхэр, ахэм яIофшIакIэ нэмыкIхэм щысэ афэхъуныр ары пшъэрылъ шъхьаIэу зэхэщакIохэм зыфагъэуцужьырэр.
Ныдэлъфыбзэр языгъашIэхэрэм пшъэрылъышхо агъэцакIэ, ахэр бзэм икъэухъумэн, ихэгъэхъон яшъыпкъэу дэлажьэх. КIэлэеджакIохэм сэнаущыгъэу ахэлъыр къызэрэхагъэщыщтым пылъых, къыткIэхъухьэрэ лIэужхэм яжабзэ дахэу, псыхьагъэу гущыIэнхэм, яхэгъэгу шIу алъэгъуным кIэлэегъаджэхэр мыпшъыжьэу дэлажьэх.
Iофтхьабзэм къекIолIагъэхэр зэнэкъокъум хэлажьэхэрэм нэIуасэ афашIыгъэх, кIэлэегъэджи 7-рэ кIэлэпIуи 7-рэ мы мафэхэм зэнэкъокъущтых. Адыгэкъалэ къикIыгъэ кIэлэегъаджэу ЯхъулIэ
Светланэ, кIэлэпIоу Гъонэжьыкъо Саидэ, Адыгэ республикэ гимназием адыгабзэмкIэ икIэлэегъаджэу Мыгу Анжелэ, Красногвардейскэ районым щыщ Ацумыжъ Джульеттэ, Кощхьэблэ районым Iоф щызышIэрэ кIэлэегъаджэу Бжьэц Фатимэ, Шэуджэн районым ит къуаджэу Пщыжъхьаблэ щыщ Чэтэхъэжъ Эммэ ыкIи нэмыкIхэм ныдэлъфыбзэмкIэ шIэныгъэу аIэкIэлъхэмкIэ заушэтыщт. Зэнэкъокъум хэлэжьэрэ кIэлэегъаджэ, кIэлэпIу пэпчъ пшъэрылъэу къыфагъэуцурэр ыгъэцэкIэным фэхьазыр.
ДЕЛЭКЪО Анет. Сурэтхэр Iэшъынэ Аслъан тырихыгъэх.