Мы илъэсымкIэ «Зэкъошныгъэм» иапэрэ номер къыдэкIыгъ. Ар гъэтхэ шъотеплъэр иIэу гъэпсыгъэ.

АдыгабзэкIэ къыдэкIырэ художественнэ журналэу «Зэкъошныгъэр», кIэлэцIыкIу журналэу «Жъогъобыныр» ыкIи урысыбзэкIэ тиреспубликэ къыщытыра­дзэхэрэ «Литературная Адыгея», «Родничок Адыгеи» зыфиIохэрэр сыдигъокIи кIэрэ­кIэ-зэкIэупкIагъэхэу, купкI дэгъу яIэу, темэ зэфэшъхьафхэмкIэ тхыгъэхэр къадахьэх.

Адыгабзэр зикIасэхэм «Зэкъошны­гъэм» зичэзыу номерэу къыдэкIыгъэм МэщбэшIэ Исхьакъ илIыхъужъ тхыдэхэм ащыщэу «Чэчан ыкъо Чэчан» зыфиIорэм щыпадзэжьын алъэкIыщт. Джащ фэдэу ГъукIэлI Нурбый иповестэу «Дэхэос», Дэрбэ Тимур иповестэу «Намысым насыпыр къыдэкIо», ГутIэ Саныет, Ацумыжъ Маринэ, Мамырыкъо Нуриет ярассказхэр дагъотэщтых.

«Тхылъеджэхэм яусэхэм» зыфиIорэм Уайкъокъо Рэмэзан, Чэтэо Сусанэ, Хъунэ Разиет якъэлэмыпэ къычIэкIыгъэ­хэм ащыщхэр къыщытыгъэх.

ИкIыгъэ 2022-рэ илъэсым ныбжьыкIэу тхэныр зикIасэхэм азыфагу щызэхащэгъэгъэ литературнэ зэнэкъокъум хэлэжьагъэу ыкIи текIоныгъэр къыщыдэзыхыгъэу Енэмыкъо Зарэ ирассказэу «Заринэ игукъэкIыжь» зыфиIорэр къыщышъожэ.

Журналым адыгэ лъэпкъым къыхэкIыгъэ цIыфышIухэм ацIэ къыщыIуагъ. Азэмэтэ Мин-Къутас къызыхъугъэр илъэ­си 115-рэ зэрэхъугъэм фэгъэхьыгъ Дзэукъожь Нуриет итхыгъэу «Ежь илъэ­хъан ицIыф пэрытыгъ» зыфиIорэр.

Литературэмрэ фольклорымрэ афэгъэхьыгъэх Мамый Руслъан итхыгъэу «КIэрэщэ Тембот ипублицистик», Бжьэмыхъу Саният истатьяу «Адыгэ IорIуа­тэхэри ыугъоигъ» ыкIи ЩэшIэ Щамсэт иеу «Дунаим ихабзэхэм гъогу шъхьафкIэ якIолIагъ» зыфиIоу Къуекъо Налбый итворчествэ къизыIотыкIырэр.

Журналым чIыпIэ щаубытыгъ кIэлэцIыкIу пшысэхэми. Мы зэкIэ зэхэбгъэ­хъожьмэ, адыгабзэр ащэбзэрабзэ, къа­Iуатэрэри, узэрагъэгупшысэри бэдэд. Тыбзэ дгъэлъапIэу, хэдгъахъоу, дгъэфедэу ащ тигъэбжьышIоу тызэрэщыIэщтым тишъыпкъэу тыфэжъугъэсакъ.Тиреспубликэ къыщыдэкIырэ журналхэм ахахъоу, заIэтэу, тхылъеджэкIуабэ сыдигъуи яIэнэу афэтэIо, тиадыгабзи орэ­лъэш ыкIи орэчан!

Дзэукъожь Нуриет.