ВолейболымкIэ Мыекъуапэ изэIухыгъэ чемпионат къыдыхэлъытэгъэ ешIэгъухэр щыIагъэх. Адыгеим имуниципалитети 4-мэ ябзылъфыгъэ командэхэр зэнэкъокъум хэлажьэх. БлэкIыгъэ турым ахэм язэIукIэгъухэр гъэшIэгъонэу кIуагъэх. Ахэр ятIонэрэ лигэм щешIэх, команди 6 мэхъух.

Мы спорт лъэпкъыр зыгу ри­хьыхэрэм ашIогъэшIэгъоныгъ Мые­къопэ районыр къэзыгъэлъэгъорэ «Олимпымрэ» Мыекъуапэ иполи­техническэ колледж икомандэрэ язэIукIэгъу зэрэкIуагъэр. ЕшIэгъум къыгъэлъэгъуагъ чемпионатым текIоныгъэр къыщыдэзыхын зылъэкIыщт командэр. Апэрэ сетыр Олимпым къыхьыгъ, пчъагъэр – 25:22. Ащ ыуж ятIонэрэ ыкIи ящэнэрэ сетхэми Мые­къопэ районым икомандэ нахь ащылъэшыгъ. Пчъагъэр 3:0-у зэIукIэгъур аухыгъ.

ТекIоныгъэр къыдахыгъ къуаджэу Еджэркъуае иапэрэ командэ, станицэу Джаджэм илIыкIохэм. ЯтIонэрэ лигэм пэрытныгъэр щиIыгъ командэу «Олимпым».

Апэрэ лигэм хэхьэрэ командэхэм яешIэгъухэри гъэшIэгъонэу макIох. ЗыкIи къызытемыкIогъэхэ командэхэу «Виктория» ыкIи «МГТУ-р» зэIукIэнхэу щыт. Апэрэ купым щешIэхэрэ «Адыгеим» ыкIи «АГУ-м» язэIукIэгъу цIыфыбэ зэреплъыщтым щэч хэлъэп.