Искусствэ лъагэм фырагъэджэщтых
АР-м и ЛIышъхьэу КъумпIыл Мурат театрэмрэ киномрэ яактер цIэрыIоу, УФ-м инароднэ артистэу, УФ-м и Къэралыгъо шIухьафтынхэм ялауреатэу, Урысые къэралыгъо театрэу «Сатирикон» зыфиIоу Аркадий Райкиным ыцIэкIэ щытым ихудожественнэ пащэу Константин Райкиным непэ IукIагъ.
ЗэIукIэгъум хэлэжьагъ АР-м итеатральнэ объединение ипащэу, АР-м и Лъэпкъ театрэу И.Шъ. Цэим ыцIэ зыхьырэм ихудожественнэ пащэу Ацумыжъ Рустам.
Артист цIэрыIом къэгъэлъэгъонэу «Над балаганом небо…» зыфиIорэр Адыгеим къыщигъэлъэгъонэу къэкIуагъ. Адыгеим исхэм театрэм фэгъэхьыгъэ усэхэр непэ ащ щызэхахыгъэх. Давид Самойловым, Николай Заболоцкэм, Николай Рубцовым, Осип Мандельштам, Лопе де Вега, Александр Пушкиным яусэхэм артист цIэрыIор Пушкиным ыцIэкIэ щыт народнэ унэм къыщяджагъ. ЗэIукIэгъур спектаклым ыпэкIэ зэдыряIагъ.
«ТыпIукIэнэу зэрэхъугъэр лъэшэу тигуап. Урысыем имызакъоу, нэмыкI хэгъэгухэми зэчыишIоу узэрэщытыр ащашIэ. Адыгеим апэрэп укъызэрэкIорэр. Уитворчествэ зикIасэхэр бэу тиреспубликэ исых. Сценэм укъызытехьэкIэ жьы пкIэтэу зыкъызэрэпшIырэмкIэ агу къыдэощае. Непэ къэбгъэлъэгъощт спектаклэри цIыфхэм агу рихьынэу сэгугъэ», — къыIуагъ КъумпIыл Мурат.
Адыгеим и ЛIышъхьэ къызэрэхигъэщыгъэмкIэ, республикэм исхэр творческэ проект гъэшIэгъонхэм, артист цIэрыIохэм якъэгъэлъэгъонхэм сыдигъуи къяжэх.
«ЦIыфхэр ягуапэу театрэми, культурэм инэмыкI учреждениехэми макIох. Ятворческэ амалхэм зыкъызэIуягъэхыгъэным пае тиколлективхэр грант программэхэм ахэлажьэх. Пушкинскэ картэми непэ ишIуагъэ къэкIо. Зэпхыныгъэу къыбдытиIэр лъыдгъэкIуатэ тшIоигъу. Театральнэ искусствэм тиреспубликэ ащ нахь зызэрэщыригъэушъомбгъущтым сицыхьэ телъ», — къыIуагъ Адыгеим и ЛIышъхьэ.
Творческэ проектхэм япхырыщынкIэ язэдэлэжьэныгъэ зэрэлъагъэкIотэщт шIыкIэм зэIукIэгъум щытегущыIагъэх. Адыгеим игурыт еджапIэхэр къэзыухырэ кIэлэеджэкIо сэнаущхэр театральнэ искусствэм фегъэджэгъэнхэмкIэ амалэу щыIэхэм Константин Райкиныр къатегущыIагъ. Ащ къызэриIотагъэмкIэ, Константин Райкиным сценическэ искусствэмкIэ иапшъэрэ еджапIэ студие щызэхащэн ямурад. Джащ фэдэу гастрольнэ турхэр зэрэзэхащэщтхэми зэIукIэгъум щытегущыIагъэх.
Адыгеим и ЛIышъхьэ мыщ фэдэ Iофтхьабзэм къыдыригъэштагъ ыкIи актерхэм яIэпэIэсэныгъэ зыкъегъэIэтыгъэным, театральнэ искусствэм республикэм зыщегъэушъомбгъугъэным мэхьанэшхо зэряIэр къыIуагъ. КъумпIыл Мурат творческэ коллектив дэгъубэ Адыгеим зэриIэм фэгъэхьыгъэу Константин Райкиным къыфиIотагъ. Творческэ коллектив цIэрыIохэм ахэхьэх Адыгэ Республикэм и Урыс къэралыгъо драматическэ театрэу А.С. Пушкиным ыцIэкIэ щытымрэ АР-м и Лъэпкъ театрэу И. Шъ. Цэим ыцIэ зыхьырэмрэ. Пушкиным ыцIэкIэ щыт народнэ унэм ахэр чIэтых. Константин Райкиным моноспектаклэм зыкъызэрэщигъэлъэгъуагъэм имызакъоу, республикэм итеатральнэ IофышIэхэми, искусствэхэмкIэ колледжэу У. Хь. Тхьабысымэм ыцIэкIэ щытым истудентхэми творческэ зэIукIэгъу адыриIагъ.
«Тизэпхыныгъэ тапэкIи зэрэлъыдгъэкIотэщтым сицыхьэ телъ. Шъуитеатрэ къыщыдгъэлъэгъон тлъэкIыщт спектаклэхэм, гастрольхэм тягупшысэщт. Творческэ зэдэлэжьэныгъэ зэдытиIэ хъугъагъэмэ дэгъугъэ. Республикэм ипащэхэм культурэ зэхъокIыныгъэхэм мэхьанэшхо зэряIэр къызэрагурыIорэр ыкIи ахэм къазэрадырагъаштэрэр сигуапэ, — къыIуагъ Константин Райкиным. КъумпIыл Мурат зэIукIэгъум зэрэщыхигъэунэфыкIыгъэмкIэ, культурэмкIэ учреждениехэр мылъкукIи, техникэкIи нахь зэтегъэпсыхьэгъэнхэмкIэ, творческэ коллективхэм IэпыIэгъу ягъэгъотыгъэнымкIэ республикэм бэ щашIэрэр. Творческэ зэдэлэжьэныгъэу Константин Райкиным дыряIэр загъэпытэкIэ, Адыгеим щыпсэухэрэм актер зэчыишIухэм джыри зэIукIэгъу гъэшIэгъоныбэ адыряIэн зэралъэкIыщтым ицыхьэ зэрэтелъыр АР-м и ЛIышъхьэ къыхигъэщыгъ.
ЗэIукIэгъум икIэух АР-м и ЛIышъхьэ хьакIэм юбилей медалэу «Адыгэ Республикэм ия 100-рэ илъэс» зыфиIорэр ритыгъ, творческэ гъэхъагъэхэр тапэкIи ышIынэу фэлъэIуагъ. Константин Райкиным КъумпIыл Мурат «тхьауегъэпсэу» къыриIуагъ дахэу къызэрэпэгъокIыгъэм фэшI ыкIи моноспектаклэу «Над балаганом небо…» зыфиIорэм еплъынэу ригъэблэгъагъ.
АР-м и ЛIышъхьэ ипресс-къулыкъу