Сценэм тет актерым ижабзэ IупкIэу, зэхэу­гуфыкIыгъэу къыбнэсыным мэхьанэшхо иI. Ащ фэгъэхьыгъэ десэхэр АР-м итеатральнэ объ­еди­нение хэт артистхэм апае Лъэпкъ унэу А. Пуш­киным ыцIэ зы­хьырэм мы ма­фэхэм щэкIох.

Ахэр зезыщэу Елена Ласкаваяр Москва къи­кIыгъ — актер, режиссер, театральнэ кIэлэегъадж, театральнэ институтэу Б.Щукиным ыцIэ зыхьырэм сценическэ жабзэмкIэ икафедрэ идоцент, театрэу Е.Вахтанговым ыцIэ зыхьырэм икIэлэ­егъадж, УФ-м итеатральнэ IофышIэхэм я Союз хэт, жабзэм ыкIи къэIотэн (ораторскэ) искусствэм иеджапIэу Москва дэтым изэхэщакIу.

Мыщ фэдэ десэхэр, мас­тер-классхэр тиартистхэм апае зэхэщагъэ хъун­хэмкIэ зишIогъэшхо къэ­кIуа­гъэхэр УФ-м итеат­ральнэ IофышIэхэм я Союз итхьаматэу Александр Ка­лягиныр, Союзым итвор­ческэ отдел ипащэу Дмитрий Мозговоир, УФ-м ыкIи АР-м янароднэ артистэу, Союзым исекрета­рэу ыкIи ишъолъыр къута­мэ ипащэу Зыхьэ Заурбый, АР-м итеатральнэ объединение ихудожест­веннэ пащэу Ацумыжъ Рустам.

Урыс драматическэ театрэу А.Пушкиным ыцIэ зыхьырэм ыкIи АР-м и Лъэпкъ театрэу Цэй Иб­рахьимэ ыцIэкIэ щытым яартистхэр зэгъусэхэу мастер-классхэм ахэла­жьэх. ЗэкIэмкIи десэхэр 4 зэрэхъухэрэр. КIэлэ­егъа­джэу къэкIуагъэм гущыIэр ашIошъ мэхъуфэ куоу егупшысэнхэу артистхэр егъасэх, ежь иунэе методикэ егъэфедэ.

«Театрэм анахь чIыпIэ шъхьаIэ щызиIэр гущыIэр ары, — хегъэунэфыкIы Еленэ. — ГущыIэм ыкIуа­чIэ ошъогум унигъэсын ылъэкIыщт. Арышъ, теат­рэм къакIохэрэм ар анэбгъэсышъуным мэхьанэшхо иI. Европэм ыкIи КъокIыпIэм ащагъэфедэрэ практикэхэр сидесэхэм ахэсэгъахьэх. ЦIыф лъэпкъэу зыщыщым емылъытыгъэу макъэм, къэIуакIэм Iоф адэзышIэрэ артистхэм шапхъэхэр ашIэнхэ фае. Сидесэхэр ныбжьыкIэхэми, ныбжь зиIэхэми зэ­фэдэу анэсыщтых, агуры­Iощтых. Уфэен фае. Джыдэдэм Iоф зыдасшIэрэ артистхэм сигуапэу, гуха­хъо хэзгъуатэзэ сишIэныгъэхэмкIэ садэгуащэ».

ИскусствэхэмкIэ колле­джэу Тхьабысымэ Умарэ ыцIэ зыхьырэм итеатральнэ отделение истудент­хэми джащ фэдэу жэрыIонымкIэ десэхэу театрэм щыкIохэрэм ахэлэжьэнхэу амал къаратыгъ. Ахэр мэлылъфэгъум и 12-м нэс театрэм щыкIощтых.

Тэу Замир.