Неущ Адыгэ Респуб­ликэм и Сурэт къэгъэлъэгъуапIэ зэлъашIэрэ сурэттехэу ыкIи сурэттех-журналистэу Аркадий Кирнос икъэгъэ­лъэгъонэу «Творчествэм игъунапкъэхэр» зыфи­Iорэр щыкIощт, ар авторым ыныбжь илъэс 70-рэ зэрэхъурэм фэгъэ­хьыгъэщт.

Аркадий иIофшIэгъи 100 цIыфэу къекIуалIэрэмэ алъэгъун алъэкIыщт. Блэ­кIыгъэ уахътэм ухэзыщэ­хэу, республикэм ихъу­гъэ-шIэгъэ анахь шъхьаIэхэр къизыIотыкIыхэрэр сурэтхэм ахэтыщтых. Культурэм ыкIи искусст­вэм алъэныкъокIэ гъэхъа­гъэхэр зышIыгъэ цIыфхэу Адыгеим щызэлъашIэхэрэм япортретхэри экспозицием къыхеубытэх.

Художественнэ сурэтхэр жанрэ зэфэшъхьаф­хэмкIэ авторым къыгъэлъэгъуагъэх: портретхэр, пейзажхэр, хэушъхьафыкIыгъэ сурэтхэр. Ау ахэри репортаж шIыкIэм илъхэу Аркадий Кирнос тыри­хы­гъэх, къыгъэхьазыры­гъэх.

Къыблэ Урысыем, Темыр Кавказым, Адыгэ Республикэм ыкIи къалэу Мыекъуапэ къэгъэлъэгъон проекти 100-м къехъу Iоф ешIэфэ Аркадий ащызэ­хищагъ. Илъэс 50-м къыхиубытэрэ творческэ Iоф­шIэнэу авторым иIагъэм къыкIоцI гъогогъу 200-м къыщымыкIэу сурэт къэгъэлъэгъонхэм ыкIи сурэт салонхэм ахэлэжьагъ, ахэм азыныкъорэм дунэе мэхьанэ яIагъ. Хэгъэгу 40-мэ яхудожественнэ галереехэм ыкIи къэгъэлъэгъуапIэхэм А. Кирнос иIофшIагъэхэр щытхъу апылъэу къащагъэлъэ­гъуагъэх. Урысыеми IэкIыб къэралыгъохэми къыщафагъэшъошэгъэ бгъэхалъхьэхэр ыкIи Рэзэныгъэ тхылъхэр авторым итворческэ хъарзынэщ бэ дэдэ хъухэу хэлъых.

— Аркадий Кирнос ныб­жьыкIэхэми ынаIэ атет, Iоф адешIэ. Илъэс 15-м къехъугъэу ныбжьыкIэхэр къызхигъэлэжьэхэрэ зэнэ­къокъухэу «Сурэт нэплъэ­гъу» зыфиIорэр, къэгъэлъэгъонхэр, мастер-классхэр, творческэ зэIукIэхэр зэхещэх. Сурэт техынымкIэ клубэу ыгъэлажьэрэм еджапIэ щызэхищагъэу ныбжьыкIэхэр а сэнэхьатым фегъасэх, ар нэбгырэ 200-мэ къаухыгъ. Арка­дий ригъэджагъэхэм ащыщыбэ IэпэIэсэныгъэшхо зыхэлъ сурэттех-журналистхэу ыкIи сурэтышIхэу хъугъэх, — къыщыхагъэщыгъ АР-м культурэмкIэ и Министерствэ.