ФутболымкIэ Урысыем ипервенствэ иятIонэрэ лигэ хэт командэхэм зичэзыу ешIэгъухэр яIагъэх.

Мыекъопэ «Зэкъошныгъэр» коман­дэу «Машук-КМВ-м» Пятигорскэ щыIукIагъ, пчъагъэр 3:1-у бысымхэм зэIукIэгъур ахьыгъ.

Зэнэкъокъум игъэтхэ едзыгъо тикомандэ апэрэу къыщытекIуагъэх. Мыекъуапэ ифутболистхэр дэгъоу ешIагъэх, Iэгуаори нахьыбэрэ аIыгъыгъ. Ау апэрэ таймыр 0:0-у аухыгъ. ЯтIонэрэм бысымхэм пенальтикIэ пчъагъэр къызэIуахыгъ, я 47-рэ такъикъым тикомандэ икъэлапчъэ Iэгуаор къыдэзыдзагъэр Станислав Строгановыр ары. Такъикъ 18 тешIагъэу «Зэкъошныгъэм» пчъагъэр зэфэдиз ышIыгъ. Дан Новицкэм Iэгуаор къэлапчъэм дидзагъ. Ау тIэкIу тешIагъэу Заур Цакоевым «Машук-КМВ-р» ыпэ ригъэшъыгъ, я 74-рэ такъикъым Дмитрий Ходарченкэм пчъагъэм хигъэхъуагъ, 3:1-у бысымхэм ешIэгъур ахьыгъ. Мы аужырэ ешIэгъуитфым «Зэ­къошныгъэм» икъэлапчъэ Iэгуаор къыдэзыдзэн ыкIи къытекIон зы­лъэкIыгъэ закъор Пятигорскэ икоманд ары.

— «Машук-КМВ-р» зэрэлъэшыр, опытышхо зиIэ футболистхэр зэрэхэтхэр, ащ къыхэкIыкIэ утекIоныр зэрэмыпсынкIэр дэгъоу тшIэщтыгъ. Апэрэ таймым тиешIакIэ уигъэрэзэнэу щыты­гъэп, ятIонэрэм нахь дэгъоу тешIагъ, Iэгуаор тIыгъыгъ. Ау ар къэ­лапчъэм дэтыдзэнымкIэ амалэу тиIагъэхэр дгъэфедагъэхэп, бысымхэм ар нахь къадэхъугъ, — къыIуагъ «Зэкъошныгъэм итренер шъхьаIэу Беслан Аджинджал.

Мыекъуапэ икомандэ я 7-рэ чIыпIэм къэнагъ, ау яхэнэрэр зыIыгъым ыуж очкоуи 4-кIэ къинэ хъугъэ. Мэлылъфэгъум и 15-м «Зэкъошныгъэр» командэу «Легионым» Мыекъуапэ щыIукIэщт.