Мы блэкIыгъэ тхьаумафэм Мыекъуа­пэ щырагъэкIокIыгъэ Iофтхьабзэу «10000 шагов к жизни» зыфиIорэм нэбгырэ 300 фэдиз хэлэжьагъ.

Ахэм ахэтыгъэх къэлэ администрацием ипащэу Геннадий Митрофановыр, Мыекъуапэ инароднэ депутатхэм я Совет итхьаматэу Джарымэкъо Азмэт. Ахэр республикэм икъэлэ шъхьаIэ щыпсэухэрэм ягъусэхэу урам шъхьаIэхэм къарыкIуагъэх, къэлэ паркым екIолIагъэх. Зы­кIыныгъэмрэ ЗэгурыIоныгъэмрэ ягупчэ щырагъажьи паркым дэт арт-объек­тэу «МыIэрыс» зыфи­Iо­рэм Iоф­тхьабзэр щаухыгъ.

Бэхэр унагъохэу къе­кIолIагъэх, ахэм ахэтыгъэ­хэм языщанэ кIэлэцIыкIух. Iофтхьабзэм къыдыхэлъы­тэгъэ пшъэрылъхэр зэкIэ къэзэрэугъоигъэхэм агъэцэкIагъэх, лъэс кIоным шIогъэшхо къызэритырэр зэхашIагъ. Анахь цIыкIу-хэм ыкIи анахьыжъхэм пар­тиеу «Единэ Россием» ичIыпIэ къутамэ къыгъэхьазырыгъэ шIухьафтынхэр афашIыгъэх.

— Марафоным хагъэу­нэфыкIырэ чIыпIэхэр къыщыдэзыхыгъэхэм ыкIи ащ хэлэжьагъэхэм зэкIэми са­фэгушIо, — къыIуагъ Геннадий Митрофановым. — Мыщ фэдэ Iоф­тхьабзэхэр зэхэтщэнхэм, физическэ культурэм, кIэлэцIыкIу спортым хэхъоныгъэ ашIыным тапэкIи тынаIэ тедгъэтыщт.