Красногвардейскэ районымрэ Краснодар краим и Успенскэ районрэ яныбжьыкIэ командэхэр «Зэкъош­ныгъэм» икубок икъы­дэхын фэгъэхьыгъэ зэнэкъокъоу къуаджэу Улапэ щыкIуагъэм хэлэжьагъэх. Псауны­гъэм игъэпытэн фы­те­гъэпсыхьэгъэ ком­плексыкIэм футболымкIэ истадион зэнэкъокъухэр щыкIуагъэх.

Мы мафэм хьэкIэ лъапIэхэм ахэтыгъэх Адыгеим и ЛIышъхьэу КъумпIыл Мурат, Краснодар краим и Хэбзэгъэуцу ЗэIукIэ и Тхьаматэ игуадзэу Владимир Бекетовыр. Зэнэкъокъум изэхэщэн зыпкъ къикIыгъэри В. Бекетовыр ары.

Футболист ныбжьыкIэхэм яешIакIэ лъыплъагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Красногвардейскэ районым ипащэу Гъубжьэкъо Темур, Успенскэ районым ипащэу Геннадий Бахилиныр, районитIумэ яобщественность илIыкIохэр.

Къэзэрэугъоигъэхэм закъыфигъазэзэ Адыгеим и ЛIышъхьэу КъумпIыл Мурат къызэриIуагъэмкIэ, мы Iофтхьабзэм изэхэщэн лъэшэу игуапэу дыригъэштагъ.

«Адыгеимрэ Краснодар краимрэ язэфыщытыкIэхэм ренэу алъапсэх гъунэгъушIу ыкIи бгъуитIумкIи яфедэ зыхэлъ зэдэлэжьэныгъэр. ШъолъыритIуми яныбжьыкIэхэр зэхэхьанхэм, гъунэгъушIу зэфыщытыкIэхэр лъагъэкIотэнхэм, зэрэ­лъытэжьынхэм, ублэпIэшIухэмкIэ IэпыIэгъу зэфэхъунхэм тэркIэ мэхьанэ иIэу щыт. «Зэкъошныгъэм» икубок тизэдэлэжьэныгъэ, спортым имызакъоу, нахь зиушъомбгъуным кIочIакIэ къызэрэхилъхьащтым сицыхьэ телъ», — къыIуагъ КъумпIыл Мурат.

Успенскэ районым къыщыхъугъэхэу Адыгеим ихэхъоныгъэ зиIахьышхо хэзышIыхьагъэхэм ягугъу къышIы зэхъум республикэм и ЛIышъхьэ МэщбэшIэ Исхьакъ — Урысыем IофшIэнымкIэ и

ЛIыхъужъэу, Адыгеим, КъБР-м, КъЩР-м янароднэ тхакIоу щытым щыIэныгъэ гъогоу къыкIугъэр щысэу къафихьыгъ. Джащ фэдэу КъумпIыл Мурат къызэрэхигъэщыгъэмкIэ, Успенскэ районым къыщыхъугъэ Владимир Бекетовым Пшызэ шъолъырымрэ Адыгеимрэ лъэныкъо пстэури къызэлъызыубытырэ зэдэлэжьэныгъэу азыфагу илъым зи­ушъомбгъуным иIахьышхо хишIыхьагъ, республикэм итынхэри фагъэшъошагъэх.

Краснодар краим и Хэбзэгъэуцу ЗэIукIэ и Тхьаматэ игуадзэу Владимир Бекетовыр къызэгущыIэм зэнэкъокъум иапэрэ чэзыу изэхэщэнкIэ анаIэ къызэратырагъэтыгъэм пае республикэм ипащэхэм зэрафэразэр къыхигъэщыгъ.

«Лъытэныгъэу тэ зэфытиIэр тикIэлэцIыкIухэми, тиныбжьыкIэхэми ахэтлъхьан фае. Зэблэгъэныгъэ-зэгурыIоныгъэр щыIэмэ, экономикэмкIи, социальнэ лъэ­ныкъомкIи зэдитхъухьэгъэ гухэлъхэр пхырытщынхэ тлъэкIыщт. Тишъолъырхэм яIэшъхьэтетхэм, джащ фэдэу цIыф къы­зэрыкIохэу ахэм ащыпсэухэрэм ренэу зэгурыIоныгъэ азыфагу илъыгъ. КъыткIэхъухьэхэрэм яфедэ хэлъэу тизэфыщытыкIэхэр джыри нахь пытэ хъухэмэ зэрэсшIоигъор къыхэзгъэщынэу сыфай», — къыIуагъ Владимир Бекетовым.

Ащ нэужым зэнэкъокъум хэлажьэ­хэрэм ыкIи ахэм яплъынэу къекIолIагъэ­хэм шIуфэс къарахыгъ Владимир Нарожнэм, Красногвардейскэ ыкIи Успенскэ районхэм япащэхэм.

КъэгущыIагъэхэм къыхагъэщыгъ шъолъыритIумэ ащыпсэухэрэм языкIыныгъэ агъэпытэн, Адыгеимрэ Краснодар краимрэ ижъыкIэ къыщегъэжьагъэу азыфагу илъ блэгъэныгъэр джыри нахь лъагъэкIотэн зэрэфаер.

Джащ фэдэу къуаджэхэу Ула­пэрэ Кургъокъуайрэ, селохэу Марьино ыкIи Красногвардейскэм культурэм иунэхэу адэтхэм ятворчествэ коллективхэм якъэ­гъэлъэгъонхэр щыIагъэх. Успенскэ районымкIэ къуаджэу Шъхьа­щэфыжь футбол командэхэм яятIонэрэ зэIукIэгъу щызэхащэнэу рахъухьагъ.

Футбол ешIэгъум икъызэIухын фэгъэхьыгъэ Iофтхьабзэхэм ауж Адыгеим и ЛIышъхьэ хьэкIэ лъапIэхэр игъусэхэу къуаджэм дэт еджапIэм ищагу чъыг лъэп­къэу платаныр щыгъэтIысхьэгъэ­ным хэлэжьагъ, зэкъошныгъэм­рэ гъунэгъу зэфыщытыкIэ пы­тэхэмрэ ятамыгъэу ар щытыщт. ГъэшIэгъоныр Улапэ дэт гурыт еджапIэу N 9-м ия 100-рэ илъэс ыкIи къуаджэу Кургъо­къуай дэт гурыт еджапIэу N 9-м ия 100-рэ илъэс атефэу чъыгыр зэрагъэтIысхьагъэр ары.

Мы мафэм Хэгъэгу зэошхом хэкIодагъэхэр ахэм агу къагъэ­кIыжьыгъэх, Улапэ игупчэ щагъэуцугъэ саугъэтым къэгъагъэ­хэр кIэлъыралъхьагъэх, джащ фэдэу къуаджэм дэт мэщытымрэ культурэм и УнакIэрэ ащыIагъэх.

Сурэтхэр: А. Гусев.