Кушъхьэфэчъэ спортымкIэ Урысые зэнэкъокъу­хэр Адыгеим щыкIуагъэх. Ахэм яаужырэ едзыгъо Мыекъопэ районым щырагъэкIокIыгъ. Къэралыгъом ишъолъыр 14-мэ къарыкIыгъэ спортсменкэ 69-мэ заушэтыгъ.

Пшъашъэхэм (зыныбжь илъэс 16-м шIомыкIыгъэхэм) язэнэкъокъу гъэшIэгъонэу кIуагъэ. Мы едзыгъом ехъулIэу пэрытныгъэр зыIыгъыгъэ Ангелина Новолодскаяр ящэнэрэу къэсыжьыгъ. ЯтIонэрэ хъугъэ Аглая Кокаревар, апэ къэсыжьыгъ Полина Даньшинар. Пшъашъэхэр зэкIэ Санкт-Петербург щыщых. Зэнэкъокъум изэфэхьысыжьхэмкIэ, мы нэбгырищым хагъэунэфыкIырэ чIыпIищыр зэфагощыгъ.

Адыгеир къэзыгъэлъэгъуагъэхэм анахь къахэщыгъэр Анна Радуненкэр ары, апэрэ нэбгырипшIым ар ахэфагъэп, ау гъэхъагъэу ышIыгъэм рыраз.