Адыгеим икъэлэ шъхьаIэ икIэлэеджакIохэм я Спартакиадэ къыдыхэлъытагъэу атлетикэ псынкIэм илъэныкъоу кроссымкIэ зэнэкъокъухэр Мыекъуапэ щыкIуагъэх. Пшъашъэхэм ыкIи кIалэхэм метрэ 500 ыкIи 1000 къачъыгъ.

Апэ апэрэ купым хэт пшъашъэхэр зэнэ­къокъугъэх. Мыхэм анахь лъэшэу къахэкIыгъэр лицееу N 35-м щеджэрэ Ада Хохловар ары. Ащ очкоуи 102-рэ икомандэ къыфи­хьыгъ. Къыхэгъэщыгъэн фае, мы еджапIэр къэзыгъэлъэгъуагъэхэм ащыщэу нэбгыри 3-р анахь дэгъуи 10-мэ ащыщ хъугъэх.

КIалэхэр пштэмэ, гимназиеу N 22-м чIэс Максим Чумаченкэм апэрэ чIыпIэр къыдихыгъ. Ау еджапIэхэр пштэмэ, анахь лъэшыгъэр N 17-р ары. ЯтIонэрэ хъугъэ еджапIэу N 3-р, ящэнэрэ чIыпIэм щыт N 2-р.

ЯтIонэрэ купым нахь къащыхэщыгъэх гурыт еджапIэу N 16-р къэзыгъэлъэгъогъэ Алина ыкIи Диана Тамбовцевхэр. КIалэхэм язэнэкъокъу текIоныгъэр къыщыдихыгъ Платон Шевцовым.

Гурыт еджапIэу N 16-м ипшъашъэхэм апэрэ чIыпIэр афагъэшъошагъ, N 10-р ятIонэрэ хъугъэ, еджапIэу N 28-м илIыкIохэм ящэнэрэ чIыпIэр къыдахыгъ.

Спартакиадэм изичэзыу едзыгъо къыды­хэлъытагъэу Мыекъуапэ икIэлэеджакIохэр спорт ориентированиемкIэ зэнэкъокъущтых.