Адыгэ Республикэм къэралыгъо гъэпсыкIэ иIэ зыхъугъэм ия 100-рэ илъэс ехъулIэу социальнэ псэолъэ заулэ гъэкIэжьыгъэнымкIэ ыкIи зэтегъэпсыхьэгъэнымкIэ Iофтхьэбзабэ зэшIуахыгъ.

Ахэм ащыщых искусствэхэмкIэ Адыгэ респуб­ликэ колледжэу У. Хь. Тхьабысымэм ыцIэкIэ щытыр, искусствэхэмкIэ Адыгэ республикэ кIэлэцIыкIу еджа­пIэу К. Хь. Лъэцэрыкъом ыцIэ зыхьырэр. Мыхэр игъэкIотыгъэу агъэцэкIэ­жьыгъэх.

Адыгеим и ЛIышъхьэу КъумпIыл Мурат а псэуалъэ­хэм ащыIагъ, культурэм иучреждениехэм творчествэмрэ гъэсэныгъэмрэ япхыгъэ IофшIэныр икъоу ыкIи тэрэзэу гъэцэкIагъэ хъуным пае амалхэу арагъэгъотыхэрэм защигъэгъозагъ. Джащ фэдэу Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м культурэмкIэ иминистрэу Аулъэ Юрэ.

УплъэкIун IофшIэнхэр кIохэ зэхъум Адыгеим и ЛIышъхьэ кIэлэегъаджэхэм ыкIи ащ щеджэхэрэм гущыIэгъу афэ­хъугъ, культурэм епхыгъэ учреждениехэм язэтегъэпсыхьанрэ ягъэкIэжьынрэ афэхъугъэ кIэуххэм нэIуа­сэ зафишIыгъ, джырэ уахътэм диштэрэ Iэмэ-псымэхэмкIэ ахэр зэтегъэпсыхьэгъэнхэм епхыгъэ амалхэу щыIэхэми защигъэгъо­загъ.

Адыгэ Республикэм культурэмкIэ иминистрэ къызэриIуагъэмкIэ, IофшIэнхэр зэкIэ игъом зэшIуахыгъэх, зэзэгъы­ныгъэу зэдашIыгъагъэхэм къыдалъы­тэхэрэри икъоу агъэцэкIагъэх.

ГущыIэм пае, искусствэхэмкIэ Адыгэ республикэ кIэлэцIыкIу еджапIэу К. Хь. Лъэцэрыкъом ыцIэкIэ щытым иеджэпIэ унэ зэрэпсаоу агъэцэкIэжьыгъ, унэ кIоцI IофшIэнхэр дэгъоу зэшIуахыгъэх, инженер коммуникациехэр зэблахъу­гъэх. Джы щэу зэтет унэу 1961-рэ илъэсым ашIыгъагъэу, бэшIагъэу агъэцэкIэжьын фаеу щытыгъэм творчествэм пылъынхэмкIэ уахътэм ди­штэрэ амалышIухэр зэкIэ щара­гъэгъотыгъэх.

КъумпIыл Мурат гъэцэ­кIэжьынхэм афэхъугъэ кIэух­хэм нэIуасэ зафишIыгъ, музыкальнэ Iэмэ-псымэхэмкIэ, еджэным фытегъэпсыхьэгъэ пкъыгъо зэфэшъхьаф­хэмкIэ еджапIэр зэрэзэтырагъэпсыхьагъэм зыщигъэгъозагъ. Республикэм и ЛIышъхьэ творчествэм зыщыпылъхэ мастерскойхэм, музыкальнэ классхэм ащы­Iагъ, художественнэ IофшIагъэхэм якъэгъэлъэгъуапIэ нэIуасэ зыфишIыгъ, еджапIэм ифольклор къутамэу ГъукIэ Замудин зипащэм игъэхъагъэхэми защигъэгъозагъ. КIэлэеджакIохэм адыгэ мэкъамэхэр, классическэ произведениехэр къырагъэIуагъэх.

ИскусствэхэмкIэ еджапIэм ипащэу Анзэрэкъо Марзиет Адыгеим и ЛIышъхьэ еджапIэм мылъку-техникэ лъэныкъом­кIэ изэтегъэпсыхьанкIэ ишIуагъэ къызэраригъэкIыгъэм пае зэрэфэразэр къы­Iуагъ, джащ фэдэу гъэсэныгъэ, концерт ыкIи творческэ IофшIэнэу мыщ щагъэцакIэрэм фэгъэхьыгъэу къыфиIотагъ. НепэкIэ кIэлэцIыкIу 346-рэ мы еджапIэм чIэс. Ахэм ащыщхэр урысые ыкIи дунэе зэнэкъокъу зэфэшъхьафхэм ялауреат хъугъэх. ЕджапIэр зызэхащагъэм къыщегъэжьагъэу анахьэу анаIэ зытырагъэ­тырэ лъэныкъохэм ащыщ ижъырэ адыгэ культурэр къэухъумэгъэныр ыкIи зэлъягъэшIэгъэныр. АмалыкIэхэу яIэ хъугъэхэм яшIуагъэкIэ мы IофшIэным нахь зырагъэушъомбгъу хъугъэ. ГущыIэм пае, гъэцэкIэжьын IофшIэнхэм ауж ижъырэ адыгэ культурэм имузей еджапIэм къыщызэIуахыгъ. Лъэцэрыкъо Кимэ иунэе пкъыгъо ыкIи Iэмэ-псымэ зэфэшъхьафхэр мыщ чIэлъых. Анахьэу ашIогъэшIэгъонэу анаIэ зытырадзэрэр адыгэ пщынэр ары.

КъумпIыл Мурат къыхигъэщыгъ лъэпкъ культурэр къэгъэнэжьыгъэнымкIэ, къэу­хъумэгъэнымкIэ, къыткIэхъухьэхэрэм ятворчествэ джыри нахь зегъэушъомбгъугъэнымкIэ еджапIэм зэшIуихырэ Iоф­тхьабзэхэм мэхьанэшхо зэряIэр. Джащ фэдэу Адыгеим и ЛIышъхьэ къы­Iуагъ лъэпкъ Iэпэщысэхэм яшIын фэгъэсэ­гъэнхэр непэкIэ анахь мэхьанэ зэратыхэрэм зэращыщыр. Республикэм зекIоным нахь зызщиушъомбгъурэ лъэ­хъаным ахэм мэхьанэу яIэм джыри нахь зыкъеIэты.

«Федеральнэ гупчэм иIэпыIэгъу хэлъэу культурэм иучреждениехэм ягъэ­кIэжьын тыдэлажьэ. ШIуагъэ къытэу ахэр гъэфедэгъэнхэм, ныбжьыкIэхэм ягъэхьазырын, яшIэныгъэхэм джыри нахь ахэгъэхъогъэным япхыгъэ IофшIэныр лъыгъэкIо­тэгъэным, творчествэмкIэ амалыкIэхэр ягъэ­гъо­тыгъэнхэм, тирес­публикэ игъэхъагъэхэмкIэ нахь зэлъя­гъэшIэ­гъэным япхыгъэу ахэр щытых. Тэ та­лъэныкъокIэ культурэм иучреждениехэм тапэкIи IэпыIэгъу тафэхъущт, цIыфхэм языгъэ­псэфыгъо уахътэ нахь тэрэзэу зэхэщэгъэнымкIэ шIыкIэ-амалыкIэхэр респуб­ликэм щыдгъэфедэщтых», — къыIуагъ КъумпIыл Мурат.

ИскусствэхэмкIэ респуб­ликэ колледжыр

Адыгеим ия 100-рэ илъэс ехъулIэу искусствэхэмкIэ Адыгэ республикэ колледжэу У. Хь. Тхьабысымэм ыцIэ зы­хьырэм игъэкIотыгъэ гъэцэкIэжьынхэр щыкIуагъэх. Федеральнэ гупчэмрэ рес­публикэм ихэбзэ къулыкъухэмрэ яшIуа­гъэкIэ ащ зэхъокIыныгъэшхохэр фэхъу­гъэх. ГъэцэкIэжьыным къыхиубытэу электромонтажнэ, сантехническэ, унэ­кIоцI IофшIэнхэр агъэцэкIагъэх, концерт къызыщатырэ залхэм, спортзалхэм жьыфхэр арагъэуцуагъэх. Аудиториехэр, концерт, спорт, хореографическэ залхэр джырэ шапхъэхэм адиштэу зэтыра­гъэпсыхьагъэх.

ИскусствэхэмкIэ колледжым ипащэу Куфэнэ Щамсэт къызэриIуагъэмкIэ, блэкIыгъэ лIэшIэгъум ия 70-рэ илъэсхэм къащегъэжьагъэу еджапIэм гъэцэкIэжьынхэр рашIылIэгъагъэхэп. Джыдэдэм ащ итеплъэ лъэшэу зихъожьыгъ. Адыгеим и ЛIышъхьэ музыкант ныбжьыкIэхэм орэд къызэраIорэм едэIугъ. Студентхэм яIэпэIэсэныгъэ зынэсырэр, лъэпкъ проектэу «Культурэм» къыдыхэлъытагъэу мэкъэмэ Iэмэ-псымэу къащэфыгъэхэм къызэряохэрэр къагъэлъэгъуагъ.

Джыдэдэм программи 9-кIэ студент нэбгырэ 315-рэ колледжым щеджэ. Илъэс 63-м къыкIоцI колледжым специалист мини 4 фэдиз къыгъэхьазырыгъ. Мы еджапIэр къэзыухыгъэхэм искусствэхэмкIэ кIэлэцIыкIу еджапIэхэм, республикэм итворчествэ коллектив пэрытхэм Iоф ащашIэ. ИскусствэхэмкIэ Адыгэ республикэ колледжыр респуб­ликэм ипрофессиональнэ искусствэ игупчэу плъытэмэ хъущт. Адыгэ Респуб­ликэм исхэм якультурэ зыкъегъэIэтыгъэнымкIэ гъэхъагъэу иIэхэм афэшI 2021-рэ илъэсым колледжым респуб­ликэм итын анахь лъапIэ — медалэу «Адыгеим и Щытхъузехь» зыфиIорэр къыфагъэшъошагъ.

Республикэм и ЛIышъхьэ студентхэмрэ кIэлэегъаджэхэмрэ адэгущыIэ зэхъум, колледжым иколлектив тапэкIи гъэхъагъэхэр ышIынэу, творческэ зэнэкъокъу­хэм ащатекIонэу, республикэм ичIыпIэ зэфэшъхьафхэм якъэгъэлъэгъонхэр нахь чанэу ащызэхащэнэу афэлъэIуагъ. Къум­пIыл Мурат Адыгеим культурэмкIэ и Министерствэ игъо филъэгъугъ тхьаумафэрэ къэлэ паркым ыкIи республикэм инэмыкI чIыпIэ шъхьэихыгъэхэм ащыкIорэ концертхэм студентхэр нахьыбэу къахигъэлэжьэнэу.

ЦIыфхэм якультурэ зыкъегъэIэтыгъэнымкIэ Iофэу ашIагъэм мэхьанэшхо зэриIэр республикэм и ЛIышъхьэ хигъэ­унэфыкIыгъ, культурэм иучреждениехэр мылъкукIи, техникэкIи нахьышIоу зэтегъэпсыхьэгъэнхэм иамалхэр зэрэзэрахьан фаер къыхигъэщыгъ.

«КультурэмкIэ республикэ учреждениехэм ягъэцэкIэжьын культурэм ылъэ­ныкъокIэ Iофышхоу дгъэцакIэрэм изы Iахь ныIэп. НепэкIэ Адыгеим ипсэупIэхэм азыныкъо нахьыбэмэ культурэм иучреждениехэр ащагъэкIэжьыгъэх, мылъку­кIи, техникэкIи язытет нахьышIу ашIыгъ», —– къыIуагъ КъумпIыл Мурат.

Шъугу къэтэгъэкIыжьы мы аужырэ илъэси 5-м культурэм и Унэ 57-рэ рес­публикэм зэрэщагъэпсыгъэр, искусствэхэмкIэ еджэпIи 7 зэрагъэцэкIэжьыгъэр е зэрагъэкIэжьыгъэр. Мыгъэ искусствэхэмкIэ еджапIэу станицэу Ханскэм дэтымрэ искусствэхэмкIэ кIэлэцIыкIу еджапIэу N 6-у Мыекъуапэ дэтымрэ ягъэкIэжьын аухыщт. Джащ фэдэу культурэм и Уни 3 къуаджэхэм ащагъэ­цэкIэжьын ямурад, 2-мэ яшIын аублэщт. Мыгъэ концерт залэу «Налмэсым» игъэкIэжьын фежьэщтых.

АР-м и ЛIышъхьэ ипресс-къулыкъу