ДзюдомкIэ Дунэе зэнэкъокъоу В.С. Ощеп­ковым ишIэжь фэгъэхьыгъэр къалэу Хаба­ровскэ щыкIуагъ. Урысыем, Белоруссием, Таджикистан, Армением, Индием, Сербием, Монголием ядзюдоист анахь лъэшхэр зэIукIагъэх. МэфитIум къыкIоцI кIогъэ зэнэкъокъухэм нэбгыри 185-рэ ахэлэжьагъ.

Мыщ зыщызыушэтыгъэхэм ащыщ Адыгэ Республикэм илIыкIоу Къуижъ Бислъан. Килограмм 73-м нэс къэзыщэчыхэрэм якуп ар хэтыгъ, зэкIэмкIи гъогогъуи 5 бэнагъэ. Финалныкъом ихьанымкIэ Монголием къикIыгъэ спортсменым IукIагъ, ау текIоныгъэр къыдихын ылъэкIыгъэп. Ау мыщ ыуж зыIукIэгъэ Хабаровскэ ыкIи Красноярскэ крайхэм ялIыкIохэм къашIуихьыгъ, ащ ишIуагъэкIэ ящэнэрэ чIыпIэр къыдихыгъ ыкIи Урысыем ихэшыпыкIыгъэ командэ текIоныгъэр къыдихыным иIахьышIу хилъхьагъ. Тикъэралыгъо идзюдоистхэм апэрэ чIыпIэ 13 къыдахыгъ, гъогогъу 11-рэ ятIонэрэ хъугъэх, джащ фэдэу ящэнэрэ чIыпIэ 20 къахьыгъ.

— МэфитIум алырэгъум гъэшIэгъоныбэ щытлъэгъугъ. Сэ анахьэу згъэшIэгъуагъэр ыкIи сызгъэгушIуагъэр Карим Абдуллаевыр ары. Мыщ техникэ дахэ къыгъэлъэгъуагъ ыкIи зэхэщакIо­хэм дзюдоист анахь дэгъоу къы­хахыгъ. Джащ фэдэу къахэщы­гъэх кIэлэ ныбжьыкIэу Сергей Богословских, Давид Карапетян, Шэуджэн Ислъам, Валерий Ендовицкэр, Арман Адамян. IэкIыб къэралыгъохэм къарыкIыгъэ дзюдоистхэр зэнэкъокъум зэрэ­хэ­лэжьагъэхэм мэхьанэшхо иI. ГущыIэм пае, монголхэм турнирым командэ лъэш къыращэ­лIагъ, — къыIуагъ хъулъфыгъэхэмкIэ Урысыем ихэшыпыкIыгъэ командэ итренер шъхьаIэу Тэу Хьасанбый.

IэкIыб къэралыгъохэм къарыкIыгъэхэм медаль 11 къахьыгъ. Анахьэу къахэщыгъэхэр Монголием илIыкIохэр ары, ахэм ауж итых Белоруссием, Армением ядзюдоистхэр. «Russian judo Tour» зыфиIорэм изичэзыу едзы­гъо мэкъуогъум и 24 — 25-м Челябинскэ хэкум щыкIощт.