«Абрамовым и Кубок» зыфиIорэ зэнэкъокъур Мыекъуапэ щырагъэжьагъ. «Зэкъошныгъэм» хэтыгъэу, Iэгуаор анахьыбэрэ къэлапчъэм дэзыдзагъэу Анатолий Абрамовым ыцIэ зыхьырэ турнирым командэ 12 хэлажьэ.

А. Абрамовыр илъэс пчъагъэрэ республикэм икомандэ шъхьаIэ щешIагъ, гъогогъуи 115-рэ Iэгуаор дидзагъ. Ащ ирекорд зыми къыригъэхъун ылъэкIыгъэп. ГухэкI нахь мышIэми, 1996-рэ илъэсым илъэс 46-рэ ыныбжьэу ар дунаим ехыжьыгъ. Ащ ыуж илъэс заулэ тешIагъэу футболист цIэрыIом ишIэжь фэгъэхьыгъэ апэрэ турнирыр рагъэкIокIыгъ.

ЗэхэщакIохэм зэрагъэнэфа­гъэу, командэхэм яешIэгъухэр зыгъэпсэфыгъо мафэхэм макIох ыкIи зытекIохэрэр зэнэкъокъум хэзых. Апэрэ турым пхырыкIынхэ алъэкIыгъэп «Спортмастер», «Спортмастер-1», «Сокол» ыкIи «Космос» зыфиIорэ командэхэр. ЯзэIукIэгъухэр къахьыгъэх ыкIи зэнэкъокъум щылъыкIотагъэх «Ошъутенэр», МФОК-у «Ошъутенэр», «Тульскэр», «Спортмастер-2-р». Ахэр аIукIэщтых «Легион», «Динамо», «Альянс» ыкIи «Кавказ» зыфиIорэ командэхэм.

Футболыр зыгу рихьыхэрэр стадионэу «Юностым» рагъэблагъэх. Тхьаумафэм зэIукIэщтых «Ошъутен» — «Легион», МФОК-у «Ошъутен» — «Динамо», «Тульскэр» — «Альянс», «Спортмастер-2» — «Кавказ».

Зэнэкъокъум кIэщакIо фэхъугъэх АР-м физическэ культурэмкIэ ыкIи спортымкIэ и Комитетрэ Адыгеим футболымкIэ и Федерациерэ.