Iофтхьабзэу «10000 шагов к жизни» зыфиIорэр мэлылъфэгъум и 9-м Мыекъуапэ щызэхащэщт. Псауныгъэм и Дунэе Мафэ ехъулIэу ар яплIэнэрэу рагъэкIокIы.

— Iофтхьабзэм пшъэрылъ шъхьаIэу иIэр лъэс кIоным пыщагъэхэм япчъагъэ на­хьыбэ шIыгъэныр, псауныгъэмкIэ мыщ шIуагъэу пылъыр цIыфхэм агурыгъэ­Iогъэныр ары. Арышъ, унэм шъукъикIи, лъэсэу къэшъукIух, шъуипсауныгъэ жъугъэпытэ, — къыщаIуагъ Мыекъуапэ испорткомитет.

Iофтхьабзэр рагъэжьэным ыпэкIэ ащ хэлэжьэщтхэм медицинэ уплъэкIунхэр арагъэкIущтых, зэрэзекIонхэ фаер къафаIотэщт. Зыщызэрэугъоищтхэ чIыпIэу къыхахыгъэр ЗыкIыныгъэмрэ ЗэгурыIоныгъэмрэ ягупч ары. Джащ фэдэу респуб­ликэм икъэлэ шъхьаIэ итворческэ купхэм орэдхэр къаIощт, къэшъощтых.

Фаехэр зэкIэ Iофтхьабзэм хэлэжьэнхэ алъэкIыщт. Ащ зызэрэщыптхыщтым фэгъэхьыгъэ къэбарыр Мыекъуапэ физическэ культурэмкIэ ыкIи спортымкIэ и Комитет исоциальнэ хъытыухэм арыжъу­гъо­тэщт.