Адыгэ кIэлэцIыкIу литературэр ыгъэбаигъ
Арэущтэу зыцIэ непэ къесIо сшIоигъор Гъыщ Рахьмэт ары. Шэуджэн районым ит къуаджэу Хьакурынэхьаблэ мэлылъфэгъум и 6-м, 1963-рэ илъэсым къыщыхъугъ, непэ имэфэкI хегъэунэфыкIы.
1983-рэ илъэсым Мыекъопэ мэкъумэщ хъызмэт техникумыр, 1996-рэ илъэсым М. Горькэм ыцIэкIэ щыт Литературнэ институтэу Москва дэтыр къыухыгъэх, а къалэм щэпсэу.
Рахьмэт ытхыхэрэр 1979-рэ илъэсым къыщыублагъэу хеутых. Тхэныр къоджэ еджапIэм чIэсызэ усэхэмкIэ ригъэжьэгъагъ. Ахэр Шэуджэн район гъэзетэу «Зарям» ыкIи гъэзетхэу «Комсомолец Кубани», «Пионерская правда» зыфиIохэрэм къарыхьэщтыгъэх. 1988-рэ илъэсым къыщыублагъэу Гъыщым итхыгъэхэр журналхэу «Зэкъошныгъэм», «Жъогъобыным» къащыхеутых.
Тэ, адыгэ тхылъеджэхэм, Рахьмэт анахь тэзгъэшIагъэр кIэлэцIыкIухэм апае ытхыгъэ рассказхэр адэтэу адыгабзэкIэ «Пшэсэн щынагъу» ыкIи урысыбзэкIэ «Злая крапива» ыIохэу тхылъитIоу Адыгэ тхылъ тедзапIэм 1991-рэ илъэсым къыщыдэкIыгъэхэр ары. Ащ дэжьым пшъашъэм илъэс 28-рэ ымыныбжьыгъэми, гулъытэ чан зэриIэр, кIэлэцIыкIу гъэпсыкIэ-шIыкIэхэр дэгъоу зэрилъэгъухэрэр ыкIи къызэриубытыхэрэр ирассказхэм зэхыуагъашIэ. 2018-рэ илъэсым Р. Гъыщым итхылъыкIэу «Букет сирени» зыфиIорэр урысыбзэкIэ Адыгэ республикэ тхылъ тедзапIэм къыщыхиутыгъ. Анахь шIуагъэу сэ тхакIом фэслъэгъурэр ипроизведениехэм адыгапсэр дахэу зэращыIорышIэрэр, лъэпкъ нэшанэхэр куоу зэрэрилъэгъукIыхэрэр, кIэлэцIыкIухэм дунэееплъыкIэ тэрэз агъотынымкIэ зишIуагъэ къакIорэр, джащ фэдэу, сабыигур, зихэхъогъур зыуIэрэ шэнхэр кIигъэтхъэу зэрэтхэрэр ары.
Рахьмэт итхылъ къыдэхьэгъэ рассказ пэпчъ щыIэныгъэ лъэпсэ икъу иIэу гъэпсыгъэ, къоджэ щыIакIэр, адыгэ унэгъо-унашъохэр, пIукIэ хабзэхэр мыхэм дэгъоу ахэолъагъох ыкIи ащыгъэфедагъэх; а зэкIэ Рахьмэт ылъэгъугъэу, зэхихыгъэу, зыщыгъуазэу, пIуныгъэ мэхьэнэ гъэнэфагъэ зыхэлъых. ТхакIом адыгабзэкIэ къыдигъэкIыгъэ рассказхэм сяджагъ. Хъурэ-шIэрэм къешIэкIыгъэ пстэур авторым IэпкIэ-лъапкIэу егъэпсых, мыхэр кIэлэцIыкIухэм атешIыкIыгъэхэми, ахэм ягулъытэ-гурышэ, яшIоигъоныгъэхэр къыриIотыкIэу, тапэкIэ адыгэхэм кIэлэцIыкIугъом уасэу ратыщтыгъэр, ар зыфэдэгъэ шъыпкъэр уанэIу къырегъэуцох, охътэ гъэнэфагъэм икIэлэцIыкIухэм язекIуакIэхэр, ягъэпсыкIэхэр хьарамыгъэнчъэх, гум къенэжьых, адыгабзэри хъоо-пщаоу ахэм ащэIорышIэ.
Гъыщ Рахьмэт УФ-м итхакIохэм я Союз 1996-рэ илъэсым къыщегъэжьагъэу хэт. Къызыхъугъэ мэфэкIымкIэ тыфэгушIозэ, тхэн лъэгъо нэфыр химыгъэкIуакIэу, тхыгъакIэхэмкIэ лъигъэкIотэнэу, псауныгъэ иIэнэу тыфэлъаIо.
Мамырыкъо Нуриет.