Фатимэ гъунджэм кIэрыт. Янэ иджэнэ къолэн лъапшъэм къы­даоу зыщилъагъ, цокъэ лъэдэкъэ лъагэмэ арыуцуагъ. Артисткэ дахэ горэм исурэт ыпашъхьэ илъэу, ащ еплъы­зэ, ыIупшIэ плъыжьыбзэу IуигъэлыкIыгъ. Пудрэ тIэкIуи нэгум нигъэсыгъ. Ышыпхъу нахьыжъ ынэбзыц­хэр зэригъалэрэм фэдэу ригъэ­жьагъ, ау ынэ кIэIэбэжьи ыгъэу­зыгъэти, ыуж икIыжьыгъ.

Щагум тхьачэт анэр къызэрэ­щыгумэкIрэр зызэхехым, Фатимэ псынкIэу унэм къикIыгъ. Тхьачэт щырхэр гур-гур язэрэгъаIоу къе­зэрэщэкIыщтыгъэх. «Дэгъуба згъа­шхэхэмэ, мамэ гушIон», — джэ­накIэр чIыгум зэрэнэмысыщтым пае пшъэшъэжъыем IитIумкIэ бгъу зырызыр ыубыти, дэкIояпIэм ­ехыгъ.

— Кур-кур-кур! — Фатимэ Iусыр Iэгум из ышIыгъ, джагъэ. Тхьачэт щырхэм ар къауцухьагъ. Iусыр ыIэгу рашхыкIэу рагъэжьагъ, ыIэгушъо тIэкIу къагъэлыджыти, ищхи, игушIуи зэхэтэу, ыцэ жъгъэй цIыкIухэр къыIупсыгъэх.

— Гур-гур-гур! — Ымакъэ гу-мэкI хэлъэу икIэрыкIэу къэджагъ тхьачэт анэр.

Фатимэ ышъхьэ ыIэтыгъ. Бгъэ­жъышхор тхьачэт щырхэм къа­шъхьарыуагъ. Анэм гуIэу бзыу мэхъаджэм зыпэIуидзагъ. Щтагъэ­хэу, янэ дэжькIэ мычъэхэу тхьачэт щырхэм Фатимэ иджэнэ чIэгъ зыкъычIатэкъуагъ. Ежьыри бгъэжъым ыгъэщынагъ: зыщылъэтыни унэм илъэдэжьынэу фежьагъ шъхьаем, тхьачэт бынэу иджэнэ чIэгъ зыкъы­чIэзытэкъуагъэм ыгъэтэджыгъэп.

Тхьачэт анэр мэгуIэ, зышъхьэ IитIукIэ зыIыгъэу щыс пшъэшъэ­жъыер хъураеу къечъыхьэ. Фатимэ фэмыщыIэу ышъхьэ къыIэтыгъ, бгъэ­жъыр зыдэщыIэмкIэ плъагъэ. Ар лъагэу дэбыбаешъ, зыкъыре­дзыхы, жьым зэрэхэтэу ылъэбжъэ папцIэхэмкIэ тхьачэт анэм къы­жэхэбанэ. Мыдрэри цапэкIэ бгъэ­жъым губжыгъаеу ео. Цыр къыхегъэтэкъу.

Джыри бгъэжъыр къебыбэхэу ылъэгъугъ, пшъэшъэжъыем ынэ шхъонтIэ цIыкIухэр пытэу зэтырипIуагъэх, ынэгу IитIумкIэ зэкIи­къузагъэ…

Тхьачэт анэм игур-гур макъэ къэмыIужь зэхъум, Фатимэ мэкIэ-макIэу ынапIэхэр къызэтырихыгъэх — бгъэжъыр чыжьэу-чыжьэу уашъом ибыбэжьыгъэу ылъэгъугъ.

Пшъэшъэжъыер ерагъэу къэтэ­джыжьыгъ. Тхьачэт щырхэр иджэнэ чIэгъ пхъыпхъыпхъэу къычIэтэкъу­жьыгъэх. ЗэкIэри псаоу къызэрэ­нэжьыгъэм пае Фатимэ гушIуагъэ.

— А сипшъашъ, сыд джана зыщыплъагъэр? Слъэгъу пэтзэ зыщыхыжь! — щагум ныр къызыдэхьажьым, къыфэгубжыгъ.

Хъугъэр зэкIэ Фатимэ янэ ри­Iотэжьынэу ыIушъхьэ къыдихьыягъ, ау зиушъэфыжьи, унэм ихьажьыгъ. Джанэр зыщихыжьыгъ, чыжьэу ыгъэтIылъыгъэп. Ышъхьэ къилъэ­дагъ: хэт ышIэра, тхьачэт быныр къэухъумэгъэн фаеу джыри неущ чIыпIэ ифэщтми ышIэрэп.