Чыиф унэхэмрэ исп унэхэмрэ
Темыр Кавказым икъохьапIэ нэр пIэпихэу чIыпIэ дах, ичIыопс зэкIужь: иуашъо къаргъо, икъушъхьэхэр лъагэх, ипсыхъохэр чъэрых, имэзхэр кIырых, игубгъо хъоо-пщаухэр чIыпцIэ къат Iужъух, сыдрэ лэжьыгъи ащыбагъоу чIыгу хьалэмэтых. ХъупIэ къашхъохэмрэ мэкъупIэ уц зэхакIэхэмрэ хъоеу итых. ЧIыналъэр тхыпхъэ хъырахъишъэу псыхъуабэмэ зэхаухъытыхьэ. Илъэс мин пчъагъэхэм мы дунай джэнэтым адыгэхэр лъэпкъы ихъухьагъэх.
Тятэжъ-тянэжъ пIашъэмэ дунэееплъыкIэу, дунэезэхашIэу яIагъэмкIэ, къэзыуцухьэрэ чIыопсэу зыщыпсэухэрэм исыдрэ лIэужыгъуи псэ пытэу алъытэщтыгъ, ащ щыщыбэхэр тхьэпапкIэу агъэнэфэгъагъэх, агъэлъапIэщтыгъэх, къаухъумэщтыгъэх. ЕгъэшIэрэ хабзэ афэхъугъэу, амыгъэфедэщтмэ, чъыгыр раупкIыныр хэгъэкIыри, къутамэ пакIыкIыщтыгъэп, тхьапи пачыщтгъагъэп. КIэлэцIыкIухэм уцхэр ратхъы зыхъукIэ, «шъуятэжъмэ ажакIэхэр ишъумыч» араIощтыгъэ.
Джырэ лъэхъаным чIыопсым икъэухъумэнрэ игъэкъэбзэнрэ гумэкIыгъо мыухыжь хъугъэ. ИжъыкIэ адыгэхэм анахь лъэпкъ шынкI щыIагъэп пIоми ухэмыукъонкIи хъун. ЕгъашIэм унэгъо байи, унэгъо тхьамыкIи ищагу хэкIыр къыдихыщтыгъэп. ХапIэм икъопэ зэгъокI горэм щаугъоищтыгъ, стын зылъэкIыщтхэр агъэстыщтыгъэх, чIыгъэшIу хъущтыр хатэм ахьыщтыгъ, къанэрэр чIатIэжьыщтыгъ.
Илъэсым къыкIоцI мэзитIу ныIэп зышакIощтыгъэхэр: шэкIогъу мазэмрэ тыгъэгъазэмрэ е тыгъэгъазэмрэ щылэ мазэмрэ. Адрэ мэзипшIым чIыопсым хэс лъэпкъ яягъэ рагъэкIыщтыгъэп.
Псэушъхьэ нэжъхэу, къолэбзыухэу щыр къызкIэхъощтхэмрэ зыкIэсхэмрэ аукIыщтыгъэхэп, псэ зыпыт амыгъэфедэщтмэ, хьаулыеу къаушэкIущтыгъэп.
БэшIэгъэ дэдэу тилъэпкъ къыгурыIогъагъ цIыфыр дунаим ренэу тетынэу къызэрэтемыхъорэр. Ащ елъытыгъэу, хъулъфыгъэнкIи бзылъфыгъэнкIи фит, щэIэфэ пшъэрылъ шъхьаIэу зыфилъытэжьыщтыгъэр къызтехъогъэ дунаим иягъэ римыгъэкIэу щыпсэуныр ыкIи щэIэфэ ар нахьышIу ышIыгъэу, ялъфыгъэхэмрэ къакIахъохэрэмрэ къызэрафигъэнэжьыщтыр ары.
Дунаим тет лъэпкъ пэпчъ ежь зыщыпсэурэ чIыналъэм инэшанэмэ адиштэу, зычIэсыщт унэхэри, щагу псэуалъэхэри ыгъэпсыхэу ихабз. МыщкIэ адыгэхэм сэнаущыгъэшхо ахэлъыгъ ыкIи ахэлъ.
ЦIыфыр ренэу зэрэщымыIэщтыр зэрашIэрэм елъытыгъэу, мыжъо лIэшIэгъум ыуж, гъочIэгъхэм къачIэкIыжьхи, бгъагъэхэр ашIыхэу зырагъэжьагъэм къыщыублагъэу я XX-рэ лIэшIэгъум къынэсыжьэу, илъэс 5000 — 6000-м зычIэсыщт унэхэмрэ бгъагъэхэмрэ чыифыпкъ яIэу, чIым хэкIодэжьыщт закI зыхашIыкIыщтыгъэхэр: пхъэ, чы, ятIэ, бгъэны е къамыл. Чыиф унэр анахьыбэу зэрэщытыщтыр илъэсишъ, цIыфым инахьыбэрэ гъашIэ фэдиз.
Адыгэмэ ядунэееплъыкIэкIэ, ыпэкIэ къызэрэтIуагъэу, чIыопсым исыдрэ лIэужыгъуи псэ пыт. Ащ фэшI, чIыналъэм лыягъэ рамыхынэу, чырбыщ уни, мыжъо уни ежьхэм зыфашIыщтыгъэп. ЗыкIэ пый мыухыжьхэм унэ шIыгъо рагъафэщтыгъэхэп, етIани ижъыкIэ хъулъфыгъэм мыжъо е чырбыщ унэ зыфишIыжьмэ, илIыгъэкIэ зыщымыгугъыжьэу, ежьыри иунагъуи фэмыухъумэнхэу, къэрабгъэу алъытэщтгъагъэ.
Ижъым-ижъыжьым тятэжъ пIашъэхэр фэIэпэIасэу мыжъо испунэхэр, дольменхэр ашIыщтыгъэх, дэгъу шъыпкъэу зэхагъэуцощтыгъэх, ау ахэр зыфашIыщтыгъэхэр зидунай зыхъожьыгъэхэр ары. Хьадрыхэм гъунэ иIэп, ары лIагъэхэм мыжъо унэхэр, испунэхэр, зыкIафашIыщтыгъэхэр. Ахэм янахьыбэм Iуашъхьэхэр атырашIыхьэщтыгъэх. Ащ цIыф бзаджэ емыкIуалIэу, ятIэр тыримытхъоу хьэдэ унэр ымыкъутэмэ е иягъэ римыгъэкIымэ, егъашIэм щытыщт, ау ахэми ашъхьасыгъэхэп.
Илъэс 3000 — 5500-кIэ узэкIэIэбэжьымэ, а уахътэм къыдиубытэрэм, испунэ 10000-м ехъу пэсэрэ адыгэхэмрэ абхъазхэмрэ ячIыналъэхэм арашIыхьэгъагъэхэу шIэныгъэлэжьхэм къаушыхьаты. Я XIX-рэ лIэшIэгъум Кавказым икъохьапIэ испунэ 2500-рэ фэдиз ныIэп къыщалъытэжьыгъагъэр.
Апэ ашIыщтыгъэхэр иныгъэхэп, мыжъобгъу тешъо пIуакIэхэу плIы зэхагъэуцощтыгъ, ащ хьадэр рагъэтIысхьэти, ятфэнэрэр шъхьэу тырапIожьыщтыгъ. ЛIагъэр рамылъхьэу зэрэрагъэтIысхьэщтыгъэр арын фае «исыпIэ ун», испун, араIонэу къызхэкIыгъэр. Нэужым дольменхэр мыжъобгъу инхэм ахашIыкIыщтыгъэх. Янахьыбэр зы пэщ (комната) ныIэп зэрашIыщтыгъэр. Агупэхэм блынкIэхэр афашIыщтыгъэх, аIупэхэм гъуанэхэр ахахыщтыгъэх, IукокIэ агъэпытэжьыщтыгъэх. Гъэнэфагъэу ахэм тхьэлъэIупIэхэр ахэтыгъэх ыкIи лIакъомэ яхьэдэ гъэтIылъыжьыпIагъэх. Зидунай зыхъожьыгъэ зытIущ ащ зыралъхьажькIэ, Iукор Iуалъхьажьыти, ятIэрэ мыжъошхохэмрэ атыралъхьэхэти Iуашъхьэ атырашIыхьэщтыгъ. Испунэхэр куп-купэу, шъэрышъэ-шъэрышъэхэу зэхэтхэу, къэхалъэхэу ашIыгъагъэх. Енэгуягъо ахэр абдзахэхэм, шапсыгъэхэм, нэтхъуаехэм, бжъэдыгъухэм — лъэпкъыбэ хъущтыгъэ адыгэхэмрэ абхъазхэмрэ хэушъхьафыкIыгъэхэу ялъэпкъ къэхэлъагъэхэкIэ.
Мыщ дэжьым къэIогъэн фае Ижъырэ Адыгеим ыкIоцI къалэхэр зэримытыгъэхэр. УзычIэсыщт мыжъо е чырбыщ унэ умышIэу сыдэущтэу къалэ бгъэпсыщта? Шъыпкъэ, тичIыналъэхэм къалэхэр арытыгъэх. Ахэр хы Iушъохэм аIутыгъэх. Урым щакIохэм нахь Iэрыфэгъоу сатыу адашIынэу хы Iушъомэ къызыIуагъэтIысхьэхэм, мыжъо унэхэр ашIынхэр ялъэпкъ нэшэнагъэти, япсэупIэхэм ахагъахъозэ къалэ хъугъагъэх. Ахэм пэсэрэ адыгэхэр, мыутIэхэр ары лъэпкъ шъхьаIэу адэсыщтыгъэхэр. Советхэм ялъэхъан къырахьыжьагъэу тарихъ шIэныгъэлэжьхэм хы Iушъохэм урымхэм анэмыкI аIумысыгъэу къатхы.
Икультурэ щымыщым хэти шъхьасырэп, ары гуегъу афырямыIэу испунэхэм янахьыбэр зыкIагъэкIодыгъэр. Хьадэхэр зычIэлъхэм адыгэхэр егъашIи етIагъэхэп. Ежьхэм яехэми, хымэ лъэпкъ иехэми хьадэ зыдэлъ бэн агъэфыкъуагъэп.
Ижъым-ижъыжьым бгъагъэу ашIыщтыгъэхэр зыфэдагъэхэр тэ, археологхэм, тэгъэунэфыжьы. Чыиф унэ шIыкIэу тэ къыднэсыжьыгъэхэр джэрз лIэшIэгъум икъежьапI ашIыхэу заублэгъагъэр. А унэ ыкIи бгъэгъэ шIыкIэхэр илъэс мин пчъагъэхэм, адыгэхэм яIагъэх.
Апэ агъэуцущтыгъэхэр, тиэрэ ыпэкIэ ящэнэрэ ыкIи яплIэнэрэ илъэс минхэм къыхиубытэхэрэр, тIоу е щэу зэпытыщтыгъэхэп, унэ зэкъуагъэх. ЯгъэпсыкIэкIэ хъурэягъэх, хъурэе IукIыхьагъэх е плIэмыягъэх. Ахэр дэгъоу къащыхэдгъэщыжьыгъэх Мыекъопэ культурэм хэхьэхэрэ псэупIэжъхэу КъэзэныкъоякIэм, Нэчэрэзыежъым, Ленинэхьаблэ зыдэщысыщтыгъэхэм, Пщыкъуйхьаблэрэ Тэуйхьаблэрэ яхэгъуашъхьэхэм. ЯкIыхьэгъэ-яшъомбгъуагъэхэмкIэ метри 4-м щегъэжьагъэу метри 6-м нэсыщтыгъэх ныIэп. Унэпкъхэр чыифыгъэх, акIыIухэри акIоцIхэри ятIэкIэ игъагъэх. Унэ закъом ыкIоцI зэрэцIыкIум къыхэкIэу джэхашъом мэшищ щыратIыкIыщтыгъ. Джырэ фэдэу унэгъо IапIэхэр щыIагъэхэп. Зы машэм — шхыныгъохэр, адрэм — хьакъу-шыкъухэр, ящэнэрэм Iэмэ-псымэхэр аралъхьэщтыгъэх ыкIи чыйхэр атырахъожьыщтыгъ.
Мыекъопэ культурэм, джэрз пасэм, къыхиубытэрэ испунэхэмрэ зычIэсыщтыгъэхэ унэхэмрэ яинагъэкIи яшIыкIэкIи бэкIэ зэтекIыщтыгъэхэп.
Мыщ дэжьым къыкIэдгъэтхъын фае адыгэхэми абхъазхэми яунэхэм блынкIэхэмрэ лъэгухэмрэ яIэхэу, илъэс мин пчъагъэхэм, джырэ къынэсыжьэу, зэрашIыхэрэр.
Урысыем иархеологхэу Адыгеим къакIохэрэм дольмен культурэр адыгэхэм къарапэсырэп. Европэм къырахыгъэу къаушыхьатынэу фежьэх. Пшысэхэр IэубытыпIэ ашIых. Исп цIыкIухэм иныжъхэм хъоршэрыгъэкIэ мыжъо унэхэр арагъэшIыщтыгъэхэу, испхэр тхьакIумкIыхьэхэм атесхэу къачъыхьэщтыгъэхэу къаIуатэ.
Адыгэ ыкIи абхъаз тятэжъ пIашъэмэ дольмен культурэр амылэжьыгъэмэ, ахэр япчъагъэкIэ 10000 ехъоу сыдэущтэу ячIыналъэмэ арытыщтгъагъэха?!
Тэу Аслъан. Археолог, АР-м и Лъэпкъ музей инаучнэ IофышIэ шъхьаI.