Зэдегъэштэ есынымкIэ Урысыем ипервенствэ хэлэжьэгъэ Адыгеим илIыкIохэр къэралыгъом ихэшыпыкIыгъэ командэ анахь дэгъуи 10-мэ ащыщ хъугъэх.

Олимпийскэ резервым и Мыекъопэ спорт еджапIэу В.С. Максимовым ыцIэ зы­хьырэм зыщызыгъасэхэрэр арых тишъолъыр къэзыгъэлъэгъуагъэхэр.

Зыныбжь илъэс 13-м емыхъугъэ спортсменхэм язэнэкъокъу республикэр зэрифэшъуашэу къыщыгъэлъэгъогъэнымкIэ Iофышхо гъэцэкIагъэ хъугъэ. Зэдегъэ­штэ есынымкIэ къутамэу Мыекъуапэ къызыщызэIуа­хыгъэр илъэси 5 зыщы­хъущт уахътэм тренерхэм пшъэ­рылъышхо зыфагъэуцужьыгъагъ — командэ анахь лъэ­шитфым ахэфэнхэу. Ау Московскэ хэкум ит къалэу Чеховым щыкIогъэ зэ­нэкъокъум а гухэлъыр къа­щыдэхъугъэп. Урысыем ишъо­лъыр 19-мэ къары­кIыгъэ спортсмен 390-рэ Iоф­тхьабзэм хэлэжьагъэх. Первенствэм ипрограммиплIым къадыхэлъытагъэу Мыекъуапэ илIыкIохэм зы­кIи тазыр баллхэр къатыралъхьагъэхэп, балл 469-рэ рагъэкъугъ. ТекIоныгъэр къыдэзыхыгъэ Московскэ хэкум икомандэ егъэпшагъэмэ, а пчъагъэр 106-кIэ нахь макI ыкIи ащ къыкIэлъыкIоу я 10-рэ чIыпI.

— Мы спорт лъэпкъымкIэ къэралыгъом изэнэкъокъу шъхьаIэ спортсменхэр фэ­хьазырхэу къекIолIэнхэм ыкIи хэлэжьэнхэм тренер­хэм акIуачIэ рахьылIагъ. Мафэ къэс спортсменхэм сыхьат пчъагъэрэ загъэ-сагъ, зэнэкъокъу зэфэшъхьафхэм ахэлэжьагъэх. Ащ ишIуагъэкIэ апэрэу тикомандэ анахь дэгъуи 10-м ясатырэ хэфагъ. Къэгъэлъэ­гъон нахь дэгъум тыщыгугъыгъ, ау непэ ар къыддэхъугъэп. ТапэкIэ гъэхъэгъэшIухэр тшIынхэм фэшI Iоф зыдэтшIэжьыщт, —къа­Iуагъ командэм итренерхэм.

Медаль къыхьыным пэ­блэгъагъ тиспортсменэу Никита Солохиныр, ау ащ яплIэнэрэ чIыпIэр къыди­хыгъ. Тиспортсменхэм мыщ фэдэ гъэхъэгъэшIухэр ашIынхэм яIахьышIу хэлъ Урысыем изаслуженнэ тренерэу Нина Говорковам ыкIи ащ ыкъоу, спортымкIэ мастерэу Иван Говорковым.

ТиныбжьыкIэхэм опытэу аIэкIэлъ хъугъэм дакIоу, зэ­дегъэштэ есынымкIэ Олим­пиадэхэм гъогогъуи 7 текIоныгъэр къащыдэзыхыгъэ Светлана Ромашкинам IукIэнхэ ыкIи дэгущыIэнхэ амал яIагъ.