«Зэкъошныгъ» (Мыекъуапэ) — «Алания-2» (Владикавказ) — 1:0 (0:0).

ФутболымкIэ Урысыем ипервенствэ иятIонэрэ лигэ хэт командэхэм я 22-рэ турыр яIагъ. КIымэфэ зыгъэпсэфыгъо уахътэм ыуж «Зэкъошныгъэр» апэрэу Мыекъуапэ щешIагъ. Мы аужырэ лъэхъаным тикомандэ иешIакIэ хигъэхъуагъ, ащ ишыхьатэу «Алания-2» зэрэдешIэрэм еплъынхэу нэбгырэ миным ехъу республикэ стадионым къекIолIагъ.

Владикавказ икомандэ зэнэ­къокъум я 13-рэ чIыпIэр щиIыгъ нахь мышIэми, утекIоныр псын­кIэп. Ащ Пятигорскэ ыкIи станицэу Павловскэм ащыриIэгъэ зэIукIэгъухэм очкохэр къащихьыныр фызэшIокIыгъ.

ЗэIукIэгъум ия 67-рэ такъикъ Даниил Антоненкэм Iэгуаоу къыфидзыгъэр къэлъапчъэм дахэу дидзагъ Делэкъо Аскэр. Я 81-рэ такъикъым «Алания 2-м» пенальтикIэ пчъагъэр зэфэдиз ышIын амал иIагъ, ау ар зыгъэцэкIэгъэ Давид Хокришвили Iэгуаор къэлапчъэм дидзэн ылъэкIыгъэп. Адыгеим икомандэ текIоныгъэр къыдихыгъ ыкIи я 7-рэ чIыпIэм щыт, я 6-р зыIыгъым очкоуи 3-кIэ ыуж къенэ.

Апэрэ чIыпIи 7-р зыIыгъ командэхэр: 1. «Черноморец» — 53, 2. «Чайка» — 47, 3. «Ротор» — 44, 4. «Биолог-Новокубанск» — 42, 5. «Форте» — 37, 6. «Кубань-Холдинг» — 34, 7. «Зэкъошныгъ» — 31.

Зэнэкъокъур аухынкIэ командэхэм джыри ешIэгъу плIырыплI къафэнагъ. «Зэкъошныгъэр» мэлылъфэгъум и 15-м командэу «Легионым» Махачкала щыIу­кIэщт.