Урысыем ичемпионат ипэшIорыгъэшъ едзыгъо иятIонэрэ Iахь къыдыхэ­лъы­тэгъэ ешIэгъухэр шIэхэу аухыщтых. Адыгеим икомандэу «АГУ-Ады­ифым» ия 32-рэ зэIукIэгъу Мыекъуапэ щыкIуагъ, «Ставропольем» дешIагъ.

«АГУ-Адыиф» — «Ставрополье» — 23:26 (12:11).

ТикомандэкIэ Iэгуаор къэлап­чъэм дэзыдзагъэхэр: Дворцевая (5), Кириллова (4), Бондаренко (3), Вигуржинская (2), Куцевалова (1), Краснова (1).

Зэнэкъокъум пэрытныгъэ щызыIыгъ «Ставропольер» апэрэ таймым бысым командэм кIэхьаным пылъыгъ, ау апэрэ едзы­гъор Адыгеим ипшъашъэхэм къахьыгъ, пчъагъэр — 12:11.

ЯтIонэрэ таймым хьакIэхэм яешIакIэ нахь хагъэхъуагъ ыкIи я 37-рэ такъикъым ыпэ ишъы­гъэх. Мыщ ыуж зы такъикъ нахь темышIагъэу Татьяна Кирилловам карточкэ плъыжьыр къырагъэлъэгъуи, ешIапIэм къырагъэкIыгъ. Адыгеим икомандэ кIуачIэ къыз­хигъуати, пчъагъэр зэфэдиз ышIын ылъэкIыгъ. Ау кIэухым хьакIэхэр нахь лъэшыгъэх, текIоныгъэр къыдахыгъ.

«АГУ-Адыифыр» яплIэнэрэ чIыпIэм щыт. Тикомандэ мэхьанэшхо зиIэ ешIэгъуитIу иIэщт — мэлылъфэгъум и 15-м «Лучым» ыкIи мы мазэм и 23-м «Феникс» аIукIэщт.

Командэхэр зыдэщыт чIыпIэхэр ыкIи очко пчъагъэу рагъэкъугъэр

1. «Ставрополье» – 30, 2. «Университет» — 27, 3. «Феникс» — 21, 4. «АГУ-Адыиф» — 19, 5. «Луч» — 13, 6. «Балтийская заря» — 4.