Исп унэхэм афэгъэхьыгъ
Адыгэ къэралыгъо университетым нэрылъэгъум лъыпыдзэгъэ приложение щызэхагъэуцо, ар исп унэхэм афэгъэхьыгъ.
АКъУ-м ипресс-къулыкъу къызэрэщаIуагъэмкIэ, компьютернэ шIэныгъэхэмкIэ ыкIи хьисапымкIэ факультетым истудентхэу Виктория Свистуновамрэ Владислав Зюбэрэ чIыпIэ-чIыпIэу тэкъогъэ е зэщыкъогъэ исп унэхэм я 3D-модельхэр ашIых. Джырэ уахътэм приложением исп уни 8-м щыщэу 6-р хагъэхьагъ. Модель пэпчъ анимациехэр, картэхэр къешIэкIыгъэх, къэбар тхыгъэ кIэкIхэм, аудио мэкъамэхэм исп унэхэм яхъишъэ къаIуатэ.
— Модельхэр приложением щыщ шъыпкъэ хъущтых ыкIи бгъуитIукIэ уяплъын плъэкIынэу гъэпсыгъэщтых. QR-кодыр бгъэфедэмэ, нэрылъэгъум лъыпыдзагъэу моделыр къэлъэгъощт. Моделым иинагъэ хэбгъэхъони, зэпырыбгъэзэни плъэкIынэу ашIыгъ, ащ ишIуагъэкIэ нахь тэрэзэу къэпплъыхьэшъущт, — къыщаIотагъ АКъУ-м ипресс-къулыкъу. Приложением изэхэгъэуцон ыкIэм фэкIуагъ, фае пэпчъ ар шIэхэу ылъэгъун ылъэкIыщт.