Драматург цIэрыIом ипчыхьэзэхахьэ щыIэщт
Александр Островскэр къызыхъугъэр илъэс 200 зэрэхъурэм ехъулIэу литературнэ-музыкальнэ пчыхьэзэхахьэ мэлылъфэгъум и 6-м АР-м и Къэралыгъо филармоние щыкIощт. Я XIX-рэ лIэшIэгъум урыс драматургием, театральнэ искусствэм яуцун зиIахьышIу хэзышIыхьэгъэ, урыс лъэпкъ театрэр ылъэ тезыгъэуцогъэ Александр Островскэм ишIэжь агъэлъэпIэщт. Непэ къызнэсыгъэм мыщ идраматургие осэшхо фашIы, ащ ипьесэхэр жъы хъухэрэп, урыс лъэпкъым изэхашIэ, идунэететыкIэ къыраIотыкIы. Драматург цIэрыIом ищыIэныгъэ гъогу пчыхьэзэхахьэм къекIолIагъэхэр нэIуасэ фэхъущтых, ипроизведениехэм ятарихъ зэхахыщт. Лекциер композиторхэм ямузыкальнэ композициехэмкIэ гъэбаигъэщт, я XIX-рэ лIэшIэгъум иурыс драматургие нахь пэблагъэ фэхъущтых. М. Глинка, А. Даргомыжскэм, Н. Римский-Корсаковым, С. Рахманиновым, Э. Григ, А. Рубенштейн япроизведениехэр пчыхьэзэхахьэм щыIущтых. Билетхэр АР-м и Къэралыгъо филармоние исайтэу filarmoniya-ra.ru зыфиIорэм ыкIи «Пушкинскэ картэм» ипрограммэкIэ зэбгъэгъотынхэ плъэкIыщт.