Тамрико Осадзе: «Адыгабзэр сицIыкIугъом щегъэжьагъэу зэзгъэшIагъ»
Тимылъэпкъэгъоу адыгабзэр зышIэхэрэм лъытэныгъэ афэсэшIы. Ар хэгъэкIи, сиIахьыл-благъэхэм афэдэу сяплъы. Непэ ащ фэдэу нэIуасэ шъузфэтшIыщтыр АР-м и Лъэпкъ театрэ иактрисэу Тамрико Осадзе. Актер сэнэхьатым Москва щыфеджагъ, Мыекъуапэ къызегъэзэжьым, адыгабзэр зэришIэрэм ишIуагъэкIэ Адыгэ театрэм аштагъ, адыгабзэм рылажьэзэ лъэпкъ искусствэм ищыIэныгъэ рипхыгъ.
Е. Вахтанговым ыцIэ зыхьырэ академическэ театрэм хэтэу Б.Щукиным ыцIэ зыхьырэ театральнэ институтэу Москва дэтыр Тамрико къыухыгъ. ИлъэсиплIырэ ащ щеджагъ. ГъэрекIо Мыекъуапэ къызэрэкIожьыгъэм тетэу АР-м и Лъэпкъ театрэ Iоф щишIэнэу ригъэжьагъ. Хъурмэ Хъусен ипьесэ техыгъэ спектаклэу «Гощэмыдэ инысэхэдакIэ» Рузанэ ироль къыщишIыгъ. Мамый Ерэджыбэ ипьесэ техыгъэу «Псэлъыхъохэр» зыфиIорэ къэгъэлъэгъонэу ныбжьыкIэ артист купым къышIырэм Сусанэ ироль къыщыфагъэшъошагъ ыкIи ар хьалэмэтэу ыгъэцэкIагъ. Лъэпкъ театрэм иартист ныбжьыкIэу исэнаущыгъэкIэ къахэщырэр редакцием къедгъэблэгъагъ ыкIи гущыIэгъу тыфэхъугъ.
— Тамрико, адыгабзэр сыдэущтэу зэбгъэшIэнэу хъугъа? О ухъурц (грузин лъэпкъ) нахь мышIэми, тиныдэлъфыбзэ къабзэу урэгущыIэ. Хэта озыгъэшIагъэр?
— ТиунагъокIэ илъэс 20-м къехъугъэу Джыракъые тыщэпсэу. Сянэрэ сятэрэ сшыпхъу нахьыжъи ягъусэу Грузием къызекIыжьхэм, Адыгеир псэупIэкIэ къыхахи, сэ мыщ сыкъыщыхъугъ. Джыракъые еджапIэм сыщеджагъ, адыгабзэмкIэ а уахътэм сикIэлэегъэджагъэр Къэгъэзэжь Сариет. УблэпIэ классхэр къызысэухым упчIэ къэуцугъагъ: еджапIэр къаухыфэ адыгабзэр зэзыгъашIэхэрэм сахэтыщта, хьауми адыгабзэр зэзымыгъэшIэжьыхэрэм (урыс классхэм афэдэу) сахэтIысхьажьыщта? ЕджапIэр къэсэухыфэ адыгабзэр зэзыгъэшIэщтхэм сахэтынэу сэр-сэрэу къыхэсхыгъагъ, — IугушIукIызэ Тамрико къеIуатэ, къыIорэр зэрэтигуапэри къелъэгъу.
— Адэ грузиныбзэр ошIа?
— СэшIэ. Тиунагъо грузиныбзэкIэ щэгущыIэх. Сятэ — Хвича Анзориевич Кутаиси къыщыхъугъ, сянэ — Лия Романовнар Грузием и Зестафонскэ район зыщыщыр. Сшыпхъу нахьыжъэу Хатунэ ныдэлъфы-бзэр ешIэ. Грузиныбзэмрэ адыгабзэмрэ амакъэхэр тIэкIу зыщызэтехьэхэрэри щыIэх, ау ятхыкIэ зэтекIы, хьарыфылъэхэр зэфэшъхьаф шъыпкъэх. Сэ адыгабзэр спэблагъэ хъунымкIэ зишIогъэшхо къэкIуагъэр адыгэ чылэ тиунагъо зэрэдэсыр, адыгэхэм тызэрахэтыр, тызэрадэпсэурэр ары.
Илъэс 22-рэ нахь зымыныбжь пшъэшъэжъыеу сапашъхьэ исым сшIогъэшIэгъонэу сеплъы. Ынэ уцышъохэм гушIор акIэлъ, гушIубзыу, нэутх, псынкIэу къэгущыIэ, зэIухыгъэ дэд.
— Актер сэнэхьатыр сыдэущтэу къыхэпхынэу хъугъа?
— СицIыкIугъом щегъэжьагъэу а сэнэхьатым сыфэщэгъагъ. Къашъохэр, орэдхэр, драматическэ кружокыр сыгу рихьыщтыгъэх. Чылэ клубым сычIэкIыщтыгъэп. ЗызгъэджэгукIынышъ ыуж сикIыжьыщтэу сянэ къышIошIыщтыгъ. Врач сыхъунэу фэягъ. ТилъэпкъкIэ актер зыпари тхэтэп. Сятэ —псэолъэшI, сянэ — дакIо, сшыпхъуи экономистэу еджагъ. Сэ джащ фэдэу сакъыхэкIыгъ, — Тамрико мэщхы. — ЕджапIэр къэтыухы зэхъум Москва къикIыгъэ мастер-театралхэу Владимир Сажиныр ыкIи Валерий Маркиныр Мыекъуапэ къэкIуагъэхэу ныбжьыкIэхэм ахаплъэщтыгъэх, сэнаущыгъэ зыхэлъхэр къыхахыщтыгъэх. Ар зысэшIэм, сэри зязгъэуплъэкIунэу сыкIуагъ.
— Сыд укъызэджагъэр, къафэбгъэлъэгъуагъэр, къэошIэжьа?
— Орэдэу «Катюшэ» къафэсIуагъ, И. Крыловым ибаснэу «Осел и соловей» сыкъеджагъ, Э.Асадовым иусэу «Я в глазах твоих утону, можно?» зыфиIорэри езбырэу къэсIуагъ. ЗэкIэ къекIолIагъэхэм мэфитIурэ ахэдагъэх. Бэгъушъэ Бэллэрэ сэрырэ Щукинскэ институтым ипроректорэу Татьяна Поливановам такъыхихыгъ. Чылэм сымыкIожьэу сянэ телефонкIэ сыфытеуи, сызэрэпхырыкIыгъэр зешIэм, ар ащ фэдэу хъуным ежэгъахэп, ыгъэшIэгъуагъ. Москва тыкIуи илъэсиплIырэ «Щукэм» сыщеджагъ.
— Сыд фэдагъа а илъэсхэр, сыд пшIогъэшIэгъонэу угу къэкIыжьырэр? Еджэным ыуж Москва укъыдэнэнэу уфэягъэба?
— СыкIо зэхъуми сыкъызэрэкIожьыщтыр сшIэщтыгъэ, — Тамрико мэщхы. — Сэнэхьатым тызэрэфагъасэщтыгъэм имызакъоу, модель фэдэу Iоф сшIагъэ, кинохэм ятехын, театрэхэм якъэгъэлъэгъонхэм тахэлажьэщтыгъ. «Театр современной драмы» сыщылэжьагъ. КIэлэцIыкIухэм апае къэгъэлъэгъонхэр — «Гадкий я», «Белоснежка и 7 гномов» згъэуцугъэх. ГъэшIэгъонэу а уахътэр кIуагъэ. Бурят, абхъаз, азербайджан лъэпкъ студиехэр «Щукэм» щызэхэщэгъагъэх. Адыгэ студиемкIэ нэбгырищ ныIэп тызэрэхъущтыгъэр — сэры, Бэгъушъэ Бэлл ыкIи Баксан, Къэбэртэе-Бэлъкъарым щыщэу Бэгъ Джамболэт. Бэллэ Москва къыдэнагъ, Джамболэт Архангельскэ кIуагъэ, сэ Мыекъуапэ къэзгъэзэжьыгъ. Шъыпкъэ, «Театр современной драмы» ипащэу Артем Даниным сыкъыгъэнэнэу фэягъ, ащ сыщылажьэ шIоигъуагъ. Сэ теубытагъэ хэлъэу сыкъэкIожьыгъ. 2022-рэ илъэсым иIоныгъо мазэ къыщыублагъэу АР-м и Лъэпкъ театрэ иактрисэу Iоф сэшIэ.
— Iоф зыпшIэрэм къыкIоцI ролитIу къэпшIыгъ. «Псэлъыхъохэм» ахэт Сусанэм ироль къызыошI ужым артист жъогъо купым уахэттхагъ, — Тамрико зэригуапэр къыхэщэу IугушIукIыгъ.
— Сыщынагъ артист нахьыжъхэм ауж а спектаклым щыщ ролыр къэсшIынэу. Сиадыгабзэп сызфэщынагъэр. Ежь Сусанэ иролэу къысфагъэшъошагъэр къэзэрэздэхъущтым тIэкIу сигъэпагъ. Артист нахьыжъхэм къызэрашIырэмрэ нахьыкIэхэм къызэрагъэлъагъорэмрэ зэрэзэрагъэпшэщтыр сшIагъэ. Шыхьамрэ Сусанэрэ азыфагу илъ зэхашIэм ышъхьэ къызырахыкIэ, сыд джыри ахэр сценэм щызэIукIэхэ къэс къыщыбгъэлъэгъон фаер? Мы упчIэм сигъэгумэкIыщтыгъ. «Ежь ролым щыпсэу, «живи», уикIуачIэ хэплъхьан фае!» — къысиIуагъ Кукэнэ Мурат. Ащ ыуж ролым сыхэхьагъ, зэхэсшIагъ. Тэхъутэмыкъуайи, Псэйтыкуи «Псэлъыхъохэр» къащыдгъэлъэгъуагъэх. Премьерэ шъхьаIэр Мыекъуапэ щыкIуагъ. ЦIыфхэр бэу къекIолIагъэх, ау къэгъэлъэгъуапIэхэр зэфэшъхьафыгъэх. Мыекъуапэ къыщыдгъэлъэгъуагъэр, кIуачIэу хэслъхьагъэмкIэ нахь зэхэсшIэнэу хъугъэ. Мы спектаклыр комедиеу щыт нахь мышIэми, еплъыхэ хъумэ цIыфхэр зыгорэм ригъэгупшысэнхэу сыфэягъ. Шыхьам Сусанэ ыгъапцIэ фэдэу къыщыхъоу чIыпIэу къызщыхафэрэм, «Адэ, сыда джы сшIэщтыр?» ыбжымхэр зэкIилъхьэзэ ыгу еIэжьэу къеIо. Къысэплъыхэрэм мо пшъэшъэ цIыкIум иобразэу къэсшIырэм агу фэгъунэу, ащымыгъупшэнэу, «тхьамыкIэ цIыкIу, ишъыпкъэу ыгу еIэжьыгъ» аIонэу сыфэягъ. Джащ фэдэуи ролыр къэсшIыгъэу къысшIошIы.
— Сусанэ ироль къыбдэхъугъэкIэ усэгъэгугъэ. Тамрико пцIэр шъхьае, СусанэкIэ сыкъыуаджэ сшIоигъоу зысэIажэ (Тамрико мэщхы). О къпшIырэ Сусанэр нэмыкI шъыпкъэу хъугъэ, сыда пIомэ пьесэм хэтыгъэ монологхэр, Шыхьамрэ орырэ шъуизэдэгущыIэгъухэр зэрэщытым тетэу, мыгъэкIэкIыгъэхэу зэкIэри къэгъэлъэгъоным хагъэхьажьыгъ. Пшъэшъэ ныбжьыкIэм игухэкI, игукъао, шIу ылъэгъурэм къыгъапцIэу зэрэшIошIыгъэм, гумэхагъэр нахь къыхэщэу — а зэпстэум якъэгъэлъэгъон хьалэмэтэу къыбдэхъугъ, къыоплъырэм укъыухъумэ шIоигъоу къэпшIышъугъ.
— Ары, «Псэлъыхъохэм» ахэт ныбжьыкIэ артистхэмкIэ зы бын-унагъо тыхъугъэм фэдэу тызэхэт. Тхьаегъэпсэух мы ролыр къызэрэсфагъэшъошагъэмкIэ, сигопэ дэд. Типащэу Ацумыжъ Рустами Хьачик ироль къышIэу къыддыхэтба. «Спектаклым сыхэт зыхъукIэ сышъуитхьаматэп, шъощ сыфэдэу сценэм сыкъыжъудытет», — еIо. «Псэлъыхъохэр» къэзышIыгъэ купымкIэ джыри къэгъэлъэгъон горэм тыхэлэжьагъэемэ дэгъугъэ. ЗэгурыIожь куп тыхъугъэу зэхэсэшIэ.
— Тамрико, уигухэлъхэр Тхьэм къыбдегъэхъух! Роль гъэшIэгъоныбэ Лъэпкъ театрэм къыщыпшIынэу пфэтэIо!
— Тхьашъуегъэпсэу.
Тэу Замир.