ВолейболымкIэ Мыекъуапэ изэIухыгъэ чемпионат къыдыхэлъытэгъэ зичэзыу ешIэгъухэр щыIагъэх. Шъугу къэдгъэкIыжьын, мыщ бзылъфыгъэ ыкIи хъулъфыгъэ командэхэр хэлажьэх, зэкIэмкIи ахэр 26-рэ мэхъу.

Адыгэ къэралыгъо университетым испортзал непэ ешIэгъуи 5 щыкIощт, хъулъфыгъэ командэхэр арых зэIукIэщтхэр. «Айсберг» ыкIи «Фыщт иветеранхэр» яешIэгъу пчэдыжьым сыхьатыр 11-м рагъэжьэщт. Ащ ыуж ешIэщтых: «СШОР-1 (2008)» — «Фыщт», «АГУ-Мары» — «К-2», «Дружина» — «АГУ-Майкоп», «СШОР-1-(2007)» — «Газпром».

Бзылъфыгъэ командэхэм яешIэгъухэр тхьаумафэм кIощтых. БлэкIыгъэ зыгъэпсэфыгъо мафэхэм зэIукIэгъоу яIагъэхэр къахьыгъэх «МГТУ-м» ыкIи «Адыгеим». ЯтIонэрэ лигэм хахьэхэрэм нахь къахэщыгъэр Мыекъопэ районым икомандэу «Олимп» зыфиIорэр ары.