Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» (ГТО) зыфиIорэм итхьамафэ изэфэхьысыжьхэр ашIыгъэх.

Комплексым ибгъэхэлъхьэ шъхьаIэ нэ­бгырэ 50-мэ афагъэшъошагъ. Мыекъуапэ физическэ культурэмкIэ ыкIи спортымкIэ и Комитет кIэщакIо зыфэхъугъэ Iофтхьабзэр яплIэнэрэу рагъэкIокIыгъ ыкIи фаехэр зэкIэ ащ хэлэжьагъэх.

Мыекъуапэ ыкIи гъунэгъу къалэу Шытхьалэ ащыпсэурэ нэбгырэ 60-мэ заушэтыгъ. Ахэм ащыщэу нэбгырипшIыр ары ныIэп шапхъэхэр зымытышъугъэхэр.

Зызыушэтыгъэхэм азыныкъо нахьыбэр гурыт еджапIэхэм яапшъэрэ классхэм ащеджэх. Хабзэ зэрэхъугъэу, зэхэщакIохэм анахьэу анаIэ зытырагъэтыгъэр кIэлэ­еджакIохэр ары, сыда пIомэ мыхэм физическэ ухьазырыныгъэу яIэм елъытыгъэу апшъэрэ ыкIи гурыт сэнэхьат зыщарагъэ­гъотырэ еджапIэхэм ачIэхьанхэмкIэ балл тедзэхэр къахьынхэ алъэкIыщт. КIэлэ Iэта­хъохэм дэгъоу зыкъагъэлъэгъуагъ ыкIи шапхъэхэр зэрифэшъуашэу атыгъэх.

Урысые физкультурэ-спорт комплексэу «IофшIэным ыкIи зыкъэухъумэжьыным са­фэхьазыр» (ГТО) зыфиIорэм итхьамафэ къы­дыхэлъытагъэу ащ хэлэжьагъэхэм спорт лъэпкъ зэфэшъхьафхэмкIэ заушэтыгъ.

Мыекъуапэ физическэ культурэмкIэ ыкIи спортымкIэ и Комитет къызэрэщаIуагъэмкIэ, къыкIэлъыкIощт мыщ фэдэ Iофтхьабзэр мэлылъфэгъум и 24-м щегъэжьагъэу и 30-м нэс рагъэкIокIыщт.

БЗЭШIУ Асхьад.