Кушъхьэфэчъэ спортымкIэ мы илъэсым телъытэгъэ Урысые зэнэкъокъухэр Адыгеим иавто­мобиль гъогоу «Кужорскэр —Дондуковскэр» зыфиIорэм къы­­щызэIуахыгъэх.

Спортсменкэ анахь лъэшхэм километри 100, зыныбжь имыкъугъэ пшъашъэхэм кило­метрэ 75-рэ къачъын фэягъ.

Iофтхьабзэм хэлажьэхэрэм шIуфэс гущы­IэхэмкIэ закъыфигъэзагъ Адыгеим кушъхьэ­фэчъэ спортымкIэ и Федерацие ипрезидентэу Анатолий Лелюк. Къызэдэчъэныр гъэшIэгъонэу кIуагъэ, тефагъэхэри къахэкIы-гъэх. Анахь дэгъоу зыкъэзыгъэлъэгъуагъэхэр Белоруссием, джащ фэдэу Санкт-Пе­тербург ыкIи Москва къарыкIыгъэхэр ары.

Зыныбжь имыкъугъэ пшъашъэхэм язэнэ­къокъу текIоныгъэр къыщыдихыгъ Москва илIыкIоу Татьяна Мальковам, хагъэунэфыкIырэ чIыпIэхэр къыдахыгъэх Диана Смирновам (Санкт-Петербург) ыкIи Людмила Мучкаевам (Петергоф).

Бзылъфыгъэхэм якъызэдэчъэн текIоны­гъэр къыщыдихыгъ Анна Терех (Белорус­сиер), мы къэралыгъо дэдэм щыщ Ирина Чуянковар ятIонэрэ хъугъэ, Адыгеим испорт­сменкэу Елизавета Арчибасовам ящэнэрэ чIыпIэр къыдихыгъ.

Апэрэ мафэм изэфэхьысыжьхэр къы­шIыгъэх зэнэкъокъухэм ясудья шъхьаIэу Екатерина Поповам (Воронеж): — 2023-рэ илъэсымкIэ апэрэ къызэдэ­чъэгъур зэрэщыIагъэм фэшI пстэуми сафэгушIо. Мы мафэхэм ом изытет дэгъугъэ. Тикъэралыгъо ишъолъыр 14-мэ ыкIи Белоруссием къарыкIыгъэ спортсменкэ 79-мэ заушэтыгъ. Ахэм зэрифэшъуашэу зыкъагъэ­лъэгъуагъ, километри 100 хъурэ гъогур сы­хьати 2-рэ такъикъ 40-кIэ къачъыгъ. ТапэкIэ зэхэтщэщт зэнэкъокъухэм гъэхъэгъэшIухэр щашIынхэу спортсменкэхэм афэсэIо!

Мыщ ыуж республикэм изэIухыгъэ первен­ствэ хэлэжьэрэ кIалэхэр зэнэкъокъугъэх. Адыгеим испортсменхэм адакIоу, Краснодар краим, Новосибирскэ ыкIи Самарскэ хэку­хэм ялIыкIохэм зэнэкъокъум зыщаушэтыгъ.

Мэфэ пчъагъэм телъытэгъэ Iофтхьабзэр тренерэу А. Г. Васильевым ишIэжь фэгъэ­хьыгъагъ. Ащ 2007 — 2008-рэ ыкIи 2009 — 2010-рэ илъэсхэм къэхъугъэ Iэтахъохэр хэлэжьагъэх. Адыгеим щыщ Вадим Ларичевым текIоныгъэр къыдихыгъ, Самарскэ хэкур къэзыгъэлъэгъогъэ Назар Сорочайкиныр ятIонэрэ хъугъэ, тиреспубликэ илIыкIоу Сергей Вороновым ящэнэрэ чIыпIэр фагъэшъошагъ.

ЯтIонэрэ купым текIоныгъэр къыщыдихыгъ Антон Гаммершмидт (Самара), Ады­геим испортсменэу Святослав Харченкэр ятIонэрэ хъугъэ, Самарскэ хэкум илIыкIоу Марат Субеевым ящэнэрэ чIыпIэр къыдихыгъ.