ИIофшIагъэкIэ къылэжьыгъ
АР-м и Лъэпкъ театрэу Цэй Ибрахьимэ ыцIэ зыхьырэм иартист цIэрыIоу, Урысыем итеатральнэ IофышIэхэм я Союз исекретарэу ыкIи ишъолъыр къутамэ ипащэу Зыхьэ Заурбый театральнэ искусствэм ихэхъоныгъэ гъэхъэгъэшIухэр зэрэщишIыгъэхэм пае «УФ-м инароднэ артист» зыфиIорэ щытхъуцIэр къыфагъэшъошагъ. Ащ фэгъэхьыгъэ унашъом УФ-м и Президентэу Владимир Путиныр кIэтхэжьыгъ.
Зыхьэ Заурбый щытхъуцIэ лъапIэу къыфагъэшъошагъэм пае АР-м и ЛIышъхьэу КъумпIыл Мурат къыфэгушIуагъ: «ИсэнэхьаткIэ гъэсэныгъэ дэгъу зэриIэм, сэнаущыгъэу ыкIи кIуачIэу хэлъхэм, театральнэ искусствэм илъэсыбэрэ зэрэфэлажьэрэм, Адыгэ театрэм ихахъо фэшъыпкъэу Iоф зэрэдишIэрэм Зыхьэ Заурбый зыпарэкIи пхъожьын умылъэкIынэу, лъэпкъым иартист шъыпкъэу ешIы. Щэч хэлъэп, щытхъуцIэ лъапIэу къыфагъэшъошагъэр ащ къылэжьыгъ.
Зыхьэ Заурбый ыцIэ тиреспубликэ игъунапкъэмэ аблэкIыгъэу къэралыгъом щызэлъашIэ. Пщыгъупшэн умылъэкIыщт роль пшIы пчъагъэу театрэми, киноми къащишIыгъэхэм ащ ыцIэ япхыгъ. Дон-Кихот иролькIэ ащ иактерскэ IофшIэн ыублэгъагъ. ЦIыф зэфыщытыкIэ дахэхэм яухъумакIоу ахэр сценэм къыщегъэлъагъох. Урыс ыкIи дунэе классикэм, джырэ ыкIи адыгэ лъэпкъ драматургием япьесэхэмкIэ ащ роль 200 фэдиз къэгъэлъэгъонхэм къащишIыгъ.
Артист ныбжьыкIэхэм ягъэсэнкIэ кIэлэегъэджэ IофшIэнэу зэшIуихырэр ыкIи Урысыем итеатральнэ IофышIэхэм яреспубликэ къутамэ пэщэныгъэу дызэрихьэрэр хэгъэунэфыкIыгъэнхэ фае. Урысыем итеатральнэ IофышIэхэм я Союз исекретарэу щытзэ, Урысыем и Къыблэ театральнэ искусствэм щыхэхъоным ащ иIахьышIу хилъхьагъ.
Артистыр шIу зылъэгъухэрэр непи иIофшIагъэхэм ащэгушIукIых. Лъэпкъ театрэм иартист пэрытхэм ясатырэ Зыхьэ Заурбый джыри хэт.
Псауныгъэ пытэрэ щыIэкIэшIурэ иIэнхэу, рихъухьэрэ пстэури къыдэхъунэу ыкIи ролыкIэхэр къышIынхэу Зыхьэ Заурбый фэсэIо!» — къащитхыгъ КъумпIыл Мурат исоциальнэ нэкIубгъохэм.