Адыгеим и ЛIышъхьэу КъумпIыл Мурат ком­позиторэу Артем Пысь ригъэблэгъагъ.

Проектэу «Антология адыгской симфонической музыки 1922 — 2022 годов» зыфиIорэм иапэ­рэ кIэуххэр ащ къыри­хьылIагъэх.

Адыгэ Республикэм къэралыгъо гъэпсыкIэ иIэ зыхъугъэм ия 100-рэ илъэс тегъэпсыхьагъэу а проектыр щыт. Илъэси 5-кIэ узэкIэIэбэжьмэ проектым Iоф дашIэу рагъэжьагъ ыкIи республикэм и ЛIышъхьэ ащ дыригъэштэгъагъ. Адыгэ лъэпкъ фольклорыр ылъапсэу щыт, макIэу узIукIэжьырэ произведениехэм якъэгъотынрэ язэхэфынрэ ащ къыхеубытэх. Мы гухэлъыр гъэцэкIагъэ хъуным пае Артем Пысь оперэмрэ балетымрэкIэ театрэу Пермь дэтым ипащэу Анзэрэкъо Долэт игъусэу илъэсищрэ Москва, Санкт-Петербург, Мыекъуапэ ятхылъеджапIэхэм ыкIи яунэе хъарзынэщхэм Iоф ащашIагъ. Ащ ишIуагъэкIэ мэкъэмэ зэфэшъхьафхэм янотэхэр къагъотыжьынхэ ыкIи зыпкъ рагъэуцожьынхэ алъэкIыгъ.

Культурэм IэпыIэгъу фэхъурэ Президент фондым ишIуагъэкIэ зигугъу къэтшIырэ «Антологием» иапэрэ Iахь тетхагъэ хъугъэ. Ар дискитIоу зэхэт. Адыгеим къэралыгъо гъэпсыкIэ иIэ зы­хъугъэм ия 100-рэ илъэс те­гъэпсыхьагъэу ахэр къыда­гъэкIыгъэх. Композиторым апэрэ компакт-дискхэу къыдагъэкIыгъэхэм ащыщ Адыгэ Республикэм и ЛIышъхьэ шIу­хьафтынэу къыритыгъ.

Артем Пысь къызэриIота­гъэмкIэ, Н. А. Римский-Корсаковым ыцIэкIэ щыт консерваториеу Санкт-Петербург дэтым исимфоническэ оркестрэ дэлажьэхэзэ, профессиональнэ академическэ музыкэм тегъэ­псыхьагъэу бэ тыратхэн алъэ­кIыгъэр. Сыхьатрэ ныкъорэм къыкIоцI узэдэIун плъэкIыщт компакт-дискым произведение 20 фэдиз тет, ахэм янахьыбэр тапэкIэ зыпарэкIи къырагъэIуа­гъэп. 1922-рэ илъэсым къы­щыублагъэу 1968-рэ илъэсым нэс ахэм къызэлъаубыты.

«Мы IофшIэныр едгъэжьэн зэхъум фондхэм тетхэгъэ мэкъамэу ачIэлъхэр дгъэфедагъэх, джащ фэдэу зэкIэлъыкIокIэ гъэнэфагъэ иIэу композиторхэм алъэкъуацIэхэр ттхыгъэх. ­Адыгэ музыкальнэ культурэм апэу зы­фэзыгъэзагъэхэр, орэд-къэшъо мэкъамэхэм атетэу, фольклорыр ылъапсэу усэхэр зэхэзылъхьан зылъэкIыщтыгъэхэр арых зызфэдгъэзагъэхэр», — къыIуагъ Артем Пысь.

Адыгеим и ЛIышъхьэ къыхигъэщыгъ республикэм иакадемическэ музыкальнэ кIэн епхы­гъэ ушэтынэу ашIыгъэм мэхьанэшхо зэриIэр, Адыгеим иискусствэ къэухъумэгъэнымкIэ ыкIи хэхъоныгъэ егъэшIыгъэнымкIэ а IофшIагъэм кIэух дэ­гъу зэрэфэхъугъэр. Ащ дакIоу КъумпIыл Мурат Адыгеим къэралыгъо гъэпсыкIэ иIэ зыхъугъэм ия 100-рэ илъэс епхыгъэ юбилей медалэу къыдагъэкIыгъэр Артем Пысь ритыгъ.

«Тиреспубликэ икультурэ кIэн бай къэухъумэгъэнымкIэ мы про­ектым мэхьанэшхо иIэу щыт. Адыгэ музыкальнэ культурэм итарихъ инэкIубгъохэу зыщымыгъозэгъагъэхэр зыпкъ игъэуцожьыгъэнхэр лъэпкъымкIэ анахь мэхьанэшхо зиIэ IофшIагъэхэм ащыщ. Ушэтын IофшIэнэу жъугъэцакIэрэм тапэкIи гъэхъа­гъэхэр щышъушIынхэу шъуфэсэIо. ЦIыф жъугъэхэм компакт­дискхэр аIэкIэхьанхэм иамал щыIэнми мэхьэнэ гъэнэфагъэ иIэу щыт, цIыфэу зышIоигъо пэпчъ лъэпкъ академическэ мэ­къамэхэм якъежьапIэхэм нэ­Iуасэ зафишIын ылъэкIын, къыткIэхъухьэхэрэм ахэр алъы­гъэIэсыжьыгъэнхэм хэти ынаIэ тыригъэтын фае», — къыхи­гъэщыгъ КъумпIыл Мурат.

Мы лъэхъэнэ благъэхэм проектым илъэтегъэуцо Мыекъуапэ щыкIощт. Зыпкъ рагъэуцожьыгъэ ыкIи тыратхэжьыгъэ мэкъамэхэр проектым исайт непи ижъугъо­тэнхэ шъулъэкIыщт.

АР-м и ЛIышъхьэ ипресс-къулыкъу