«Кубань-Холдинг» (станицэу Павловскэр) – «Зэкъошныгъ» (Мыекъуапэ) – 0:0.

Командэхэр текIоныгъэм фэбэнагъэх нахь мышIэми, ешIэгъур зыми ыхьын ылъэкIыгъэп.

— ТэркIи, тыздешIэгъэ командэмкIи ешIэгъур хьылъэу кIуагъэ. Непэ зы очко къыттефэу къэтхьыгъ, сыда пIомэ «Кубань-Холдингыр» командэ анахь лъэшхэм ащыщ, футболист дэгъухэр хэтых, удешIэнкIэ сыдигъуи гъэшIэгъоны ыкIи къины, — къыIуагъ «Зэкъошныгъэм» итренер шъхьаIэу Беслан Аджинджал.

ДэкIыгъо ешIэгъуищэу тикомандэ иIагъэм очкоуи 7 къащихьыгъ, икъэлапчъэ Iэгуаор зыкIи къыдаригъэдзагъэп. Непэрэ мафэм ехъулIэу очко 28-рэ ригъэкъугъ ыкIи яблэнэрэ чIыпIэр дегощы «СКА» (Ростов-на-Дону).

ЯтIонэрэ лигэм иапэрэ куп хэт командэхэм къахэщырэр ыкIи очко анахьыбэ изыгъэкъугъэр «Черноморец» (Новороссийск). КIымэфэ зыгъэпсэфыгъом ыуж «Зэкъошныгъэм» республикэм икъэлэ шъхьаIэ апэрэ ешIэгъу щыриIэщт, «Алания-2-м» мэлылъфэгъум и 1-м IукIэщт. Зэнэкъокъур аухынкIэ командэхэм ешIэгъуитф къафэнагъ.