Мамый Ерэджыбэ ипьесэкIэ агъэу­цугъэ спектаклэу «Псэлъыхъохэр» Лъэпкъ театрэм иныбжьыкIэ ак­термэ къашIэу блэкIыгъэ шэмбэ­тым Мыекъуапэ апэрэу къыщагъэ­лъэгъуагъ.

Театрэм икъэгъэлъэгъуа­пIэ чIыпIэ нэкI имыIэжьэу, Мыекъуапэ имызакъоу, районхэм къарыкIыгъэхэри къэгъэлъэгъоныкIэм еплъын­хэу къекIолIэгъа­гъэх. Пьесэм хэт рольхэр къэзышIыгъэхэу Хьапапэрэ Хьачикрэ — Хьакъуй Андзауррэ Ацумыжъ Рус­там­рэ, Сусанэрэ Шыхьамрэ — Тамрико Осадзе ыкIи Хьаудэкъо Азэмат, Дэнэ­Iапэрэ Хьарунэрэ — Хьэлащтэ Саниетрэ Ахъмэт Артуррэ, Насыпхъанрэ Шыупащэрэ — Болэкъо Адамрэ Болэкъо Аминэтрэ зыфэдэ къэмыхъугъэ зэдэштэныгъэрэ гурыIуакIэрэ къагъэлъэгъуагъ. Нэбгырэ пэпчъ ироль къызпкъыри­хызэ, залым чIэсхэр къагъэлъагъорэм хащэнхэ алъэкIыгъ. Iэгутеорэ зэдиштэрэ щхы макъэрэ къэгъэлъэгъоныр мэкIофэ залым щыIущтыгъэх, теат­рэм а пчыхьэм къэкIуа­гъэхэм гухахъорэ тхъагъо­рэ хагъуатэу спектаклым еплъыгъэх.

Къэгъэлъэгъоным ыкIэм артистэу ащ хэлэжьагъэ­хэм къэгъагъ Iэрамхэр аратыгъэх. Артист на­хьыжъ­хэу мы спектаклым рольхэр къыщызышIыщтыгъэхэу Зыхьэ Заур, Кукэнэ Мурат, Зыхьэ Мэлайчэт, Кушъу Светланэ, Хьатхьа­кIумэ Аскэрбый, Даур Жаннэ, Бэгъушъэ Анзор сценэм къыдащэягъэх —къэгъэлъэгъоныр мэкIофэ залым чIэсхэу ахэр къяплъыщтыгъэх.

Пстэуми апэу УФ-м иза­служеннэ артистэу Зыхьэ Заур гущыIэр ра­тыгъ. Артист ныбжьыкIэхэу ачIыпIэ иуцуагъэхэм ар къафэгушIуагъ, къэгъэлъэгъоныр къадэхъугъэу зэрилъытэрэр хигъэунэфыкIыгъ. Лъэпкъ театрэм иха­бзэхэр зэрэлъыкIуатэ­хэрэм, нахьыжъхэм ачIыпIэ ныбжьыкIэхэр дахэу къызэриуцохэрэм, ащ фэ­дэу лъыкIотэн зэрэфаем игугъу къышIыгъ. КъэгъэлъэгъоныкIэр ныбжьыкIэ­хэм адэзгъэуцугъэу, УФ-м инароднэ артистэу Кукэнэ Мурат игуапэу щытхъу гущыIэхэм къапидзэжьыгъ. Артист нахьыжъхэм хэз ямыIэу спектаклэу къашIыщтыгъэр нахь ныбжьыкIэхэм афагъэшъуаши, ар агъэуцужьи къызэралъэ­гъужьыгъэмкIэ пстэуми къафэгушIуагъ. ЦIыфыгъэ дахэр, гуфэбэныгъэр, зэфыщытыкIэ шъыпкъэхэр зылъапсэу Мамый Ерэджыбэ ипьесэу «Псэлъыхъо­хэр» сыд фэдэрэ уахътэми къекIоу, мэхьэнэ куу иIэу, цIыфхэм агу ыштэу, шIу алъэгъоу, лъэпкъ драматургием иклассикэу зэрэщытыр хигъэунэфыкIыгъ. Артист купэу ар джы къэ­зыгъэлъэгъощтым «гъогумаф» риIуагъ.

КIэухым АР-м итеатральнэ объединение ипащэу Ацумыжъ Рустам гущыIэр ыштагъ. «Псэлъыхъохэр» зэрагъэуцужьыгъэм фэдэу, пстэуми шIу алъэгъурэ къэгъэлъэгъонхэу Лъэпкъ театрэм ихъарзынэщ хэхьагъэхэу «Дэхэбаринэ ихьакIэщ» (ари Мамый Ерэджыбэ ипьесэ техыгъ) ыкIи «Сы­шъолъэIу, сыжъугъэтIы­лъыжь» (Къуекъо Нальбый ипьесэ техыгъ) зыфиIохэ­рэр агъэуцужьынхэ зэрямурадыр ащ къыIуагъ. Ащ нэмыкIэу К. Райкиным ыцIэ зыхьырэ театральнэ еджапIэу Москва дэтым АР-м и ЛIышъхьэ иIэпыIэгъу хэ­тэу Адыгеим иныбжьыкIэ куп щырагъэджэнымкIэ амалхэр щыIэ зэрэ­хъугъэр Ацумыжъ Рустам къыIуагъ. Ащ пае актер сэнаущыгъэ зыхэлъ ныбжьыкIэхэм якъыхэгъэщын ежь театральнэ объединением ипащэ ышъхьэкIэ ыуж зэрихьащтым, чылэ­хэр, еджапIэхэр къызэри­кIухьащтхэм игугъу къы­шIыгъ. Лъэпкъ театрэм фэ­щагъэхэу шIу зылъэгъу­хэрэм адыгэ театрэм ипчъэхэр ренэу зэрафызэIухыгъэхэр хигъэунэфыкIыгъ. «Адыгэ театрэр орэпсэу!» аIозэ, артистхэр зытет сценэм иIухъо­хэр зэфашIыжьыгъэх. Театрэм хахъохэр тапэкIи ышIынхэу фэтэIо!

Тэу Замир. Сурэтыр: А. Гусев.