Гъэтхапэм и 25-р — культурэм иIофышIэ и Маф
Адыгэ Республикэм культурэмкIэ иIофышIэхэу лъытэныгъэ зыфэтшIыхэрэр!
Ныбджэгъу лъапIэхэр!
Шъуисэнэхьат епхыгъэ мэфэкIым фэшI тышъуфэгушIо!
Культурэм цIыфымкIи, обществэмкIи мэхьанэшхо иIэу щыт. Ежь лъэпкъэу къызхэкIыгъэм ыбзэ, ихэбзэ-зэхэтыкIэхэр ыIэ къызэрэригъахьэхэрэм дакIоу, цIыфлъэпкъым зэIуигъэкIэгъэ шIэныгъэхэм защигъэгъуазэзэ, игъорыгъозэ цIыфыр зыхэт обществэм изы Iахьэу мэхъу. Культурэр ары гушъхьэлэжь байныгъэхэм ялъытыгъэу зы лъэпкъыр адрэ лъэпкъым хэмыкIокIэным иамал къэзытырэр.
Лъэпкъи 100-м ехъумэ ялIыкIохэр зэгурыIоныгъэ азыфагу илъэу зыщыпсэухэрэ Адыгэ Республикэр арэгушхо ахэм культурэмкIэ гъэхъагъэу ашIыхэрэм. Мафэ къэс культурнэ щыIакIэу республикэм илъым нахь зеушъомбгъу, хэхъоныгъэ ешIы.
Урысые Федерацием и Президентрэ и Правительствэрэ яIэпыIэгъу хэлъэу лъэпкъ проектэу «Культурэр» зэрэпхыращырэм ишIуагъэкIэ театрэхэм, музейхэм, тхылъеджапIэхэм, культурэм иунэхэм ятеплъи нахь дахэ хъугъэ, ящыкIэгъэ Iэмэ-псымэхэмкIи нахь зэтырагъэпсыхьагъэх.
Мы мафэм культурэм ылъэныкъокIэ Iоф зышIэрэ пстэуми тызэрафэразэр къэтэIо. Культурнэ кIэныр къэгъэнэжьыгъэным ыкIи ащ хэгъэхъогъэным, лъэпкъ творчествэм зегъэушъомбгъугъэным апае бэ ахэм зэшIуахырэр.
Ныбджэгъу лъапIэхэр, зэкIэми тышъуфэлъаIо псауныгъэ пытэ шъуиIэнэу, шъуигуетыныгъэ къыкIимычынэу, творческэ гъэхъэгъакIэхэр шъушIынхэу, шIоу щыIэр зэкIэ къыжъудэхъунэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр