Культурэм иIофышIэ и Мафэ фэгъэхьыгъэ зэхахьэ непэ Адыгеим и Къэралыгъо филармоние щыкIуагъ. Адыгеим и ЛIышъхьэ ыцIэкIэ культурэм иIофышIэхэм афэгушIуагъ АР-м и Къэралыгъо Совет — Хасэм и Тхьаматэу Владимир На­рожнэр.

Мы лъэныкъом Iоф щызы­шIэхэрэм лъэпкъхэм яшэн-ха­бзэхэр, ятарихъ къызэтегъэ­нэгъэнымкIэ къэралыгъо пшъэ­рылъ инхэр зэрэзэшIуахыхэрэр, ахэм IэпыIэгъу ягъэгъотыгъэныр Адыгеим ихэбзэ къулыкъухэм яIофшIэнкIэ апшъэхэм зэра­щыщыр Владимир Нарожнэм къыIуагъ. Федеральнэ IэпыIэ­гъум ишIуагъэкIэ республикэм бэ щызэшIуахырэр твор­чествэм икъызэIухын, цIыфхэм языгъэ­псэфыгъо уахътэ гупсэфэу агъэ­кIоным, сабыйхэм ясэ­наущыгъэ къагъэлъэгъон алъэкIыным апае. Республикэ мэхьанэ зиIэ культурэм иучреждение шъхьаIэхэр агъэ­кIэ­жьыгъэх, мы илъэсым чэ­зыур къызнэсыгъэхэми адэлэжьэщтых.

Общественнэ-политическэ хъугъэ-шIэгъэ пстэуми, мэфэкI Iофтхьабзэхэми культурэм иIофышIэхэм яIахьышхо зэрахашIыхьэрэр Владимир Нарожнэм къыIуагъ, мыхэм яIэпэIэсэныгъэ ишIуагъэкIэ Адыгеим иилъэси 100 зэрифэшъуашэу икIыгъэ илъэсым зэрэхигъэу­нэфыкIыгъэр къыхигъэщыгъ.

Адыгеим икультурэ иIофышIэхэм республикэ, Урысые, Дунэе Iофтхьабзэхэм чанэу ахэлажьэх, тикультурэ федеральнэ каналхэм къащагъэлъагъо, осэ ин ахэм къафашIы. Илъэс къэс Адыгеир нахь зэлъашIэ зэрэ­хъурэм ахэм яIахьышхо хэлъ.

Ащ ишыхьатэу культурэм иIофышIэхэр зэхахьэм щагъэшIуагъэх. Культурэм ихэхъоныгъэ иIахьэу хилъхьагъэм ыкIи илъэсыбэрэ ащ зэрэфэлэжьагъэм афэшI УФ-м культурэмкIэ иминистрэ Рэзэныгъэ тхылъ фигъэшъошагъ Мыекъуапэ культурэмкIэ и ГъэIорышIапIэ ипащэу Цэй Розэ.

Лъэпкъ художественнэ творчествэм ыкIи Урысыем щы­псэурэ лъэпкъхэм якультурэ икъызэтегъэнэнрэ хэхъоныгъэ ягъэшIыгъэнымрэкIэ гъэхъэгъэ инхэр зэряIэхэм пае УФ-м культурэмкIэ и Министерствэ цIэ лъапIэу «Лъэпкъ творчествэм изаслуженнэ коллектив» зыфиIорэр къыфигъэшъошагъ культурэмкIэ муниципальнэ бюджет учреждениеу

«Творческэ объединениеу «Ошъад» зыфиIорэм хэхьэрэ лъэпкъ фольклорнэ-этнографическэ купэу «Ащэмэзым», пащэр Бастэ Асиет.

ЗиIофшIагъэкIэ щытхъур ­къэ­зылэжьыгъэхэу нэбгырэ 20-м нахьыбэ федеральнэ ыкIи республикэ тынхэмкIэ тыгъосэрэ мэфэкI зэхахьэм щагъэшIуагъ.