ЦIыфым ишIушIагъэ гъунэнчъ
Урысыем и Президентэу В. В. Путиным и УнашъокIэ шышъхьэIум и 27-м, 2007-рэ илъэсым къыщегъэжьагъэу культурэм и Мафэ хагъэунэфыкIы.
Ащ пшъэрылъэу иIэр лъэпкъ кIэным изэтегъэпсыхьажьын, икъэухъумэн ыкIи ихэгъэхъон япхыгъэ IофшIэгъэ инкIэ хигъэунэфыкIыныр, хэгъэгум икультурэ байныгъэ зыкъегъэIэтыгъэныр ары.
Адыгэ Республикэм культурэ Iофыгъохэм мэхьанэ щафашIы, ащ изыкъегъэIэтын гушъхьэ кIуачIи, мылъкуи бэу халъхьэ. Республикэм культурэ учреждениябэ ит, ахэм нэбгырэ мини 3-м ехъу ащэлажьэ.
Джырэ уахътэм АР-м профессиональнэ театрэу 3 иI, ахэм цIыфэу ащыIагъэхэм япчъагъэ мы аужырэ илъэси 5-м мини 10 пчъагъэу, 60-м лъыкIахьэу къалъытэ. Культурэ щыIакIэмкIэ анахь мэхьанэ зиIэхэм апэрэх тхылъеджапIэхэр, узыфэе шIэныгъэ лъэныкъомкIэ мыхэр IэпыIэгъу иных, технологиякIэхэмкIэ ухьазырыгъэх. «МодельнэкIэ» заджэхэрэ тхылъеджапIэхэу 12 республикэм щызэтырагъэпсыхьагъ, ахэр зыгъэпсэфыпIэ ыкIи шIэныгъэ зэгъэгъотыпIэ гупчэх, мыхэм джыри бэмышIэу 2 къахэхъуагъ — Адыгэкъалэ ыкIи Шэуджэн районымкIэ псэупIэу Тихоновым ащагъэпсыгъэхэр. Тхылъеджэхэм япчъагъэ мини 180-м ехъу. Адыгеим АР-м и Лъэпкъ музей, КъокIыпIэм щыпсэурэ лъэпкъхэм яискусствэкIэ Къэралыгъо музеим икъутамэ, мыхэм анэмыкIэу музеи 6 щэлажьэ, ахэм илъэс къэс цIыфэу ачIахьэрэр мини 100-м шIокIы. Культурнэ-зыгъэпсэфыпIэ IофшIэпIи 132-рэ фэдиз республикэм ит.
Адыгэ культурэмкIэ лъэпкъ Гупчэр, Адыгэ Республикэм и Къэралыгъо филармоние лъэпкъ IэшIагъэхэр зыщызэтырагъэпсыхьажьхэу, лъэпкъ культурэмрэ искусствэмрэ афэсакъхэу, егугъухэу адэлажьэхэу, алъапсэ зыщагъэпытэрэх.
Адыгеим и Къэралыгъо къэшъокIо академическэ ансамблэу «Налмэсыр», Къэралыгъо къэшъокIо ыкIи орэдыIо академическэ ансамблэу «Ислъамыер» адыгэ дунаим зэфэдэкIэ щыцIэрыIох, Урысыеми щызэлъашIагъэх.
Культурэр — хэтрэ цIыф лъэпкъкIи гушъхьэ кIэсэн пыт. Ар къагурыIозэ, АР-м и ЛIышъхьэу КъумпIыл Мурат, АР-м и Къэралыгъо Совет — Хасэм мы лъэныкъомкIэ Iофышхо алэжьы.
ИкIыгъэ илъэсым культурэм и Унэ кIэу ащашIыгъ поселкэу Майскэм (Кощхьэблэ район) ыкIи Теуцожь районымкIэ къуаджэу ПчыхьалIыкъуае. Мы илъэсым къуаджэу Хьатыгъужъыкъуае культурэм и Унэу щашIырэр аухыщт.
ГъэцэкIэжьынышхохэр ащыкIуагъэх культурэм и Унэу псэупIэу Еленовскэм, станицэу Келермесскэм, поселкэу Победэм, къуаджэхэу Пэнэжьыкъуае, Лъэустэнхьаблэ, Гъобэкъуае, Адэмые, Хьащтыку ыкIи Хьакурынэхьаблэ адэтхэм. Культурэм и Уни 10-мэ апае муниципальнэ образовании 5-м IэмэпсымакIэхэр ыкIи оргтехникэр арагъэгъотыгъэх. Мыекъуапэ ыкIи селоу Красногвардейскэм адэт еджэпIэ учреждениехэм музыкэ Iэмэ-псымакIэхэр, ящыкIэгъэ псэуалъэхэр ыкIи егъэджэн материалхэр афащэфыгъэх.
Поселкэу Каменномостскэм дэт культурэм и Унэ кинокъэгъэлъэгъуапIэ 3Д чIагъэуцуагъ, зэтырагъэпсыхьажьыгъ. ЗэфэдэкIэ республикэм культурэмкIэ иматериальнэ-техническэ базэ агъэкIэжьыгъ. Щэч хэлъэп а зэкIэми яшIуагъэ къызэрэкIощтым, ахэм ащылажьэхэрэри яIофшIэн нахь зэрегугъущтхэм, культурэм иIофышIэхэм амалышIоу агъотыгъэхэр къызфагъэфедэхэзэ, ямурад ехьыжьагъэхэр щытхъу хэлъэу зэрэзэшIуахыщтхэм ыкIи лъэгапIэхэм, хэхъоныгъакIэхэм зэрафэкIощтхэм.
Мамырыкъо Нуриет.