Мы зыгъэпсэфыгъо мафэхэр зэнэкъокъу зэфэшъхьафхэмкIэ баищтых. Гъэтхапэм и 25 —26-м мыщ фэдэ спорт Iоф­тхьабзэхэм шъуахэлэжьэн е шъуяплъын шъулъэкIыщт. Непэ кушъхьэфэчъэ спортымкIэ бзылъфыгъэхэм язэнэкъокъу Мыекъопэ районым истаницэу Къурджыпс дэжь щырагъэжьэщт. Iофтхьабзэр сыхьатыр 11-м аублэщт.

Джащ фэдэу олимпийскэ чемпионэу, спортымкIэ заслуженнэ мастерэу Арсен Галстян ыцIэкIэ зэнэкъокъу зэхащэщт. Спортивнэ комплексэу «Ошъутен» зыфиIорэм непэ сыхьатыр 10-м ар къыщызэIуахыщт. Зыныбжь илъэс 18-м шIомыкIыгъэхэр хэлажьэх.

Мы мэфэ дэдэм командэхэу «Динамо» (Мыекъуапэ) ыкIи «Метеор» (Краснодар) хоккей зэдешIэщтых. Ар сыхьатыр 4 хъункIэ такъикъ 15 иIэу рагъэжьэщт, фаехэр зэкIэ ыпкIэ хэмылъэу еплъынхэ алъэкIыщт.

Мы зыгъэпсэфыгъо мэфитIум Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ишапхъэхэр стадионэу «Зэкъошныгъэм» щатыщтых. Шэмбэтым — сыхьатыр 1-м, тхьаумафэм — 3-м.

Джащ фэдэу волейболымкIэ Мыекъуапэ ичемпионат къыдыхэлъытэгъэ зичэзыу ешIэгъухэр бзылъфыгъэ ыкIи хъулъфыгъэ командэхэм яIэщтых. ФутболымкIэ зэнэкъокъухэр тикъэлэ шъхьаIэ дэт гимназиеу N 22-м ищагу щыкIощтых.

Мэхьанэшхо зиIэ спорт Iофтхьабзэхэм ащыщ экстремальнэ зэнэкъокъоу «Марафон 100 км за 24 часа» зыфиIорэр. Мыр Мые­къопэ районым щырагъэкIокIыщт.