ФутболымкIэ Урысыем ихэшыпыкIыгъэ командэ Азием илIыкIохэм ныбджэгъу зэIукIэгъу заулэ адыриIагъ.

БлэкIыгъэ бжыхьэм Валерий Карпиныр зипэщэ командэр Киргизием, Таджикистан ыкIи Узбекистан якомандэхэм адешIагъ.

Джы Иран ихэшыпыкIыгъэ командэ IукIэнэу зегъэхьазыры, ешIэгъур Тегеран щыкIощт. Урысыем изэнэкъокъу щешIэхэрэм анэмыкIэу IэкIыб къэралыгъохэм ячемпионатхэм дэгъоу закъыщызыгъэлъэгъогъэ Александр Головинрэ Алексей Миранчукрэ ныбджэгъу зэIукIэгъум хэлэжьэнхэу тренер шъхьаIэм ригъэблэгъагъэх.

Тифутболистхэм ешIэкIэ дахэ къагъэлъэгъонэу, мы спорт лъэпкъыр зыгу рихьыхэрэр агъэгушIонхэу тащэгугъы.