«Адыгеим ипсынэкIэчъ» зыцIэ кIэлэцIыкIу журналыр апэдэдэ къыздэкIыгъэр 2001-рэ илъэсыр ары. Ащ къыщегъэжьагъэу журналым мафэ къэс дэлажьэрэр Бэгъушъэ Мариет — нэгу зэIухыгъэу, сэнаущыгъэ зыхэлъэу, шIу ылъэгъурэ Iофым зыпсэ хэтIэгъэ бзылъфыгъ. БэмышIэу Мариет «Адыгэ Республикэм изаслуженнэ журналист» зыфиIорэ цIэ лъапIэр къыфагъэшъошагъ. ЗиIофшIэнкIэ гъэхъэгъэшхо зышIыгъэ редакторым зыIудгъэкIагъ ыкIи гущыIэгъу тыфэхъугъ.

— Илъэс заулэкIэ узэкIэIэбэжьмэ сэ сшъхьэкIэ згъэшIэгъогъэ хъугъэ-шIагъэ щыгъуазэ сыхъугъ. Гъэ къэс Адыгеим и ЛIышъхьэу КъумпIыл Мурат «ШIоигъоныгъэмэ яелк» зыфиIорэ Iофтхьабзэм хэлажьэ, сабыйхэм ялъэIухэр зэрытхэгъэ джэгуалъэхэу ащ икъутамэмэ апалъхьэхэрэр къыпехыжьыхэшъ, нэужым чэзыу-чэзыоу лъэIухэр афегъэцакIэх. Гъот макIэ зиIэ унагъохэм къарыхъухьэгъэ кIэлэцIыкIухэр, ны-ты зимыIэжьхэр е сэкъатныгъэ зиIэхэр ары ЛIышъхьэм зызыфэзыгъэзэн зылъэкIыхэрэр. Компьютерхэм, планшетхэм, телефонхэм, джэголъэ зэфэшъхьафхэм бэ къакIэлъэIурэр. Ау сэ згъэшIэгъуагъэм джы сыкъэсыгъ, зы пшъэшъэжъые урысыбзэкIэ къыдэкIырэ кIэлэцIыкIу журналэу «Адыгеим ипсынэкIэчъ» зыфиIорэм къыкIэлъэIугъ. Ащ елъытыгъэу упчIэхэр сиIэх: уигуапэ хъугъа, бгъэшIэгъуагъа, сыд фэдэ гупшысэха ащ угу къыригъэхьагъэхэр?

Сыдэущтэу пшъэшъэжъыем журналыр IэкIэжъугъэхьагъа?

— Шъыпкъэр пIощтмэ, сэри лъэшэу мы хъугъэ-шIагъэр згъэшIэгъуагъэ. IофшIэн ужым, пчыхьэ хьазыр хъугъэу, унэм сихьажьыгъахэу телефонкIэ къысфытеуагъэх. АР-м и ЛIышъхьэу КъумпIыл Мурат иIэпыIэгъу кIалэхэр ары зыкъысфэзгъэзагъэхэр. Ахэр ары апэ сыщызгъэгъозагъэхэр Хьакурынэхьаблэ дэт еджэпIэ-интернатым чIэс пшъэшъэжъыеу Алина Золотаревам шIоигъоныгъэу, гухэлъ гъэшIэгъонэу иIэм. Пчэдыжьым жьэу тежьэн фаеу къысаIуагъэти, адезгъаштэу джэуап ястыжьыгъ. ЕтIанэ сызегупшысэжьым, къызгурыIожьыгъ а Iофым икъоу сызэрэфэмыхьазырыр. Илъэс реным кIэлэцIыкIу журналэу «Адыгеим ипсынэкIэчъ» пшъэшъэжъыем къыIукIэнэу зэрэкIатхэхэрэ тхьапэр хьазыр, ау ащ нахь сымыхьэу сабыим зыIузгъэкIэныр сыдагъэп. Пчыхьэ кIасэ хъугъагъэми, анахь тучан инэу Мыекъуапэ дэтыр джыри Iухыгъагъ, ащ сикIалэхэр згъакIохи, сурэт зыдашIыхьэрэ альбомыр, къэлэмхэр, джэгуалъэхэр, ИлъэсыкIэ мэфэкIым ипэгъокIэу шIухьафтын цIыкIухэр ащ къыфязгъэщэфыгъэх.

Пчэдыжьым машинэр къыIухьагъ, сипхъорэлъфэу Шъаукъо Даутэ сызхэхьащтмэ япкъэгъу-лэгъу хьазырти, гъусэ сшIыгъэ. Хьакурынэхьаблэ тызынэсым хъурэр гъэшIэгъоны: хьакIэшхомэ афэдэу къытпэгъокIых пащэхэри, телевидением иIофышIэхэри, мэхьанэшхо Iофым ратызэ цIыфыбэу зэхэтых. Республикэ пащэм Iофыр ыпкъ къызэрикIырэр гъуащэщтыгъэп. Пшъэшъэжъые цIыкIоу тызфэкIуагъэр къыскIэрылъади IаплI къызысещэкIым, сыгу къызэхигъэхьагъ, сынэпсхэр къыгъэкIуагъэх. Я 3-рэ классым а лъэхъаным пшъэшъэжъыер исыгъ, ар скIэрымыкIыжьэу, Iэ къысщифэу бэрэ щытыгъ, сэри шIухьафтынхэр естыгъэх, зэрэслъэкIэу згъэшIуагъэ, гущыIэ фабэхэр есIуагъэх. Ар пщыгъупшэжьын плъэкIыщтэп, непэ къызнэсыгъэми сыгу къызыкIыжьырэм гур къэбырсыры. КIэлэцIыкIу журналэу къызкIэлъэIугъэр сэ къызэрэдэзгъэкIырэр зесэIом, апэрэмкIэ шIошIыгъэр ар фэсщэгъэ къодыеу ары, джыри зэ IаплI къысищэкIыгъ. Пшъэшъэжъыем икъэбархэр къысфиIотагъэх, «Адыгеим ипсынэкIэчъ» зыцIэ журнал номер зэфэшъхьафыбэу ыугъоигъэхэр къысигъэлъэгъугъэх, ащ къыдэхьэгъэ усэ цIыкIухэм ащыщхэм езбырэу къысфяджагъ. Сэри Алинэ есIуагъ илъэс реным журналыр къызэрэфэкIощтыр. Нэужым тызэгъусэу интервьюхэр журналистмэ яттыгъэх, зэхэхьэ гъэшIэгъонэу еджапIэм къыщагъэхьазырыгъэм тызэдыхэлэжьагъ. А мафэр текIыгъ, ау ащ тыкъыщыуцугъэп, ащ фэгъэхьыгъэ тхыгъэ тижурнал къыщыхэтыутыгъ, исурэт журнал кIышъом тедгъэуцуагъ. Уахътэр зытешIэм а хъугъэ-шIагъэм фэгъэхьыгъэ рассказ стхыгъэ, «МэфэкIыр тыухыгъэ, зэкIэхэри зэбгырыкIыжьыгъэх, пшъэшъэжъыери зэризакъоу къэнэжьыгъ» зыфэпIощт гупшысэхэр ащ щыпхырысщыгъ, рассказым икIэухым упчIэхэр къэзгъэуцугъэх: сыдэущтэу ащ фэдэ сабый дышъэр чIэбдзыжьыщта? Тыдэ щыIэха пшъэшъэжъыем янэ-ятэхэр? Тыдэ ущыI о, ныр? Сыдэущтэу упсэун плъэкIыра?

Социальнэ нэкIубгъоу тиIэми ар къыщыхэсыутыгъ. ЗыгорэкIэ мы сабыим янэ-ятэхэр къыгъотыжьыщтхэмэ е зыгорэм ыпIунэу ыштэщтмэ сIозэ. КIэлэпIумэ бэрэ икъэбаркIэ сяупчIэу хъугъэ, зэ ны-тыхэр къыфагъотыгъэуи аIогъагъ, ау, хэхъухьагъэр сшIэрэп, бэ тырамыгъашIэу ар къаратыжьыгъагъ.

— КIэлэцIыкIухэм афэгъэхьыгъэ журналхэр, тхылъхэу пшысэхэр е рассказ кIэкIхэр зыдэтхэр зэмылIэужыгъохэу, гъэкIэрэкIагъэхэу, шъо зэфэшъхьафхэмкIэ сурэт дахэхэр атешIыхьагъэхэу тхылъыщэ тучанхэм атеплъэгъощтых. ГухэкIми, титхакIохэр макIэу сабыйхэм афэтхэх, илъэс пчъагъэхэм тхылъ тедзапIэхэри кIэлэцIыкIухэм афэгъэхьыгъэ журналхэр къыдэзыгъэкIырэ редакциехэри тхакIохэм ялъэIух къафэтхэнхэу, кIэлэцIыкIум ыбзэкIэ тхыгъэ произведениехэр къафахьынхэу. Ау ар бэмэ афызэшIокIырэп, сыда пIомэ тхэрэмэ ныбжь яI, ясабыигъо агу къагъэкIыжьыныр къин къащэхъу, кIэлэцIыкIу психологиер къэубытыгъуае афэхъу. Адэ, ежьхэр зыщыцIыкIугъэ лъэхъанымрэ джырэ сабыйхэр зыхэт зэманымрэ зэтекIых, азыфагу илъыр гъунэнчъ. Къорэлъф-пхъорэлъфхэр къызэтэкъокIыгъэмэ джыри зыгорэ къатхын, ау, сыд фэдиз сэнаущыгъэ пхэлъми, цIыкIухэр уинэплъэгъу имытхэу уафэтхэныр хьылъэ. Сэ мары усэхэри сэтхы, прозэкIэ сытхэуи сыублагъ, ау сабыйхэм сызэрэфаем фэдэу зафэзгъэзэн слъэкIырэп. Сыдэущтэу авторхэм о уадэлажьэра? КIэлэцIыкIухэм абзэкIэ адэгущыIэн зылъэкIырэ тхакIохэр сыдэущтэу къэбгъотыхэра?

— ЫпэрапшIэу къэсIонэу сызыфаер журналым рубрикэ зэфэшъхьафыбэ зэриIэр ары. Ахэм афытегъэпсыхьагъэу тхэхэрэр етIанэ къэтэгъотых. Рубрикэхэу «Сабый дэдэхэм апае», «КIэлэеджакIохэм афэгъэхьыгъ», «Студентхэм якъэлэжъый», «ШIу шIи псым хадз», «Адыгэхэм ядунай», «Дунаим ишъхьаныгъупчъ» ыкIи нэмыкIыбэхэм журналыр къагъэбаи. Тэ къытфатхэх Оксана Безмельницинар, Славяна Бушневар, ТIэшъу Светэ, ащ «Адыгэмэ ядунай» зыфиIорэ рубрикэр къытфегъэхьазыры, Хьакомэ Симэ, Елена Поздняковар ыкIи нэмыкIыбэхэр. Адыгеим ыкIи нэмыкI шъолъырхэм ащызэлъашIэрэ адыгэ тхэкIошхоу МэщбэшIэ Исхьакъ ытхыгъэхэр бэрэ сэгъэфедэх, къыхэсэутых, сабыймэ апае дэгъоу тхэщтыгъэ Цуекъо Джахьфар иусэхэр, рассказхэр къыхэтыутыхэу мэхъу. Ахэм язакъоп, журналым еджэрэ кIэлэцIыкIухэри къысфатхэх, «Тызэгъусэу тежъугъадж», «Пшысэм пшысэр къыкIэлъыкIоу» зыфиIорэ рубрикэхэр усэхэмкIэ ыкIи рассказ кIэкIхэмкIэ къысфаушъэх.

КIэлэцIыкIухэм апае тхэрэр макIэми, тэ тижурналкIэ къытфэтхэщтхэм тащыкIэрэп, сыда пIомэ зэкIэмэ зэпхыныгъэ пытэ адытиI, тадэлажьэ, ежьхэм яшIоигъоныгъэхэр къытфаIуатэ, тэ тызфаер агурытэгъаIо, нэужым темэ хэхыгъэу къэхъугъэхэр журналым етэгъэкIужьых.

— Хэутыгъэу тиреспубликэ къыщыдагъэкIырэ гъэзетхэр пштагъэми, журналмэ ягугъу пшIыгъэми, сыхэмыукъорэмэ, «Адыгеим ипсынэкIэчъ» ары зитираж нахьыбэр, экземпляр мини 6-м нахьыбэ къыдэшъогъэкIы. Сэ зэрэсшIошIырэмкIэ, Мариет, ар о уиIофшIэн ары нахьыбэрэмкIэ зэлъытыгъэр, журналыр тхыгъэ гъэшIэгъонхэмкIэ зэрэуушъагъэр, дизайнэу къыфэбгъотырэр, изэмышъогъугъ. Зигугъу къэсшIыгъэмэ анэмыкI Iофыгъохэу пчъагъэр бэ зышIыхэрэм уакъытфытегущыIагъэмэ дэгъугъэ.

— Тиражыр экземпляр 8500-м едгъэхъоуи зэман къытэкIугъ. Джырэ уахътэр пштэмэ, пчъагъэр минихым къыщыкIэу зыкIи къыхэкIыгъэп. Мафэ къэс журналым сыдэлажьэ, ар нахьышIу зэрэсшIыщтым лъэшэу сыпылъ. Дизайным, теплъэу журналым иIэм, кIэ горэ зэрэхэслъхьащтым, ямышIыкIэу къэлъэгъоным ыуж сит зэпыт. КIэлэцIыкIухэм журналыр къыратхыкIыным, шIу алъэгъуным пае ащ дэт тхыгъэхэмкIэ ибгъэкъунэу щытэп, ахэр джыри яфэшъуашэм тетэу къэтыжьыгъэнхэ, гъэкIэрэкIагъэхэу, зигугъу къэпшIырэр нэм къыкIидзэжьэу щытынхэ фае. ГущыIэм пае, джыдэдэм Iоф дэсэшIэ къэрэум фэгъэхьыгъэу тхыгъэу рубрикэу «Тыкъэзыуцухьэрэ дунаим ишъхьаныгъупчъ» зыфиIорэм хэтыщтым, сурэтхэмкIэ ар сэгъэкIэракIэ. Къэрэум мэхьанэу иIэр къисэIотыкIы, сыкъызтегущыIэрэр нэрылъэгъоу тэшIы. Журналыр цIыкIуми, гухэлъэу тиIэр зэкIэ ащ щытэгъэцакIэ, арын фае сабыйхэм зыкIашIогъэшIэгъонри.

«Сэ музеим усщэщт» зыфиIорэ рубрикэр тиIэубытыпIэу Адыгеим итарихъ кIэлэцIыкIухэм ятэгъашIэ. Адыгэ лъэпкъым ихъишъэ гъэшIэгъон дэд, ар тилъэпкъэгъухэми тиреспубликэ щыпсэухэрэм зэкIэми ядгъэшIэн фаеу сэлъытэ.

Журналыр гъэшIэгъонэу бгъэпсымэ, кIэгъэтхэнымкIэ ащ ишIогъэшхо къызэрэкIощтым щэч хэлъэп, ау ащкIэ тыкъэуцурэп, АР-м гъэсэныгъэмрэ шIэныгъэмрэкIэ и Министерствэ зэпхыныгъэ дытиIэу кIэгъэтхэн уахътэр къызэрэсэу еджапIэхэм письмэхэр афятэгъэхьых, тадэгущыIэ, тафытео.

КъыхэкIы ежь сабыйхэри къысфытеохэу, кIэгъэтхэгъу уахътэр къэсыгъэмэ къыкIэупчIэхэу. Зэгорэм ежь журналыр къизытхыкIыщтыгъэхэу, джы нахьыжъ хъугъэхэм ясабыйхэм къафыратхыкIэуи мэхъу. Лъэныкъуабэ кIэгъэтхэным къызэдеубыты, уасэми мэхьанэ иI, тижурнал илъэс реным къыпIукIэным фэшI сомишъэм нахь макI лъыптыщтыр. Пандемием илъэхъан социальнэ нэкIубгъоу тиIэр згъэфедагъэ, онлайн шIыкIэм тетэу бэмэ журналыр къыратхыкIыгъ.

— Сабыйхэр уинэплъэгъу итхэу, ахэм зэдэгущыIэгъухэр адэпшIыхэ хъумэ, журналым щыкIагъэу фэхъухэрэми гу алъыптэн олъэкIы, джыри нахьышIу зэрэпшIыщтымкIэ гупшысэ гъэшIэгъонхэр шъхьэм къехьэх. Ары сэ къызэрэсщыхъурэр. Мариет, еджапIэхэм, кIэлэцIыкIу IыгъыпIэхэм зэIукIэхэр ащыпшIыхэу мэхъуа?

— Ары, республикэм ит тхылъеджапIэхэм, гурыт еджапIэхэм ыкIи кIэлэцIыкIу IыгъыпIэхэм бэрэ сащэIэ, ахэм зэхащэрэ Iофтхьабзэхэм сшIо- гъэшIэгъонэу сахэлажьэ. Анахьэу згъэшIагъорэр тисабыйхэм ягупшысакI ары, зэрэхъун хъугъахэхэм фэдэх, аныбжь емылъытыгъэу яеплъыкIэхэр къыраIотыкIых. Ахэм сэ сагъэразэ ыкIи къызэрэпIуагъэу, тызфэныкъорэ лъэныкъохэри дэтэгъэзыжьых.

«Яфитыныгъэхэр ашIэхэу зыщапIухэрэ еджапIэр» зыфиIорэ рубрикэу тиIэм кIэлэеджакIохэр къыхэсэгъэлажьэх, мэхьанэ зэстырэ Iофыгъоу ар щыт. Ащ ишIуагъэкIэ Адыгэ Республикэм и Апшъэрэ хьыкум зэхищэгъэгъэ конференцием сыхэлэжьэнэу хъугъагъэ, кIэлэеджакIохэм яфитыныгъэхэр, амалэу яIэхэр зыфэдэхэр ашIэу пIугъэнхэм тегъэпсыхьэгъэ доклад ащ къыщысшIыгъагъ. Урысыем ишъолъыр зэфэшъхьафхэм къарыкIыгъэ лIыкIохэу конференцием хэлэжьагъэхэм кIэлэцIыкIу журналым ащ фэдэ упчIэхэр къызэрэщытIэтыхэрэр агъэшIагъо икъугъ.

— Непэрэ лъэхъаным удэбэкъоным, тиражми къыщымыкIэу, ары пакIошъ, хэбгъахъоу журналыр пшIыным, къыдэбгъэкIыным фэшI сыда пшIэрэр? Социальнэ нэкIубгъохэр Интернетым щышъуиIэха?

— Социальнэ нэкIубгъоу тиIэмэ тикIэлэцIыкIу журнал зырагъэушъомбгъугъ. Дунаим тыщызэлъашIагъ пIомэ хъунэу сеплъы. «Дунаим ишъхьаныгъупчъ» зыфиIорэ рубрикэм пае IэкIыбым къыратхыкIызэ бэ къытфатхырэр. ГущыIэм пае, Дэнэф Гюнэй Тыркуем щэпсэу, ар адыгэ пшъашъ, джыдэдэм а цIыкIум фэгъэхьыгъэ статья сэгъэхьазыры. Америкэм щыщ адыгэ пшъэшъэ цIыкIоу Иман Биша, ар орэдыIу, мэкъэ дэхэ дэдэ иI, хэгъэгубэмэ концертхэр къащеты. Андемир Барретти игугъу къэсшIын, ар Великобританием, къалэу Челтнем къыщытхъугъ, янэ Налщык щыщ, адыгэ, ятэ — инджылыз, адыгабзэр дэгъоу зэригъэшIагъ. Налщык щыщ бзылъфыгъэ ныбжьыкIэм методикэ шъхьаф зэхигъэуцуагъэу адыгабзэр ишъэожъые регъашIэ, джы ныдэлъфыбзэри инджылызыбзэри кIэлэцIыкIум дэгъоу ышIэхэу къэтэджы. Джащ фэд, Токио щыщ кIэлэцIыкIоу Тайга Нозаки фэгъэхьыгъэ зы нэкIубгъо дгъэхьазырыгъэ. Нозаки адыгэп, ау адыгэ культурэр, шэн-хабзэхэр ыгу хэтIысхьагъэх, адыгабзэри зэрегъашIэ. Ащ студие шъхьаф иI, адыгэ шъуашэкIэ ежьыри, илэгъухэми зафапэшъ, къэшъох, адыгабзэкIэ орэд къаIо. А кIалэм Кавказ, адыгэ лъэпкъыр шIу елъэгъух. СкайпкIэ Нозаки сыдэгущыIэ, иадыгабзэ джыри икъурэп, ащ къыхэкIэу гугл зэдзэкIакIор тэгъэфедэ. Германием щыщ пшъэшъэжъыеу Дышъэ илъэсих ыныбжьыщт, адыгабзэр дэгъоу ешIэ, янэ Амина ыцIэр. Гъэмэфэ номерым ахэм афэгъэхьыгъэ къэбар къыщыхэсыутын сыгу хэлъ.

Татьяна Ересинар пшъэдэкIыжь зыхьырэ секретарэу тижурнал Iоф щишIэщтыгъ. Ащ Москва дэт Литературнэ институтэу Горькэм ыцIэ зыхьырэр къызеухым, Тыркуем кIожьыгъэ, зыдэкIуагъэр адыгэ кIал. Джырэ уахътэм Татьянэ Стамбул кIэлэцIыкIу журналиплI инджылызыбзэкIэ къыщыдегъэкIы. Ащ ипшъашъэу Талия адыгабзэр ешIэ, ар езыгъашIэрэр ятэжъ ары. Татьянэ гъогоу къыкIугъэр, журналэу ыгъэхьазырхэрэм сакъызщытегущыIэрэ тхыгъэри шIэхэу къыхэсыутыщт.

— «Адыгэ Республикэм изаслуженнэ журналист» зыфиIорэ цIэ лъапIэр бэмышIэу къыпфагъэшъошагъ. АщкIэ уагъэлъэпIагъ, ар зымыуасэ щыIэп, ащ фэшI сыгу къыздеIэу сыпфэгушIо! Сыда угу ихъыкIыгъэр а уахътэм ыкIи сыд фэдэ мэхьана о ептырэр мы цIэ лъапIэм?

— Осэшхо сиIофшIэн къызэрэфашIыгъэм ар зэу ишыхьат. Сафэраз сыкъэзгъэлъэгъогъэ МэщбэшIэ Исхьакъи, ар къысфэзгъэшъошэгъэ КъумпIыл Мурати, тхьаегъэпсэух. Сэри уасэу къысфашIыгъэр къызэрэзгъэшъыпкъэжьыщтым мафэ къэс сыпылъ, «Адыгеим ипсынэкIэчъ» зыцIэ журналэу сызыдэлажьэрэр кIэлэцIыкIухэм агу ренэу рихьынэу, ашIогъэшIэгъон зэпытынэу сыфай. Ащ пае журналым зэхъокIыныгъэшIухэр фэсэшIых, ыпэкIэ сылъэкIуатэ, сэри тиеджакIохэми яидеехэр щысэушэтых. Марышъ, журналым ыкIышъо уахътэу къызщыдэкIырэм елъытыгъэу: кIымафэм зы шъогъоу, осыцэхэр тешIыхьагъэхэу, гъатхэм нэмыкIэу, къэгъагъэхэр къешIэкIыгъэу, джащ фэдэу икъыдэкIыгъо къэс сэгъэпсы. МэщбэшIэ Исхьакъ къыздыригъашти, адыгабзэкIэ зы нэкIубгъо дэдгъахьэу тыублагъэ. Ащ усэ ыкIи рассказ цIыкIухэр, къэбар гъэшIэгъонхэр къыщыхэтэутых. Сыд фэдэрэ Iофи цIыкIоу, мэхьанэ ептынэу щымытэу слъытэрэп, сыд пшIагъэми, угу къикIэу, нахьышIум уфэбанэзэ огъэцакIэмэ, мэхьанэ куу иI. Арышъ, джыри зэ къыкIэсэIотыкIыжьы: сшIэрэм уасэ къыфашIыгъэшъ, сафэраз, сагъэнасыпышIуагъ.

— Джы упчIэу къыостыщтыр IофшIэным фэгъэхьыгъэп. Ау ар зэдэгущыIэгъу зыдэсшIырэмэ зэкIэми ясэты. Апэ упчIэу сиIэм ухэсщэн. Тызэрэщыгъуазэу, Тхьэм къытхилъхьэгъэ шэнхэм ащыщ гукIэгъур. Ащ имэхьанэ, адыгэ лъэпкъым ишэн-хабзэхэм къазэрахафэрэр ыкIи зэрэдунаеу пштэмэ, цIыфхэм къызэрагурыIорэр зэтекIы, ау зэкIэми лъапсэу яIэр, сэ сишIошIкIэ, зы: шIур ары. ШIушIэнымрэ гукIэгъумрэ зэгопчынхэ умылъэкIынэу зыкIызэголъхэр, зы гъогу зыкIызэдытетхэр шIу зыгу илъым игукIэгъугъэ лъэшышъ, джащ фэд, ем анахь де-хьыхымэ, гукIэгъугъэ къыхэфэным пэчыжьэ мэхъушъ ары. О уиеплъыкIэкIэ, сыда гукIэгъум купкIэу иIэр?

— Сятэ Iэзагъэ, врачэу Iоф ышIагъ, ар Тхьэм къыдигъэхъугъэу щытыгъ. Ащ къысиIощтыгъ: «Мариет, о угукIэ ушъаб, гукIэгъушхо пхэлъ, арышъ, врач сэнэхьатыр зэгъэгъот. Ар бгъэцакIэмэ, цIыфмэ о угу зэрафэгъурэмкIэ Iэзэ шъыпкъэ ухъущт». А гущыIэхэр бэрэ зэхэсхыщтыгъэх, ау тятэ зигугъу къысфишIыщтыгъэ шэнмэ джыри зы аголъыгъ, сэ сыгумэхагъ сигъашIэм, ары врач сызкIэмыхъугъэри. ГукIэгъу цIыфхэм афэсшIыныр, шIу горэ афэсшIэным сыдигъокIи сыпылъыгъ ыкIи непэ къызнэсыгъэми сыпылъ. ЦIыф пэпчъ ащ фэдэ шэныр хэлъэу къысщэхъу, ау, о къызэрэпIуагъэу, зым ар нахь къыхэщы, адрэр ем нахь дехьыхы, пхъэшагъэр къытекIо. Сэ сызэрегупшысэрэр ары: о къыпфыщытынхэу узэрэфаем фэдэу цIыфмэ афыщыт, джащыгъум шIуи пшIэщт, гукIэгъуи пхэлъыщт. Пчъагъэрэ сыушэтыгъэ, сэ зыгорэм сишIуагъэ зезгъэкIырэм, орэмэкIэ дэд фаеми, зыфэсшIагъэр зэрэзгъэгушIуагъэм нахь лъэшэу сэ сэгушIожьы, гушхоныгъэ сэгъоты.

— Тхьауегъэпсэу, Мариет, гущыIэгъу укъызэрэтфэхъугъэмкIэ.

— Ори тхьауегъэпсэу.

ДЭРБЭ Тимур. АР-м изаслуженнэ журналист.