Гъэтхапэм и 21-р, гъэмрэ кIымрэ зы­щызэхэкIыхэрэ ма­фэр, лIэшIэгъухэм къахэкIыгъэ ха­бзэу лъэпкъ мэфэкIым ишап­хъэхэм­кIэ неущ хэдгъэу­нэфыкIыщт.

Мыщ фэдэ мэфэкIхэм титарихъ, тишэн-хабзэхэм тафызэплъэкIыжьыным, тщымыгъупшэнхэм тафапIу, адыгэ культурэм ибаиныгъэ къытлъагъэIэсы, тилъэпкъ зэхашIэ къа­Iэты, ныбжьыкIэхэм лъэпкъ культурэм имэхьанэ зэхягъэшIыкIыгъэным фэIорышIэ.

Гъатхэу къихьагъэм имэфэ фабэхэм чIыопсыр къагъэущыгъ, тыгъэу къытфепсырэм ыкIуачIэ псэ зыпыт пстэури къегъэкIэ­жьы. ЗэралъытэщтыгъэмкIэ, шIумрэ емрэ а мафэм чIыопсым щызэпэуцущтыгъэх ыкIи шIур текIо­щтыгъ. А уахътэр мэкъумэщ Iо­фыгъохэм яублапIэ хъущтыгъэ, чIыгулэжьыныр — жъоныр, пхъэ­ныр рагъажьэ­щтыгъ. Илъэ­сэу къихьащтыр зыфэдэщтыр ижъырэ адыгэхэм мафэм изыте­кIэ къагъэнафэщтыгъ. Щэджагъом нэс ошIу хъумэ, илъэсыр гъэбэжъущтэу алъытэщтыгъ. Ма­фэр оялэу е ос къесэу зы­хъурэм, огъу хъун ылъэкIыщтэу агъэнафэщтыгъ. Сыдэу хъугъэми, ИлъэсыкIэм имэфэкI щыIэныгъэр икIэрыкIэу къызщежьэ­жьырэ уахътэу алъытэщтыгъ.

Мыгъэ ИлъэсыкIэм ихэгъэу­нэфыкIын фэгъэхьыгъэ зэхахьэр искусствэхэмкIэ кIэлэцIыкIу еджапIэу No 1-м, урамэу Советскэм тет унэу No 211-м щыкIощт. АР-м и Лъэпкъ театрэ иактер­хэр, творческэ объедине­ниеу «Ошъадэм» хэт куп­хэр, Адыгеим щыпсэурэ цIыф лъэпкъхэм яобщественнэ организациехэм ялIыкIохэр мэфэкI Iоф­тхьа­бзэ­хэм ахэлэжьэщтых. КIэ­ухым адыгэ джэгу зэхащэщт, адыгэ къашъохэмкIэ зэнэкъо­къущтых. МэфэкIым къекIолIэрэ хьакIэхэм адыгэ шхынхэр апагъохыщтых. Iофтхьабзэр пчы­хьэм сыхьатыр 6-м аублэщт.

АР-м культурэмкIэ и Министерствэрэ лъэпкъ культурэм и Гупчэрэ адыгэ илъэсыкIэм имэфэкI икIэщакIох.

Сурэтыр: Лъэпкъ культурэм и Гупчэ ихъарзынэщ.