Ренэу зафэу, зыфэсакъыжьэу ыкIи иIофшIэн шIу ылъэгъоу ары зэрашIэрэр Татьяна Мединскаяр – творческэ объединениеу «Звонница» зыфиIорэм ихормейстер. Итворческэ гъогу сабыизэ къэнэфагъ ыкIи къэзэкъ орэдым шIулъэгъоу фыриIэр непэ щыIэныгъэм щыпхырещы.

Татьянэ дон ыкIи пшызэ къэзэкъ унагъоу орэдыр дахэу къызыщаIощты­гъэм къихъухьагъ. Ятэжъ къыфигъэпытэгъагъ орэдыр сыдигъуи къыIонэу ыкIи ар ыгъэ­цэкIагъ. Апэрэ классым кIогъэ къодыягъ музыкэ сэнаущыгъэу хэлъыр иегъэджакIоу Наталья Уваровам къызыхегъэщым ыкIи зэхищэрэ ансамблэу «Казачатэм» зырегъэблагъэм.

— Орэдыр тикIасэу къатIощтыгъ. Наталья Ивановнар педагог шъыпкъагъ, орэдым Iоф дэпшIэн зэрэфаер упкIэпкIы­гъэу къыдгуригъаIощтыгъ, орэдкъэ­Iоныр тэркIэ гушIогъуагъэ. Зэшъхьэгъусэ

Уваровхэр илъэси 10-м къыкIоцI тянэ-тятэ пэпкIагъэх, — къеIуатэ Татьянэ.

Татьяна Мединскаям ищыIэныгъэ гъогу лъэпкъ орэдым рипхыгъ.

Культурэмрэ искусствэмрэкIэ Краснодар дэт къэралыгъо университетыр ащ къыухыгъ. Апэрэ илъэситIум Пшызэ къэзэкъ хорым иотдел иметодистэу Iоф ышIагъ.

2005-рэ илъэсым Татьянэ Мыекъуапэ къыгъэзэжьыгъ ыкIи ащ къыщегъэжьа­гъэу къэзэкъ ансамблэхэу «Казачата», «Звонница» зыфиIохэрэм яхормейстерэу мэлажьэ.

Татьяна Мединскаяр егъэджэкIо дэгъу, а сэнэхьатым фэIэпэIас, ащ ыгъэсагъ ыкIи къычIитIупщыгъ нэбгыри 100-м на­хьыбэ, ахэр шъолъыр, Урысые ыкIи дунэе зэнэкъокъухэм пчъагъэрэ ялауреат хъугъэх. Бзылъфыгъэ чаным иIоф ыгу лъэшэу етыгъ, казачатэхэм, ахэм янэ-ятэхэм ыкIи иIофшIэгъухэм лъэшэу шъхьэкIафэ къыфашIы.

Творческэ мурадхэр ыкIи проектхэр пхырищынхэмкIэ анахьэу зыгъэгушхоу, ыгу къэзыIэтырэр кIэлэцIыкIу нэплъэгъу хьалэлхэр ары. Ежь ышъхьэкIи мафэ къэс Iоф зыдешIэжьы, концерт программэхэм, ансамблэм ыкIи орэдыIохэм апае репертуарыр егъэхьазыры. Татьянэ зипэщэ творческэ купым концертхэр зэхещэх, къалэу Мыекъуапэ дэт кIэлэцIыкIу IыгъыпIэхэм Iут музыкэр языгъэ­хьырэ IофышIэхэм мастер-классхэр къа­фетых ыкIи искусствэхэмкIэ кIэлэцIыкIу еджапIэу N 6-м икIэлэегъадж. Къэзэкъ лъэпкъ культурэм хэгъэхъоныгъэ ышIыным иIахьышхо зэрэхэлъым пае Татьяна Мединскаям шIухьафтын зэфэшъхьафхэр къыратыгъэх, 2016-рэ илъэсым зэхащэгъэ къэлэ зэнэкъокъоу «Илъэсым икIэлэегъадж» зыфиIорэм ар щатекIуагъ.

Е. Загорулько.

Сурэтхэр: авторым иех.