Урысые Федерацием и Президент Къыблэ федеральнэ шъолъырымкIэ и Пол­номочнэ лIыкIо дэжь Советэу щызэ­хэщагъэм изэхэсыгъо хэлэжьагъ Адыгеим и ЛIышъхьэу Къум­пIыл Мурат. Къыблэ федеральнэ шъолъы­рымкIэ полномочнэ лIыкIоу Владимир Устиновым видео­конференцие шIы­кIэм тетэу ар зэ­рищагъ.

Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, хабзэм иуполномоченнэ къулыкъухэм яIэшъхьэтетхэр. Къыблэ федеральнэ шъолъырым къыхиубытэрэ субъектхэм ошIэ-дэмышIагъэ зыхэлъ тхьамыкIа­гъохэр къащымыгъэхъугъэнхэм ыкIи ахэм якIэуххэр дэгъэзыжьыгъэнхэмкIэ Iофтхьабзэхэу зехьэгъэн фаехэм зэхэсыгъом щатегущыIагъэх. Полномочнэ лIыкIом агу къыгъэкIы­жьыгъ а IофшIэныр нахь гъэ­лъэшыгъэнымкIэ Урысыем и Президентэу Владимир Путиным пшъэрылъэу къафишIы­гъэхэр. Къэралыгъом и ЛIышъхьэ къыгъэуцугъэ пшъэрылъхэр гъэцэкIэгъэнхэм пае цIыфхэр ухъумэгъэнхэмкIэ, экономикэм къыфыкъокIын ылъэкIыщт къиныгъохэр щыгъэзыегъэнхэмкIэ Iофтхьэбзэ тедзэхэр зехьэгъэнхэ зэрэфаер В. Устиновым агу къыгъэкIыжьыгъ.

«ХэушъхьафыкIыгъэ дзэ операциер зыщыкIорэ лъэхъаным щынэгъо шъолъырхэм цIыфхэр арыщыгъэнхэм фэгъэхьыгъэ унашъохэр псынкIэу зэшIохы­гъэнхэ зэрэфаер къэралыгъом ипащэ къыхигъэщыгъ. Анахьэу анаIэ зытыригъэтыгъэр ошIэ-­дэмышIагъэ зыхэлъ тхьамы­кIагъохэм цIыфхэр ащыухъу­мэгъэнхэр ыкIи къэгъэнэжьын IофшIэнхэр зэшIохыгъэнхэр ары», — къыIуагъ Владимир Устиновым.

Джащ фэдэу Урысыем и Къыблэ ишъолъырхэм псыр къыдэкIыным епхыгъэ ошIэ-­дэмышIагъэ зыхэлъ тхьамыкIагъохэр къарымыхъухьанхэм пае Iофтхьабзэхэу зэшIуахыщтхэм ягугъу ащ къышIыгъ. Нэпкъхэр гъэпытэгъэнхэмкIэ, псыр къа­кIэоным ищынагъо зышъхьащыт чIыпIэхэм псэуалъэхэр ащымышIыгъэнхэмкIэ Iофыгъо гъэ­нэфагъэхэм къащыуцугъэх.

Джащ фэдэу псыр къызыщыдэкIын ылъэкIыщт лъэхъанхэм псынкIэу ищыкIэгъэ Iофтхьа­бзэхэр зехьэгъэнхэм пае куп гъэнэфагъэ республикэм щызэхащагъ, ащ дакIоу сурэт атыра­хыгъ псыр къатеонымкIэ щы­нагъо зышъхьарыт чIыгу Iахь 58-мэ. Мы илъэсым псыхъоу Лабэ идамби 3 гъэцэкIэжьыгъэ­нымкIэ, Мыекъопэ районымкIэ псыхъоу Джаджэ инэпкъхэр укъэбзыгъэнхэмкIэ, Шэуджэн районымкIэ псыхъоу Фарзэ къыпэIулъ чIыпIэхэм ащызэтырихьэгъэ хэкIыр IущыгъэнымкIэ, джащ фэдэу нэмыкI лъэны­къохэмкIэ зэшIуахыщт Iофхэр агъэнэфагъэх. Псыр къакIэ­мыоным фытегъэпсыхьэгъэ мылъкоу мы илъэсымкIэ агъэ­нэфагъэр сомэ миллиони 153,6-рэ фэдиз мэхъу, ащ щыщэу сомэ миллиони 135,6-р фе­деральнэ бюджетым къыхэкIыгъ. 2022-рэ илъэсым елъытыгъэмэ, фэди 3 хьазыркIэ ар нахьыб.

МашIом зыкъыштэным ищынагъо тегущыIэхэ зэхъум Владимир Устиновым пшъэрылъ къыгъэуцугъ Къыблэ федеральнэ шъолъырым исубъектхэм щынэгъончъэнымкIэ шапхъэу щыIэхэр зэрагъэцакIэрэм ­иуплъэкIун ащагъэлъэшынэу. Ащ нэмыкIэу чIыпIэ зыгъэIорышIэ­жьыным икъулыкъухэм ягъусэхэу мэзхэм къакIэмынэным пае Iофтхьабзэхэр рахъухьанхэу.

Илъэсэу икIыгъэм АдыгеимкIэ мэзхэм машIом закъыщиштагъэу агъэунэфыгъэп. Мы илъэсымкIэ ищыкIэгъэ ухьазырын IофшIэнхэр зэрахьэх. Администрациехэм япащэхэм чIыопсым епхыгъэу машIом закъыштэн зэрилъэкIыщтымкIэ къэбархэр алъагъэIэсыгъэх. Шъолъыр проектэу «Мэзхэр къэтыухъумэных» зыфиIорэм диштэу Iоф­тхьабзэхэм язэшIохын лъагъэ­кIуатэ. 2022-рэ илъэсым щылэ мазэм и 1-м къыщыублагъэу Кощхьэблэ районымкIэ селоу Вольнэм мэшIогъэкIосэным епхыгъэ подразделение щызэхащагъ. Автоцистернэ, оборудование къащэфыгъэх, мэшIогъэкIосэ къулыкъум щыла­жьэ­хэрэм ялэжьапкIэ хагъэхъуагъ. КъэлэгъэпсыкIэ зиIэ псэупIэу Яблоновскэм машIом игъэкIосэн фытегъэпсыхьэгъэ депо ща­гъэпсынэу рахъухьагъ. Адыгэ Республикэм цIыфхэм якъэу­хъумэнкIэ ыкIи ошIэ-дэмышIагъэ зыхэлъ IофхэмкIэ и Ко­митет къызэритыгъэмкIэ, Урысыем и МЧС ичIыпIэ къулыкъухэм ягъу­сэу ащ фэдэ гумэкIыгъохэр къэмыгъэхъугъэнхэм фытегъэ­псыхьэгъэ Iофыгъохэм ахэплъэх. Дежурнэ-диспетчер къулыкъухэр къэлэ койхэм ыкIи муниципальнэ районхэм ащызэхащагъэх.

Урысые Федерацием и Президент ЮФО-мкIэ иполномочнэ лIыкIо дэжь щыIэ советым изэхэсыгъо фэхъугъэ кIэуххэм ялъытыгъэу Адыгеим и ЛIы­шъхьэ ведомствэхэм яIэшъхьэтетхэм пшъэрылъ заулэ афи­шIыгъ, ахэр зэпхыгъэхэр ошIэ­дэмышIагъэ зыхэлъ тхьамыкIагъохэр къэмыгъэхъугъэнхэмкIэ Iофтхьабзэхэу зэрахьэхэрэр джыри нахь гъэлъэшыгъэнхэр ары. Ащ дакIоу КъумпIыл Мурат пшъэрылъ къыгъэуцугъ автоматизированнэ системэу макъэ цIыфхэм зэрарагъэIущтым рашIылIэщт IофшIэнхэм япхыгъэу агъэцэкIэрэ Iофыр нахь чанэу лъагъэкIотэнэу. А Iоф­шIэнхэр мы илъэсым ыкIэм ехъулIэу аухынхэ фае.

«Урысыем и Президент цIыф­хэм ящыIакIэ щынэгъончъэу щытыным пае анахь мэхьанэшхо зиIэ пшъэрылъхэр къы­гъэуцугъэх. Дэх имыIэу ахэр гъэцэкIагъэ хъунхэм епхыгъэ IофшIэныр лъыдгъэкIотэщт. Ащ пае амалэу тиIэр зэкIэ дгъэфедэщт», — къыIуагъ рес­публикэм ипащэ.

Адыгэ Республикэм и ЛIышъхьэ ипресс-къулыкъу