Лъэпкъ философием фэгъэхьыгъ
Адыгэ къэралыгъо университетым итхылъеджапIэ мы мафэхэм «Адыгская (черкесская) философия и культура» зыфиIорэ энциклопедием илъэтегъэуцо щыкIуагъ. Ащ иавтор философие шIэныгъэхэмкIэ докторэу, профессорэу Хьанэхъу Руслъан.
Iофтхьабзэм хэлэжьагъэх Адыгэ къэралыгъо университетым иректорэу Мамый Даутэ, гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм ипащэу ЛIыIужъу Адам, лъэпкъ тхакIоу МэщбэшIэ Исхьакъ, научнэ сообществэм илIыкIохэр, студентхэр, аспирантхэр.
Энциклопедиер апэрэу электроннэ шIыкIэм тетэу къыдэкIыгъагъ, джы тхылъэуи цIыфхэм аIэкIэхьан амал щыI, ащ нэкIубгъо 900-м ехъу дэт. ФилософиемкIэ мыщ фэдэ IофшIагъэ джынэс тиIагъэп. Мыр адрэхэм афэдэп, адыгэ (черкес) философием ыкIи культурэм афэгъэхьыгъ, философскэ, культурологическэ, этнологическэ, антропологическэ терминхэр къыдэхьагъэх, ахэм къарыкIыхэрэр, этносым интеллектуальнэ-духовнэ хэхъоныгъэу иIэр, къыщиIотыкIыгъ.
Энциклопедиер — темэ зэфэшъхьафхэмкIэ научнэ шIэныгъэхэр зыщыугъоигъэ сборник. Ащ пшъэрылъэу иIэр шIэныгъэу дунаим щитэкъухьагъэр угъоигъэныр ыкIи системэ хэлъхьэгъэныр ары.
— ИлъэсыбэкIэ узэкIэIэбэжьмэ, институтым философиемкIэ гущыIалъэ зэхэгъэуцогъэным иIоф къыщаIэтыгъагъ. ЕтIанэ бэкIае тешIагъэу ащ дэлэжьэщт купыр зэхэтщэгъагъ. Ау Iофым сишъыпкъэу ыуж сызихьагъэр пандемием игъом унэм тызесыр ары. Энциклопедиер ттхынэу зыкIэхъугъэм ушъхьагъу пчъагъэ иI. Ау зэкIэми анахь шъхьаIэр фундаментальнэу ыкIи системэ зыхэлъ философскэ-культурологическэ терминхэр, екIолIакIэхэр зэрэщымыIэхэр ары. А щыкIагъэр дэгъэзыжьыгъэныр ары тызпылъыгъэр.
Энциклопедием Iоф дэсэшIэфэ адыгэ философием ыкIи культурэм яIофыгъохэм япхыгъэхэу тарихъым, этнологием, философием, культурологием, диным, нарт эпосым яхьылIэгъэ материалхэм сяджагъ, философие мэхьанэ зыхэлъыр къыхэсхыгъ, сыугъоигъэ. Ахэр тэ тихэгъэгу ыкIи IэкIыб къэралыгъохэм ащызэхащэгъэ экспедициехэм яматериалых. Тхылъым Iоф дэсэшIэфэ статьяхэу ыкIи термин зэфэшъхьафхэу 500-м ехъу стхыгъэ ыкIи татегущыIагъ. Ахэм ащыщэу 300-р IофшIагъэм дэхьагъ. Ащ нэмыкIэу нэбгырэ 50-мэ яхьылIэгъэ тхыгъэхэр ыкIи статья 60-м ехъу къыдэхьагъэх. IофшIагъэм чIыпIэ щагъотыгъ экологием, экономикэм, бзэшIэныгъэм, литературэм афэгъэхьыгъэ материалхэу философскэ мэхьанэ зиIэхэм, — еIо Хьанэхъу Руслъан.
Адыгэ наукэмкIэ апэрэу лъэпкъ философием фэгъэхьыгъэ IофшIэгъэшхоу мыр зэрэщытыр къэзэрэугъоигъэхэм къаIуагъ.
ДЕЛЭКЪО Анет.