Терроризмэ ыкIи экстремизмэ нэшанэ зиIэ бзэджэшIагъэхэм апэ­шIуе­кIогъэным фэгъэхьыгъэ Iофтхьабзэ мы мафэхэм Мыекъопэ къэ­ра­лыгъо технологическэ университетым щызэхащагъ. Ар зэрищагъ апшъэрэ еджапIэм ипроректорэу БрантI Мурат.

Iофтхьабзэм хэлэжьагъэх республикэм ихэбзэ гъэцэкIэкIо къулыкъу зэфэшъхьафхэм япащэхэр, общественнэ движениехэм ялIыкIохэр, динлэжьхэр, студентхэр.

Терроризмэм пэшIуекIогъэнымкIэ республикэм ихэбзэ гъэцэкIэкIо къулыкъухэр, дин ыкIи общественнэ организациехэр зэрэзэдэлажьэхэрэм шIуа­гъэу къыхьырэм къытегущыIагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр.

— Экстремизмэм ыкIи терро­ризмэм узэгъусэу уапэшIуекIон фае. УФ-м и Президент къыгъэу­цугъэ пшъэрылъым диштэу илъэс пчъагъэ хъугъэу IофышIэ куп зэхэтщагъэу, хэушъхьафыкIыгъэ планым тетэу Iоф тэшIэ. Непэ Интернетыр зымыгъэфе­дэрэ щыIэп. ГъэрекIо хэбзэгъэу­цу­гъэм димыштэрэ сайтиплI зэ­фа­шIыгъ, терроризмэ нэшанэ зиIэ бзэджэшIагъэхэм ныбжьыкIэхэр ахэзыщэн гухэлъ зиIэгъэ нэбгы­риплIмэ хьапс атыралъхьагъ. Тиреспуб­ликэ зызэхащагъэм къыщегъэ­жьагъэу мы лъэны­къом епхыгъэ тхьамыкIагъо къыщыхъу­гъэп, ау ащ пае урэхьатынэу щытэп, ар къыдэтлъытэзэ Iоф­шIэным етэгъэхъу. НыбжьыкIэ­хэм пшъэ­дэ­кIыжьэу ахьын алъэ­кIы­щтыр нахь агурыгъэIогъэн фае. Экстремизмэм е терроризмэм тхьамыкIагъоу апылъыр пстэуми ядгъэшIэныр типшъэрылъ, — къыIуагъ Шъхьэлэхъо Аскэр.

Комитетым ипащэ къызэриIуа­гъэмкIэ, гурыт сэнэхьат зыщара­гъэгъотырэ ыкIи апшъэрэ еджа­пIэхэр, общественнэ организациехэр, динлэжьхэр, полицием иIофышIэхэр зэготхэу мы гу­мэ­кIыгъом идэгъэзыжьын Iоф зэ­рэдашIэрэм ишIуагъэ къэкIо. Iофтхьэбзэ гъэнэфагъэхэр зэха­щэх. Анахь мэхьанэ зиIэхэм ащыщ дунэе терроризмэмкIэ экспертэу, социальнэ ыкIи дин гумэкIыгъохэм язэхэфын фэ­лэ­жьэрэ Джевад Галияшевич Боснием къикIи къызэрыкIо­гъагъэр.

— Непэ тыкъызфызэрэугъоигъэ Iофыгъом хэткIи мэхьанэшхо иI. Терроризмэм ыкIи экс­тремизмэм тиныбжьыкIэхэр ащыухъумэгъэнхэ фае. Тиапшъэ­рэ еджапIэ лъэпкъ зэфэшъхьафыбэ щеджэ. Лъэпкъ ыкIи дин зэфыщытыкIэхэм алъэныкъокIэ, терроризмэм ыкIи экстремиз­мэм апэшIуекIогъэнымкIэ Iоф­тхьэбзэ гъэнэфагъэхэр зэхэтэщэх. Анахьэу тынаIэ зытедгъэтыхэрэм ащыщ мыщ фэдэ бзэ­джашIэхэр ыкIи лъэпкъ зэгурымыIоныгъэр игъом къыхэдгъэщынхэр. Непэрэ зэхахьэм упчIэ зэфэшъхьафхэм тащытегущыIэщт, ащ шIуагъэ къызэрихьыщтым щэч хэлъэп, — ­къыIуагъ БрантI Мурат.

Терроризмэм ыкIи экстремизмэм ныбжьыкIэхэр ащыу­хъумэгъэнхэм пае Адыгэ къэра­лыгъо университетым щызэхащэрэ Iофтхьабзэхэм къатегущы­Iагъ мы апшъэрэ еджапIэм ныб­жьыкIэ политикэмкIэ ыкIи социальнэ IофыгъохэмкIэ ипроректорэу ШъхьакIэмыкъо Рустам.

Ащ къызэриIуагъэмкIэ, мы Iофыгъом мэхьанэшхо апшъэрэ еджапIэм щыраты. АР-м хэ­гъэгу кIоцI IофхэмкIэ и Министерствэ ягъусэу Iофтхьэбзэ гъэнэфагъэ­хэр зэхащэх. ЗэрагъэунэфырэмкIэ, анахьэу бзэджэшIагъэхэр зезыхьэхэрэр зыми фэмыгъэзагъэхэр, щыIэныгъэр зышIомыгъэшIэгъонхэр ары. Ар къыда­лъытэзэ студентхэм Iофтхьэбзэ гъэшIэгъонхэр бэу афызэхащэх, спортивнэ секциехэми яшIогъэ­шхо къэкIо.

АР-м гъэсэныгъэмрэ шIэныгъэмрэкIэ иминистрэ ипшъэ­рылъхэр зыгъэцэкIэрэ Евгений Лебедевым экстремизмэм ыкIи терроризмэм къыткIэхъухьэрэ лIэужхэр ащыухъумэгъэнхэм фэшI гъэсэныгъэм иучрежде-ние­хэм ренэу Iофтхьабзэхэр зэрэзэхащэхэрэр къыIуагъ. Джащ фэдэу яхэгъэгу шIу алъэ­гъуным, патриотическэ пIуныгъэ яIэным анаIэ тет. Гурыт еджапIэ пэпчъ тхьамафэм ипэублэ Урысыем игимнкIэ регъажьэ. «Разговор о важном» зыфи­Iорэм зигъо Iофыгъохэм щытегущыIэх. Мы лъэныкъомкIэ гъэ­рекIо Iофтхьэ­бзэ мини 2-м ехъу зэхащагъ.

ДЕЛЭКЪО Анет.