ГандболымкIэ Урысые зэнэкъокъум икIэух едзыгъо ихьагъэх Мыекъуапэ ипшъашъэхэр. Зыныбжь илъэс 13-м шIомыкIыгъэхэр арых зэIукIэщтхэр.

Зэнэкъокъум ия 3-рэ уцугъо къалэхэу Протвино, Волгоград ыкIи Толльяти ащыкIуагъ. Финалныкъом хэлэжьэрэ команди 6-р путевки 4-мэ афэбэнагъэх.

Мыекъопэ СШОР-у N 1-м зыщызыгъэсэрэ типшъашъэхэм яешIэгъухэр Московскэ хэкум щыкIуагъэх, тренерыр Валерий Гончар. Адыгеим илIыкIохэр аIукIагъэх Москва, Санкт-Петербург, Московскэ ыкIи Ростов хэкухэм, Краснодар краим якомандэхэм. Типшъашъэхэр Москва ыкIи Ростов-на-Дону якомандэхэм атекIуагъэх. Ащ ишIуагъэ­кIэ купым я 4-рэ чIыпIэр щаубытын ыкIи финалым ихьанхэ алъэкIыгъ.

Зэнэкъокъум иаужырэ уцугъо жъоныгъуакIэм и 5-м щегъэжьа­гъэу и 15-м нэс къалэу Протвино щыкIощт. Къэралыгъом ишъо­лъыр зэфэшъхьафхэм якомандэ 12 мыщ щызэIукIэщтых, медальхэм афэбэнэщтых.