БаскетболымкIэ Урысыем ичемпионат и Апшъэ­рэ лигэ щешIэрэ Мыекъопэ хъулъфыгъэ командэу «Динамо-МГТУ-р» хагъэунэфыкIырэ чIыпIэхэм афэбэнэщт.

Команди 4-у финалым ихьа­гъэхэм ар ащыщ хъугъэ. Зэнэкъо­къухэм яапэрэ едзыгъо изэфэхьысыжьхэмкIэ «Динамо-МГТУ-м» ящэнэрэ чIыпIэр къыдихыгъ.

БлэкIыгъэ зыгъэпсэфыгъо мафэхэм чемпионатыр аухыгъ. Адыгеим икомандэ гъогогъуищэ атекIуагъ «Чебоксарские ­ястребы», «РПФ-Университет спорта» зыфиIохэрэм. ЗэIукIэгъухэр МФОК-у «Ошъутенэм» щыкIуагъэх.

«Динамо-МГТУ-м» зэIукIэгъу 28-у иIагъэм текIоныгъэ 18 къащы­дихыгъ ыкIи очко 46-рэ ригъэ­къугъ. А пчъагъэр 3-кIэ нахьыб ыпэ ит командэхэу «БАРС-РГЭУ-м» ыкIи «Челбаскет» рагъэкъугъэм нахьи. ЯплIэнэрэ командэу фи­налым ихьагъэр къалэу Магнитогорскэ икомандэу «Металлургыр» ары. Джы мы командэхэр гъогогъу тIо­рытIо зэдешIэщтых, зэIу­кIэгъухэр Челябинскэ ыкIи Рос­тов-на-Дону ащыкIощтых.

Мы мафэхэм «Динамо-МГТУ-м» финалым зыфегъэхьазыры. Тренерхэр Андрей Синельниковымрэ Артем Гапошинымрэ. Апэрэ ешIэгъур Челябинскэ щыриIэщт, гъэтхапэм и 8-м командэу «БАРС-РГЭУ-м» IукIэщт.