«Луч» (Москва) — «АГУ-Адыиф» (Мыекъуапэ) — 29:32 (16:18, 13:14)

Суперлигэм ибзылъфыгъэ командэхэм язичэзыу ешIэгъухэм къадыхэлъытагъэу «АГУ-Адыифыр» «Лучым» IукIагъ. Купэу «Б-м» хэтхэм япэшIорыгъэшъ уцугъокIэ мыр ящэнэрэ зэIукIэгъоу щытыгъ ыкIи тикомандэ текIоныгъэр къыщыдихыгъ. Суперлигэм занкIэу къыхэнэжьыным пае «АГУ-Адыифым» я 9-рэ чIыпIэр къыдихын фае, джырэ уахътэм я 11-м щыт.

— «Лучыр» текIоныгъэм зэ­рэфэбэнэщтым тицыхьэ телъыгъ. Пшъэрылъэу щытыгъэр апэрэ такъикъи 10 — 15-м тыкъызэкIэмыкIоныр ары. Ау егъэжьэгъур къин къызэрэтфэхъугъэр сыгу рихьыгъэп, пчъагъэр 3:1-у тшIуа­хьыщтыгъ. Ау типшъашъэхэм пытагъэ къызхагъэфагъ, ащкIэ ахэм инэу сафэраз. Анахьэу зигугъу къэп­шIын фаер тикъэлэп­чъэIутэу Регина Якуповар ары, Iэгуаоу къадзыгъэм ипроцент 50 фэдизыр ащ къызэкIидзэ­жьыгъ. Ащ ишIуа­гъэкIэ тикомандэ нахь зыкъы­шIэжьыгъ, ыпэкIэ илъыгъ, — къы­Iуагъ тренер шъхьаIэу Александр Реввэ.

Я 6-рэ такъикъым ыуж «АГУ— Адыифыр» текIоныгъэм сыдигъокIи нахь пэблэгъагъ. КъэлэпчъэIутым нэмыкIэу ешIакIохэу Алиса Дворцеваям ыкIи Татьяна Кирилловам дэгъу дэдэу зыкъагъэлъэгъуагъ. Ахэм гъогогъу пшIырыпшIэ Iэгуа­ор хъагъэм дадзагъ.

Шъугу къэдгъэкIыжьын, зэнэ­къокъум иятIонэрэ едзыгъо къыдыхэлъытагъэу командэхэм ешIэгъу пшIырыпшI яIэщт. Ахэм язэфэхьысыжьхэм къагъэлъэ­гъощт Суперлигэм занкIэу къы­хэнэжьыщтыр, ешIэгъу тедзэхэр зиIэщтхэр ыкIи лигэ нахь цIыкIум хэфэщтхэр.

«АГУ-Адыифым» зичэзыу ешIэгъухэр Мыекъуапэ щыриIэщтых, мэзаем и 25-м командэу «Фениксым» IукIэщт, ар пчыхьэм сыхьатыр 6-м рагъэжьэщт.

Купэу «Б-м» хэт командэхэм очко пчъагъэу рагъэкъугъэр:

Университет — 23, Ставрополье — 22, Феникс — 17, АГУ-Адыиф — 13, Луч — 7, Балтийская заря — 2.