Мыекъуапэ илюбительскэ командэу «Динамо» зыфи­Iо­рэр Чэщ хоккей лигэм и Урысые чемпионат икубок цIыкIу къыдэхыгъэным фэбанэ.

Республикэм икъэлэ шъхьаIэ икомандэ зыныбжь илъэс 40-м ехъугъэхэм язэнэкъо­къоу Краснодар краим щыкIорэм хэлажьэ.

Командэм икапитанэу Андрей Инозем­цевым къызэриIуагъэмкIэ, Пшызэ икомандэхэм нахь ухьазырыныгъэ дэгъу ыкIи опыт зэряIэр къыдалъыти, ахэм янэкъокъунхэу рахъухьагъ.

Мы зэнэкъокъум команди 6 хэлажьэ. Мыекъопэ «Динамэм» нэмыкIэу, «Союз», «Звезда», «Адреналин», «Аллигатор», «Крепость» зыфиIохэрэр. ЕдзыгъуитIум къа­дыхэлъытэгъэ ешIэгъу 11 яIэгъах. «Динамэм» зы текIоныгъэ къыдихыгъ, зы ешIэгъур зыми ыхьыгъэп, 9-рэ къытекIуагъэх.

Ау кубок цIыкIур къыдихынымкIэ джыри амалхэр иIэх. Ащ пае, Кореновскэ икомандэу «Аллегаторым» къышIуихьын фае, ешIэгъур Мыекъуапэ щыкIощт. Зэрагъэнэфагъэм­кIэ, гъэтхапэм и 4-м командэхэр зэIу­кIэщтых.

Чэщ хоккей лигэм Урысыем ишъолъыр 75-мэ якомандэ миным ехъу хэлажьэ. Мы спорт организациер зызэхащагъэр 2011-рэ илъэсым тыгъэгъазэм и 15-р ары. Ащ кIэща­кIо фэхъугъэх Урысыем и Президентэу Владимир Путиныр, зэлъашIэрэ тихоккеистхэр.