ЕшIэгъу тIурытIу къафэнагъ
Адыгэ Республикэм футболымкIэ изэIухыгъэ кIымэфэ зэнэкъокъу къыдыхэлъытэгъэ ешIэгъухэр аухынхэмкIэ туритIу къэнагъ.
Апэрэ купым командэ 13 хэт, ахэм язэIукIэгъухэр гъэшIэгъонэу, узIэпащэу макIох.
Командэу «Ошъутенэр» апэрэ чIыпIэм щыт. Тренерэу Арсен Мазловым икомандэ ешIэкIэ дахэ къегъэлъагъо, блэкIыгъэ турым мэхьанэшхо зиIэ текIоныгъэр къыдихыгъ. Ау ятIонэрэ чIыпIэм щыт «Спортмастер-2-р» бэп ыуж къызэринэрэр.
ЫпшъэкIэ къызэрэтIуагъэу, апэрэ купым хэт командэхэм джыри ешIэгъу тIурытIу къафэнагъ, ахэм зэфэхьысыжьэу афэхъухэрэм бэкIэ ялъытыгъэщт текIоныгъэр ыкIи хагъэунэфыкIырэ чIыпIэхэр къыдэзыхыщтхэр.
Командэхэм очко пчъагъэу рагъэкъугъэр:
Ошъутен — 27, Спортмастер-2 — 26, Легион — 22, МФОК-у «Ошъутен» — 22, Спортмастер — 19.
Мы ешIэгъу благъэм апэрэ чIыпIэм щыт командэр «Делотехникэм» IукIэщт, ар сыхьатыр 2-м рагъэжьэщт. Я 11-рэ турыр мэзаем и 18-м кIощт, зэIукIэгъухэр сыхьатыр 10-м аублэщтых. Фаехэр зэкIэ ыпкIэ хэмылъэу стадионым дагъэхьащтых.
ЗэдешIэщтхэр:
Альянс — Спортмастер, Спортмастер-2 — Тульскэр, Юг-Авто — Сокол, СШОР-2008 — МФОК-у «Ошъутен», Ошъутен — Делотехникэр, СШОР-2007 — Легион.