ФутболымкIэ Урысыем ичемпионат иятIонэрэ лигэ иапэрэ куп щешIэрэ Мыекъопэ «Зэ­къош­ныгъэм» зэнэкъокъухэм Краснодар краим за­щыфегъэхьазыры. Адыгеим икомандэ поселкэу «Широкая балка» зыфиIорэм ибазэу «Буткэмп» ешIэгъуитIу щыриIагъ. ЗэIукIэгъуитIури зыми ыхьыгъэп, пчъагъэр зэфэдэу аухыгъ.

Апэу тикомандэу зыIукIагъэр «СКА-Хабаровск-2-р» ары. Пчъа­гъэр 0:0-у ешIэгъур аухыгъ.

«Зэкъошныгъэм» ятIонэрэ ешIэгъоу иIагъэм къалэу Курскэ икомандэу «Авангард» щыIукIагъ. Мыекъуапэ икомандэ 2:0-у те­кIоныгъэр къыдихызэ, ятIонэрэ таймым Курскэ икомандэ пчъагъэр зэфэдиз ышIын ылъэкIыгъ, ар зэIукIэгъум кIэух фэхъугъ.

Мыщ ыпэкIэ «Зэкъошныгъэр» командэу «Армавир» зыфиIорэм IукIэгъагъ, ари 2:2-у аухыгъ.

Шъугу къэдгъэкIыжьын, чем­пионатыр рагъэжьэжьынымкIэ мазэ имыкъупэ къэнагъ. Апэрэ ешIэгъур тикомандэ гъэтхапэм и 11-м Волгоград щыриIэщт, «Роторым» IукIэщт.